Elimélec apmahéyak Moab yetlo apketchek
1-2 Wetamaxcheyk axta meyk élnapma énxet'ák ekyókxoho apchókxa Israel, cham'a nano', aptamheykegkaxa axta apkelxegkesso apkeltamheykha Israel ma'a apkelámha apmonye'e nak kempakhakma. Keñe axta xama énxet apkeñama axta m'a Belén nak Judá, apwesey axta Elimélec, apmaheykegko sekxók apheykmo yaqwatakxoho m'a yókxexma Moab. Yetlamchek axta nahan ma'a aptáwa' Noemí, tén han ma'a apqánet apketchek, cham'a Mahlón, tén han ma'a Quilión. Efrata énxet axta nahan xa ekyókxoho nak, apkeleñama nak Belén. Kelweykmek axta m'a yókxexma Moab, tén axta élheykmo m'a.
3 Tén axta apketsapma m'a Elimélec, atáwa' axta m'a Noemí, axakkók axta tamheykekxa', wánxa axta aqsa élxegexma m'a apqánet étchek. 4 Wenaqtémók axta nahan natámen, tén axta élyamhápeykegko nahan xa étchek nak. Apkelmeykegkek axta ánet kelán'a étkók éleñama axta m'a Moab; xama axta ekwesey Orfá, keñe axta mók ekwesey Rut. Weykmek axta diez apyeyam, 5 apkeletsapa nahan xa étchek nak, cham'a Mahlón tén han ma'a Quilión, tén axta ektéma meyke agko' ekyepetchegwánxa m'a Noemí, méko axta aptemék ma'a étchek, tén han atáwa'.
Noemí tén han Rut élmeyeykekxa Belén
6 Xama ekhem axta leg'ak amya'a Noemí, neyseksa ekha m'a yókxexma Moab, apwákxo makham Wesse' egegkok ma'a eyókxa appasmeykxo makham, tén han apheyásekxo makham aptéyak ma'a énxet'ák. 7 Tén axta ekxéna awáxok kataqhohok makham ma'a Judá yetlo m'a étchek axta apnaqteyegka'a, kelántekkek axta m'a yókxexma ekheykegkaxa axta, 8 tén axta Noemí ektáha éláneya náxet ámay xa ánet nak:
Kólmeyekxa sa' makham kélxanák, ekhágkaxa nak kélchána. Eltaqmelchesek sa' eyke chá'a kéxegke m'a Wesse' egegkok, ekhawo sélteméssessamakxa nak chá'a ko'o kéxegke, tén han ma'a étchek axta, 9 egkések sa' nahan kélmowána kóltegyagkokxak makham kélnaqteyegka'a yaqwayam sa' kólwetekxak makham axnagkok meyke ektáhakxa kélwáxok tén han aphaxnagkok kélxanák.
Kelpetseságkokxeyk axta Noemí amonye' éxeykekxa, axta nahan kaleysagkohok éllekxagweyncha'a xa ánet nak, 10 Tén axta ektáha eyáneya s'e:
¡Ma'! ¡Agyetlakxohok sa' eyke negko'o exche' m'a eyókxa nak!
11 Tén axta Noemí ektáha makham éláneya s'e:
—Kóltaqhekxa aqsa. ¿Yaqsa ektáha kélmako nak hélyetlakxoho'? Móteyekxék ko'o kaxwók pók hatte yaqwayam enxoho kóltemekxak makham kélnaqteyegka'a kéxegke. 12 Nók, kólxeg, kólmeyekxa m'a kélxanák. Sekwányamók ko'o kaxwók ektáhak, mowanchek kaxwók ategyekxak etáwa'. Naqsók eykhe ewanchek makham ategyekxak etáwa', hélyamhápok so axta'a nak, tén óteyekxak makham pók étchek. 13 ¿Kólleyxek enxeykel'a kéxegke ekwokmoho aptamhágko apkelwányam, yaqwayam enxoho kóltemekxak makham kélnaqteyegka'a? ¿Megkóltegyekxéya kélnaqteyegka'a kólleyxek? Ma', kelán'a ahagkok, megkóltéhek xa ektáha nak. Egkéssegkek ko'o ekmáske agko' seklegeykegkoho m'a Wesse' egegkok, kayágwomhok sa' aqsa eklegeykegkoho ekmáske ewáxok sekwet'a enxoho kóllegagkohok kéxegke.
14 Kelchempákxók axta makham éllekxagweykha m'a. Tén axta Orfá ekpetsesa yepyámog ektaqhákxo m'a axagkok; keñe Rut, ekhákxoho makham xamo'. 15 Tén axta ektáha eyáneya Noemí s'e:
—Kalano, taqháwok makham yepye axta aptáwa' m'a eyókxa, ekheykegkaxa nak ma'a aqsok eyáyókxa. Kaxeg xeyáxa, keytlakxa', —axta entáhak eyáneya.
16 Tén axta Rut ektáha eyátegmowágkokxo s'e:
—¡Nágkaltamho aqsa ayenyók xeye', tén han óxpánchesaxche'! Amhagkok sa' chá'a ko'óxa m'a ekmahágkaxa enxoho chá'a, axnamok sa' nahan chá'a m'a ekhámxa enxoho chá'a. Seyókxa sa' nahan atnehek ma'a eyókxa nak, Dios ahagkok sa' nahan atnehek ma'a Dios agkok nak xeye'. 17 Watsapwók sa' nahan ma'a étsapwánxa enxoho exche', sa' émenyeyk han hélátawañegwók ma'a. Hakte heñássesagkohok katnehek ko'o Wesse' egegkok ekyentaxno agko' sekyenyawa enxoho exche', megkatnaha enxoho seyenyókasso m'a nétsapma.
18 Xama axta ekwet'a ekmako aqsa chá'a katneykha ekxegexma Noemí m'a Rut, massék axta élenxanakmo eyápháseyncha'a. 19 Tén axta élxega ánet ekwokmoho élwákxo m'a Belén.
Xama axta élántaxnegwákxo m'a Belén, kelpelakkassek axta apkelwet'a m'a apyókxoho énxet, apyennegkessek axta exma apkelpaqmeta apkelwet'a. Keñe kelán'ák ektáha chá'a élpaqmeta s'e:
—¿Háweya Noemí xa?
20 Tén axta Noemí ektáha élátegmowágkokxo s'e:
—Náhelteme ko'o kaxwók Noemí, hélteme kaxwók Mará, hakte egkéssegkek ko'o ekwányam agko' seklegeykegkoho ekmáske m'a Dios ekha nak apyennaqte. 21 Xámok axta ko'o aqsok ahagkok sekteyapma s'e, keñe kaxwók sekwa'akto meyke aqsok ahagkok, hakte chá'a apkeltémo ko'o hetnehek ma'a Wesse' egegkok. ¿Yaqsa ektáha séltáha nak ko'o Noemí? Etaqnawágweykmek ko'o kaxwók ma'a Dios ekha nak apyennaqte, egkéssegkek ekyaqhápeykha ewáxok.
22 Axta temék éxyékmo makham Noemí eñama m'a yókxexma Moab yetlo m'a Rut, atánegken ekteme axta Moab kelán'a. Chaqhémók axta nahan élweykto Belén ma'a ekhem eyeynamókxa axta chá'a apnakxamákpexa m'a hótáhap apaktek.
© © Enxet Lengua Sur Bible © Paraguayan Bible Society, 2015.