Manto nento magyetlókasso nak ektémakxa
1 Apméssek axta appeywa Wesse' egegkok Dios appeywa aplegasso Zacarías ektáhakxa axta cuatro ekhem pelten nueve (éltamhomaxchexa nak Quisleu) ekwokmo axta cuatro apyeyam apteme Wesse' apwányam ma'a Darío. 2 Cháxa ekhem apkeláphassama axta nahan énxet'ák Betel ma'a Sarézer tén han Réguem-mélec yetlo énxet'ák apagkok apkeltémo elmaxnegwók yaqwayam epasmok ma'a Wesse' egegkok, 3 tén han etnehek elmaxneyha apkellegasso nak Dios appeywa tén han apkelmaxnéssesso nak Dios énxet'ák apagkok apkeltamheykha nak chá'a Wesse' ekha nak apyennaqte tegma appagkanamap apagkok: “¿Anlanagkoya sa' chá'a sẽllapwámeyak ekwákxo enxoho chá'a cinco pelten yókxoho apyeyam? ¿Mantawagkeheya sa' nahan chá'a nentéyak ekhawo nentamheykegko nak makham se'e kaxwo' nak?”
4 Tén axta sepaqhetchesa ko'o m'a Wesse' ekha nak apyennaqte. Aptáhak axta seyáneya s'e: 5 “Etne sa' elának apyókxoho énxet'ák apheykha nak apkelókxa s'e tén han ma'a apkelmaxnéssesso nak énxet'ák ahagkok: ‘Setenta apyeyam apwokmok kélláneyak kéxegke m'a manto nak nento tén han éllapwáméyak, cham'a ekwákxo enxoho chá'a pelten cinco, tén han pelten siete. Háwe eyke yaqwayam héláwhok chá'a ko'o kélláneykegko xa, 6 kéltókagkek agkok chá'a m'a kéltéyak nak tén han kélyenágko enxoho chá'a m'a kélyenéyak nak, kélagkok kélagko' aqsa chá'a kéltegyeyk yaqwayam kapasmok.’” 7 Cháxa appeywa aplegassama axta Wesse' egegkok, apchásenneykekxo axta eñeksek ma'a nanók apkellegasso axta Dios appeywa, ektaqmeleykekxo axta apheykha énxet'ák ma'a Jerusalén tén han aplánegweykekxo axta énxet ma'a kañe' nak tén han apheykegko axta tegma apkelyawe m'a nepyáwa nak, tén han ma'a yókxexma Négueb tén han ma'a xapop meyke nak élekhahéyak.
Mólyeheykekxa chá'a kañék hẽlya'aksek mók nekha
8 Appaqhetchessek axta Wesse' egegkok ma'a Dios appeywa aplegasso Zacarías. Aptáhak axta apcháneya s'e: 9 “Keso séltamhókxa nak ko'o kóltéhek se'e: Kólteme chá'a ekpéwomo agko' kéllánekxésso amya'a kélmók, tén han ektaqmeleykha kélwáxok tén han apmopyósa kóllanok kélmók. 10 Nágkólnaqtawasagkoho chá'a m'a xentampe'e nak, tén han ma'a élyeheykha nak, tén han ma'a énxet'ák apkeleñama nak mók apkelókxa, tén han ma'a meyke nak aqsok apagkok. Nágkaxén chá'a kélwáxok kólteméssessamhok exma ekmaso kélmók.” 11 Axta eyke elyahákxohok ma'a énxet'ák. Apyókxoho axta apkelpeynchákpok, máxa meyke apeyk'ák axta aptamhágkok. 12 Apkelyennaqtéssek axta apkelwáxok ektémól'a meteymog ekyennaqte agko' la'a, yaqwayam enxoho megyeyxók ma'a kélxekmósso tén han nélánémaxchexa antéhek apkeltennasso axta Wesse' ekha nak apyennaqte m'a espíritu apagkok, apchásenneykekxo axta eñeksek ma'a nanók apkellegasso axta Dios appeywa.
Axta keñamak aplama apagko' ma'a Wesse' egegkok. 13 Aptáhak axta s'e: “Magweyxók sa' ko'óxa sewóneyncha'a enxoho xa énxet'ák nak, ekhawo aptamhágkaxa nak megyahaxnawo sélwóneyncha'a ko'o. 14 Axta keñamak séxpánchessama ko'o ektémól'a samaxche kaxpánchesek aqsok sélya'assama nepyeseksa m'a apyókxoho énxet'ák melweteya nak, meyke xama aqsok axta nahan tamheykekxak natámen ma'a apkelókxa, meyke xama énxet enxoho apmopwána exek. ¡Ekmaso axta aptemessáseykekxak ma'a xama apchókxa ektaqmalma agko' nak!”
© © Enxet Lengua Sur Bible © Paraguayan Bible Society, 2015.