Ektémakxa ektáxésamaxche'
1 Negmeneykmasso ektaqmalma agko' apnaqtáxésso axta m'a Salomón.
Émha amonye' negmeneykmasso
Kelán'a
2 ¡Hepetses hana sekxo'!
Yeykhágweykmók agko' ekmátsa
vino m'a ektémakxa nak
chá'a seyásekhayo.
3 Atsók agkók chá'a atekhánek
ekpaqneyam ma'a
sokmátsa apagkok,
máxa entemék apwesey m'a
sokmátsa élyegkenamaxchel'a.
¡Cháxa keñamak ekmámenyého nak
chá'a m'a kelán'a étkók!
4 ¡Héntemekxa heykxe kaxwo'!
¡Wesse' apwányam,
héntemekxa kañe' apxagkok!
Coro
Kalpayhekxak sa' egwáxok yetlo exchep;
kalxénwakxohok sa' egwáxok
ekyeykhágweykmoho ektémakxa
vino m'a ektémakxa nak
chá'a seyásekhayo.
¡Neyke temék ekmámenyého
nak chá'a m'a kelán'ák!
Kelán'a
5 Kelán'ák Jerusalén,
sélpésyam eykhe ko'o,
etásek eyke;
Sélpésyam, hawók émpehek
ma'a apkelpakxenéyak
nak énxet'ák ma'a yókxexma Quedar.
Etáse', máxa m'a Salomón apáwa
napwe'ék apagkok
kélmakheyáseykegkól'a m'a
kañe' apxagkok.
6 Nágkóllano aqsa ektémakxa
ekpésyam émpehek,
tén han ekwatno
émpehek ma'a mayáhat.
Etaqnagkamchek axta ko'o m'a
élyapma,
tén axta apkeltémo
atnehek séláneykha m'a anmen
yámet apkeneykekxa,
¡keñe maláneykencha'a m'a
ektáha axta séneykekxa ahagko'!
7 Xép, ekmámenyého nak ewáxok alano',
héltennés hana,
¿Háxko apkeleykegkaxa chá'a
pa'at apnaqtósso nepkések?
¿Háxko apkelyáqkasseykekxexa
chá'a ellókassesek
apkelyampe yetseksók ekhem?
Mamakók ko'o
aweynchamha aqsa
nepyeseksa nepkések
apnaqtósso m'a
apkelxegexma'a nak xép.
Coro
8 Kelán'a ektaqmalma nak
neyseksa m'a kelán'ák éltaqmalma,
sa' agkok kay'ásegkok xeye',
kalyetlow sa' aptamnek ma'a
nepkések,
kalágwom sa' pa'at
yát'ay apketkók eknaqtósso m'a
ekpayho nak apkelpakxeneykegkaxa
m'a apkeláneykha nepkések.
Apkenna'
9 Sekpagkanma, ekhéssamók ko'o
exche' m'a
yátnáxeg apkelwána aptaqmalma,
apyenyawassamól'a m'a
faraón yátnáxeg apyenyawasso apagkok.
10 ¡Katxohok kalmakheykha
élchenméhe m'a
nekhaw'ék amáxempenák nak!
¡Katxohok kalmakheykha ayespok
ma'a eknatanma meteymog
élyenméyak éltaqmalma nak!
11 ¡Anlanaksek sa' élchenméhe
sawo ekyátekto ekmomnáwa
yetlo élpaxqéyak ma'a
sawo ekmope ekmomnáwa!
Kelán'a
12 Weyncháxcheyk ekpaqneyam
sokmátsa ahagkok,
neyseksa apha wesse' apwányam
ma'a nekha mésa.
13 Ekhéssamók ko'o
sekpagkanma m'a
ektémól'a nahápa apketkok
kélxatal'a aqsok ánek
ekmátsa ekpaqneyam,
sekmakheyáseykencha'a nak chá'a
nepyeseksa neme ahagkok.
14 Ekhéssamók ko'o
sekpagkanma m'a
yámet exnók élmope
ekmátsa agko' la'a ekpaqneyam,
émha nak ma'a
kélcheneykekxexa nak anmen yámet
yókxexma En-gadi.
Apkenna'
15 ¡Tásók agko' nak la'a exche',
sekpagkanma,
tásók agko'!
¡Máxa apqánet wáx'ay la'a
m'a aqta'ák nak!
Kelán'a
16 ¡Aptásók apagko' nak la'a exchep,
sekpagkanma,
aptásók apagko'!
Apkenna'
¡Pa'at ekpayhe ektaqmalma
áwa' sa' katnehek ma'a
negyetnamakxa néten!
17 Yámet élyawe sa' katnehek
éltegyésso m'a enxagkok,
tén sa' yámet ciprés katnehek
ekhéyak nempakxanma m'a néten.
© © Enxet Lengua Sur Bible © Paraguayan Bible Society, 2015.