Ho'a Babilonia
1 Caldéo retã Babilonia rehe he'ikáva Ñandejára maranduhára*f** Jeremías rupi.
2 “Pemomarandu kóva,
peikuaauka tetã nguéra apytépe.
Pemopu'ã mba'e rechaukaha.
Ani peñomi mba'eve.
Peje: ‘Babilonia ho'a!
Itupã Bel opyta toryjárõ,
tupã Marduc okyhyje eterei!
Ita'ãnga, itupã gua'u kuéra,
opyta toryjárõ ha okyhyje eterei!’
3 Yvate gotyogui ou hína
chupe peteĩ tetã
ojapótava hetãgui
yvy ojeiko'ỹha.
Avaveichagua,
taha'e yvypóra térã mymba
ndoiko mo'ãvéi upépe,
opavave niko okañýta
ohóvo upégui.”
Israelgua ou jey
4 Ñandejára he'i: “Umiha árape Israel ha Judagua hasẽta oúvo che, Tupã Ijára, rekávo. 5 Oporandúta hikuái Sión rape rehe ha upe gotyo ohóta, he'ívo: ‘Jaha Ñandejára rendápe ha jajapo hendive ñe'ẽ me'ẽ opa árape guarã.’
6 Che retãgua ha'e vaekue ovecha kañy mbyréicha, oñesãmbyhy vaíva. Ijovecha rerekua kuéra, oheja okañy ka'aguy rupi. Oho peteĩ ka'aguýgui ambuépe ha hesarái ikorágui. 7 Hese ija'e'ỹva, otopávo hese kuéra, ho'úva ha he'i hikuái: ‘Ndorojapói ivaíva, ha'e kuéra ojapo haguére ivaíva Ñandejára renondépe, ha'éva ikora oiko haguépe kyhyje'ỹre, itúva kuéra ypykue jeroviaha.’
8 Pesẽ Pya'éke
caldéo retã Babilóniagui!
Pesẽ ovecha renondépe
isãmbyhyháraicha!
9 Amokyre'ỹta yvate gotyogua
tetã mbarete atýpe
ondyry haguã oñondivepa
Babilóniare.
Oñemoĩta ojoykére
ha oñemomba'éta hese.
Umíva kuimba'e katupyry ñorãirõme.
Opoírõ ihu'ýgui ndojavýi voi.
10 Oipe'áta caldéogui
opa mba'e oguerekóva,
oipe'áta chugui kuéra henyhẽ meve.
Che, opa mba'e Jára, upéicha ha'e.
Ho'a Babilonia
11 Peẽ caldéo kuéra
pemonda vaekue che retã guápe,
pende rorýke ha pejapo vy'a guasu!
Pende saraki vaka ra'ýicha ñúme!
Pende ayvu kavajúicha!
12 Pene retã tee katu
ojejaho'íta ñemotĩme.
Ha'éta tetã ojeapo'ivéva,
yvy perõ avave oiko'ỹha.
13 Che pochýtagui
ha pohejáta avave'ỹre,
yvy ojeiko'ỹ eteha oikóta nde hegui.
Opa upe rupi ohasáva
opytáta ijurujái
ohechávo mba'eichaitépa oñenupã.
14 Peñemohendáke, hu'y poiha,
pemongoráke Babilonia!
Pepoíke hese opa pende hu'y.
Ojapo haguére ivaíva che rehe, opa mba'e Jára!
15 Pehendukáke opa guio
ñorãirõ sapukái!
Babilonia oñeme'ẽma!
Ho'áma hóga yvate,
yvýre ojeitýma ikorapy yvate kuéra!
Péicha che añemyengovia:
peñemyengovia katu hese!
Pejapo hese upe ha'e ojapo vaekue!
16 Ani peheja Babilóniape
avave oñemitỹ
térã omono'õ haguã temitỹngue.
Ohechávo ñorãirõ ohundipáva opa mba'e,
umi mombyrygua oho jeýta hetãme,
peteĩ-teĩ okañýta ijyvýpe.”
Israelgua ou jey
17 “Israel ojogua ovecha kañy mbyre omuñávape león. Tenondete ho'u chupe Asiria ruvicha guasu, upéi Babilonia ruvicha guasu Nabucodonosor oñapi'ũ ikãnguekue. 18 Upévare che, Tupã Israel Jára che pu'akapáva, ha'e: Ainupãta Babilonia ruvicha guasu ha hetãme, ajapo haguéicha Asiria ruvicha guasúre. 19 Amokyre'ỹta Israel guápe oho jey haguã hetãme, ha ovecháicha oguereko jeýta heta hembi'urã yvyty kuéra Carmelo, Basán, Efraín ha Galaad guápe. 20 Che, opa mba'e Jára, upéicha ha'e. Umiha árape Israel ha Judá ipotĩta hembiapo vaikuégui, che aheja reítagui umi aheja vaekuépe oikove.
Babilonia oñehundi
21 “Pendyry Merataim
ha Pecodgua rehe!
Pemuña chupe kuéra pehundipaite peve!
Pejapóke opa mba'e ha'éva peẽme!
Che, opa mba'e Jára, ha'e ojejapo haguã.”
22 Pe tetãme oñehendu ñorãirõ ryapu,
ñehundi guasu rehegua.
23 Babilonia
opa tetã nguéra mbotaha,
opẽ ha oñemyangu'i!
Tuichaite piko
oñemondýi tetã nguéra
ohechávo pe Babilóniape ojehu vaekue!
24 Nde voi Babilonia
remoĩ vaekue ñuhã nde jupe,
ha reimo'ã'ỹhágui re'a pype.
Repyta jejokuapy ha ñembotypy
reñemoĩ haguére nde Jára rehe.
25 Ñandejára oipe'a
pe koty rokẽ oñeñongatuhápe
ihu'y kuéra
ha oguenohẽ ipochy rehegua hu'y,
Ñandejára ipu'akapáva niko
oguereko upe ojapo vaerã
caldéo retãme.
26 Pendyry hese opa guio!
Peipe'a itrígo ñongatuha rokẽ!
Pembyaty opavavépe ha pehundi!
Aníke opyta avave ojejuka'ỹre!
27 Pejuka opa ikuimba'e oñoirãirõva,
pemondo ojejuka haguãme!
Aichejáranga umíva!
Oguahẽma chupe kuéra hi'ára,
iñenupã ára!
28 (Okañy vaekue Babilóniagui oguahẽ Siónpe omombe'úvo mba'éicha Tupã Ñandejára omyengovia Babilóniape upe ojapo vaekue itupaóre.)
29 “Pehenói opa hu'y poihápe
ondyry haguã Babilóniare!
Peñemohenda pe táva jerére
ani haguã okañy avave!
Pemyengovia chupe,
hembiapokue ojerureháicha!
Pejapo hese upe ha'e ojapo vaekue avei!
Itĩ atã haguére che ndive,
Tupã Israel Jára Imarangatúva ndive.
30 Upévare imitã rusu kuéra
ho'áta omano umi hasaha rupi
ha opa ikuimba'e ñorãirõva
omanóta upe árape.
Che, opa mba'e Jára, upéicha ha'e.”
31 Ñandejára ipu'akapáva he'i:
“Tetã tĩ pu'ã,
che añemoĩ nde rehe.
Oguahẽma nde ára,
reñenupã haguã ára.
32 Tetã tĩ pu'ã,
reñepysãnga ha re'áta,
ha ndaipóri ne mopu'ã vaerã.
Ahapýta opa nde táva kuéra,
ha pe tata ohundíta
opa nde jerekuévo.”
33 Ñandejára ipu'akapáva he'i: Israel ha Judagua ojejopy vai hína. Hese kuéra ija'e'ỹva oguereko iñapytĩmby ha ndopoiséi chugui kuéra. 34 Imosãsohára katu ipyapy mbarete ha héra opa mba'e Jára ipu'akapáva. Ha'e ojapóta upe heko jojáva: oguerúta py'a guapy tetãme ha kyhyje Babilonia guápe.”
35 Ñandejára he'i:
“Ñorãirõ toguahẽ
Babilonia ha hetã guápe!
Huvicha ha ikarai arandu kuérape!
36 Ñorãirõ imba'e ñemi kuaahárape:
ta itarovapa hikuái!
37 Ñorãirõ ikuimba'e kuéra oñorãirõvape:
toryryipa kyhyjégui!
Ñorãirõ ikavaju ha ikárro kuérape!
Ñorãirõ kuimba'e kuéra
jehepy me'ẽre oñorãirõvape:
tojoguapa hikuái kuñáme!
Ñorãirõ imba'e repyetápe:
toñemondapa chugui kuéra!
38 Ñorãirõ hi'ysyry kuérape:
tahypa chugui kuéra!
Babilonia niko peteĩ tetã
oĩháme tupã gua'u ivai etereíva,
ha upévare itavyraipa hikuái.
39 Upévare Babilóniape ojaitypóta mbarakaja saite ha aguara guasu saite, ha upépe oikóta ñandu guasu. Ndojeiko mo'ãvéi upépe araka'eve. 40 Opytáta niko Sodoma, Gomorra ha táva kuéra ijerére guáicha, oñehundi ramo guare. Avave ndoiko mo'ãvéi upépe ohasa kuévonte jepe. Che, opa mba'e Jára, upéicha ha'e.
41 Yvate gotyo mombyrýgui
peteĩ tetã ipokatúva
ha heta mburuvicha guasu
oñembosako'i ou haguã.
42 Kyse yvuku ha hu'y ipópe,
iñarõ ha ndoikuaái poriahurereko,
isapukái hyapu yguasu sununúicha
ha ou kavaju ári.
Oĩma oñorãirõ haguãicha
Babilonia ndive.
43 Babilonia ruvicha guasu
oikuaávo upéva,
kyhyjégui ijapa,
ipy'a tarova ha hasy
kuña imemby pota vaicha.
44 Ajúta oñeimo'ã'ỹhágui, leóncha osẽva Jordán rembe'y javoráigui ha ojepoíva umi ñu rovyũ rupi. Amosẽta upégui Babilonia guápe ha amoĩta oisãmbyhy haguã upe che aiporavóva. Máva piko ikatúta che rehe oñembojoja? Máva piko ikatúta che rehe oñemoĩ? Mba'eichagua ovecha rerekua piko ikatúta che mbohovái? 45 Ehendu upe che, opa mba'e Jára, ambojy vaekue che akãme vairã Babilóniare. Upe che ha'e vaekue oikotaha caldéo retãre: Umi ovecha ra'y michĩvéva jepe ojereraháta ha iñu nguéra oñembyaipáta. 46 Babilonia ho'ávo hyapu hatã etereítagui, yvy oryryipáta ha isapukái kuéra oñehendúta opa tetã rupi.”
© © Guarani DC Bible © Sociedad Bíblica Paraguaya, 1996.