Pe oje'éva filistéo kuérare
1 Kóva hína marandu Ñandejára ohendukáva maranduhára*f** Jeremíaspe filistéo kuérare, faraón ondyry mboyve Gaza rehe:
2 “Che, opa mba'e Jára, ha'e:
Yvate gotyogui ou ysyry guasu,
ysyry osoro vaicha.
Ojaho'ipa upe tetã
ha opa mba'e ipypegua,
táva kuéra ha pype oikóva.
Opa Tetãgua osapukái,
ipyahẽ rasy joa.
3 Ohendúvo kavaju ñani,
kárro sununu
ha irruéda ryapu,
ikangypa umi túva
ha oheja rei ita'ýra kuéra.
4 Oguahẽmagui upe ára
oñehundívo filistéo kuéra
ojepe'ávo Tiro ha Sidóngui
pe pytyvõ opytáva gueteri chupe kuéra.”
Ñandejára ohundíta filistéo kuérape,
ojererova vaekue Crétagui.
5 Gazagua oñemyakã perõ joa,
Ascalongua opyta iñe'ẽngu.
Kuimba'e hete rusúva
yma guare rembyre paha,
araka'e peve piko
peikutupáta pende rete
mba'e mbyasýgui?
6 Áina, Ñandejára kyse puku!
Araka'e piko rejejokóta?
Eike jeýna nde hyrúpe,
epytu'u, anive reku'e!
7 Mba'éicha piko opytu'úta,
ku Ñandejára oñe'ẽma,
ha he'íma vaekue chupe
ondyry haguã Ascalón
ha opa yguasu rembe'ýre?
© © Guarani DC Bible © Sociedad Bíblica Paraguaya, 1996.