1 “Kamayhekxak sa' ekteyapmakxa nak yegmen xa ekhem nak, yaqwayam sa' elyenyesagkok apkeltémakxa melya'assáxma tén han élmanyása apyempe'ék ma'a David aptawán'ák neptámen tén han ma'a énxet'ák apheykha nak Jerusalén. 2 Amasséssamhok ahagko' sa' ko'o élwesey aqsok kéláyókxa ekyókxoho s'e apchókxa nak, yaqwayam sa' megkóllenxanmagkók chá'a kélwóneykha. Amasséssók sa' nahan apchókxa m'a Dios appeywa apkellegasso apkelmopwancha'a amya'a nak tén han ma'a espíritu élmanyása nak. Ekxénchek ko'o xa, sektáha nak Wesse'. 3 Yetneyk sa' agkok chá'a xama énxet apmáheyo exének sekpeywa, sa' etnehek chá'a yának ektáha nak chá'a apyáp apagko' se'e: ‘¡Yetsapok sa' xép, hakte apmopwána amya'a chá'a etnehek xép exének ma'a Wesse' egegkok appeywa!’ ¡Apyáp apagko' sa' nahan chá'a elyetxák sawo yaqhek, eñama apheyásamákpoho m'a aptémakxa nak Dios appeywa aplegasso!
4 “Elmegqeyk sa' Dios appeywa apkellegasso apkelxéna enxoho ektémakxa aqsok apkelwete xa ekhem nak. Mopwanchek sa' eyke elyexanchesha xama énxet enxoho elántaxnekxak ma'a aqsok émpehek apkelaqlamap nak chá'a m'a Dios appeywa apkellegasso, 5 sa' aqsa chá'a etnehek epaqmétek xama s'e: ‘Háwe ko'o Dios appeywa seklegasso, xapop sekpeyncheyam ko'o. Sektémakxa étkok axta sekteme sektamheykha namyep. 6 Aptemék sa' agkok xama énxet elmaxneyha s'e: ‘¿Yaqsa eyke élyensasso xa apyempehek nak?’, sa' etnehek yátegmowagkokxak se'e: ‘Axta keñamak sélteméssesso m'a sélxegexma'a apxagkok nak.’”
Dios apteme Wesse' ahagkok
7 Aptáhak Wesse'
ekha nak apyennaqte s'e:
“¡Sókwenaqte, katnemekxa néten,
kay'ám ma'a keláneykha
nepkések ahagkok
tén han ma'a sepasmeykha nak chá'a
sektamheykha!
¡Kaqha m'a keláneykha nepkések,
keñe sa' yexpaqnek ma'a nepkések,
keñe sa' ko'o aktamagkok ma'a
nepkések apketkók nak!
8-9 Eletsapok sa' chá'a apqánet
ektáhakxa enxoho chá'a apqántánxo
apheykha s'e apchókxa nak:
sa' aqsa chá'a yeymakpok ma'a
xama nak apkeymomap
apkeletsapma nak
chá'a apqánet apnámakkok.
Keñe sa' xa apkeymomap
nak chá'a xama
ayenyók neyseksa táxa;
amópéssásekxak sa'
apyempehek
sa' atnéssesek ma'a
ektémól'a kólmópeyásekxak ma'a
sawo ekmope ekmomnáwa;
aláxñásekxak sa'
ektémól'a kóláxñásekxak ma'a sawo
ekyátekto ekmomnáwa.
Keñe sa' hewónmakha ko'o m'a,
wátegmowagkok sa' nahan.
Sa' atnehek alának se'e:
‘Énxet'ák ahagkok’,
keñe sa' etnehek
heyátegmowagkokxak se'e:
‘Wesse' egegkok
apteme Dios egagkok.’
Ekxénchek ko'o xa,
sektáha nak Wesse'.”
© © Enxet Lengua Sur Bible © Paraguayan Bible Society, 2015.