1 Étamchek axta sekpagkanma
sekyetnamakxa néten axta'a.
Étamchek axta,
maxta eyke óteyákxa'.
2 Tén axta sekhákxo néten,
ekweynchámeyha axta
nepyeseksa tegma apwányam
sétama sekpagkanma
ekmámenyého agko' nak ewáxok
ma'a ámay nak tén han ma'a
apkekhegweykekxexa nak
chá'a énxet.
Étamchek axta,
maxta eyke óteyákxa'.
3 Élmaxneyáha axta m'a
apkeltaqmelchesso nak
tegma apwányam
apkelhaxnenchámeykegko axta
chá'a m'a nepyáwa.
Axta ektáhak séláneya s'e:
¿Yagkólwet'ak kéxegke
sekpagkanma,
ekmámenyého agko'
nak ko'o ewáxok?
4 Axta nahan kanéwók sekyeykhe
apchaqnágkaxa m'a énxet nak
sekwetákxo m'a sekpagkanma
sekmámenyého ahagko' nak.
Ekmeyk axta apmek
sekyentamákxo m'a kañe' méme
axagkok, meyke sekyenyeykekxa,
cham'a séñamakxa axta ko'o
sekteyapma.
Apkenna'
5 Kelán'ák Jerusalén,
néltamhók negko'o
mehẽltawássesha neghéyak,
yetlo kélxeyenma xenaq étkok
tén han popyet apketkók.
¡Hẽlho aqsa aghagkok
ekwokmoho nennaqxétekhágko!
Ektáhakxa ántánxo negmeneykmasso
Coro
6 ¿Yaqsa ekxegakmo nak
yókxexma meykexa énxet,
ekxegakmo nak ekho éten ekpánma
ekmeyeykekxa néten,
ekxegakmo nak yetlo
émpasso ekpaqneyam ma'a
yámet ánek ekmátsa nak ekpaqneyam
tén han ma'a aqsok ekmátsa
nak ekpaqneyam éten agkok,
tén han ma'a ekyókxoho mók
ektémakxa nak chá'a sokmátsa?
7 ¡Neykhe Salomón apchántél'a!
Appasmokmek nahan apxegakmo
sesenta sẽlpextétamo apkelyennaqte
apagko' nak ma'a Israel;
8 apwancha'ak nahan apkelmeykha
sókwenaqte xa apyókxoho nak,
kempakhakma yapmeyk
apkelya'áseykegkoho
ektémakxa némpakhe;
xama xama nahan chá'a apketchesso
nepxet ma'a sókwenaqte apagkok
apkenchesso katnégwomhok exma axta'a.
9 Apkeltémók axta kóllanaksek
Salomón xama apchánte m'a
yántéseksa'ák éltaqmalma agko'
éleñama nak ma'a yókxexma Líbano.
10 Sawo ekmope
élmomnáwa axta m'a
élámha nak;
tén axta sawo ekyátekto
ekmomnáwa m'a
apteyassamakxa nak apkapok;
apáwa hómáyok axta
émpehek ma'a nentaháno nak;
tén axta kelán'ák Jerusalén
élnáxegkáseykha yetlo
ektaqmelchessamo m'a
kañe' awáxok nak.
11 Kelán'ák Sión,
¡Kólántép, kóllano
wesse' apwányam Salomón!
Apketchessek apqátek ma'a
apkelháxaqxo élyenma
élánésso axta egken yaqwayam
emha m'a élyamhopa sa',
ekhem ekpayhekxexa agko' sa'
apwáxok.
© © Enxet Lengua Sur Bible © Paraguayan Bible Society, 2015.