1 ¿Yaqsa aqsok kagkések kéxegke eñama kélteme judío essenhan ekha enxoho kélyenyekhássesso nekha kélyempehek? 2 Xámók aqsok, xamók agko' chá'a katnehek éñamakxa ekpasmo. Amonye', apméssegkek axta appeywa Dios ma'a judíos. 3 Apkelyenseykmek axta Dios nápakha xa énxet'ák nak ¿Háxko sa' etnehek Dios? ¿Ekxáya sa'? 4 Ma', mekxáyhe'. Naqsók eyke chá'a katnehek aptémakxa appeywa m'a Dios, apkelmopwancha'a amya'a eykhe m'a apyókxoho énxet'ák; hakte temék eknaqtáxésamaxche weykcha'áhak se'e:
“Exénakpok sa' xép apteme
ekpéwomo aptémakxa
eñama m'a ektémakxa nak
chá'a appeywa,
emallánek sa' nahan xép ma'a
élánéxko enxoho amya'a.”
5 Awanchek agkok henxekmósek negko'o nentémakxa ekmaso, apteme ekpéwomo aptémakxa m'a Dios, ¿háxko sa' antéhek nempeywa? ¿Anxéneya sa' Dios megkapéwomo aptémakxa m'a senlegassásegkoho enxoho? (Ektemék ko'o sekpeywa m'a ektémakxal'a chá'a apkelpeywa énxet). 6 Ma', manxéne'. Kaxtemék axta megkapéwomo aptémakxa Dios, ¿háxko axta etnehek yepwának elyekpelkohok énxet'ák apheykha nak keso náxop?
7 Yánchásegkók agkok ko'o ektémakxa nak sekmowána amya'a m'a ekmámnaqsoho eñama nak Dios, kayánchesagkok nahan ma'a apcheymákpoho nak, ¿yaqsa eyke ektéma sélteméssessama ko'o sélyekpelchémo m'a kélteméssessamakxal'a mey'assáxma? 8 ¿Yaqsa eyke ektéma manláneykegko nak aqsok ekmaso yaqwayam enxoho kawak ma'a aqsok ektaqmela? Cháxa sexeyenma nak chá'a ko'o nápakha énxet sélxekmóssama xa, yaqwayam enxoho hexénmakha aqsa chá'a ekmaso; payhawók eyke kóllegássesagkohok xa aptéma nak énxet'ák.
Negyókxoho ekha mólya'assáxma
9 ¿Yaqsa eyke ekyetnama negko'o nenteme nak judíos senteméssessama maghémo m'a metnaha nak judíos? ¡Méko! Hakte nenxekmóssegkek negko'o ekteme naqsók sẽlmoma negyókxoho m'a mólya'assáxma, cham'a judíos nak, tén han ma'a metnaha nak judíos. 10 Hakte temék eknaqtáxésamaxche s'e:
“¡Méko xama enxoho apteme
ekpéwomo aptémakxa!
11 Méko xama enxoho
ekha apya'áseyak;
méko xama enxoho
apketamso Dios.
12 Apyókxoho apkelyetleykekxak
ma'a eyesagkexa nak;
apyókxoho
apnaqtawásamákpok.
¡Méko xama enxoho
apkelane aqsok ektaqmela!
¡Méko xama enxoho!
13 Máxa takhaxpop
megkólápeykekxa átog ma'a
apatña'ák nak,
ekmowána amya'a nahan ma'a
apkelxeyenma nak,
máxa nahan yéwa
ekmáskel'a hentakxek ma'a
apkelpeywa nak.
14 Láneyók nahan apatña'ák ma'a
aptakneyeykegkoho nak pók,
tén han megyésso ellók.
15 Yahamók nahan chá'a
emáwhok yaqhek pók
16 enaqtawasha chá'a aqsok
ma'a apkelmahágkaxa
enxoho chá'a,
meyke aqsok chá'a
etnéssásekxa',
17 melya'ásegkok nahan ma'a
ekyetnamakxa nak meyke
ektáhakxa egwáxok.
18 Megkaxének nahan apkelwáxok
eyéméxko yeyk ma'a Dios.”
19 Negya'ásegkók negko'o ekyókxoho ektémakxa nak ekxeyenma segánamakxa, apmopwána aqsa chá'a elmaha m'a apkelánémap nak chá'a elmaha, yaqwayam enxoho melxénmakha chá'a meyke apkeltémakxa apyókxoho énxet, keñe sa' apyókxoho énxet elyekpelchágwók apteme apkelsexnánémap nápaqtók Dios, 20 hakte méko sa' kawának kaxének élane m'a segánamakxa nak tén han kának exének Dios ekteme ekpéwomo ektémakxa, hakte wánxa eyke aqsa ekteme segya'assásegwayam negko'o nenteme mólya'assáxma m'a segánamakxa nak.
Nélwagkásamáxche teyp eñama magya'ásseyam
21 Keñe kaxwo', senxekmóssama negko'o Dios senxeyenma nenteme ekpéwomo nentémakxa meyke m'a segánamakxa, ekxeyenma agko' nahan ma'a segánamakxa nak tén han Dios appeywa apkellegasso. 22 Melya'ásseyam Jesucristo chá'a keñamak apteméssessama Dios ekpéwomo apkeltémakxa m'a ektáha nak chá'a melya'ásseyam. Hakte méko apyeykhamap pók; 23 apyókxoho apkeláneykegkok mólya'assáxma, teyépek nahan apheykegkaxa m'a Dios ekha nak apcheymákpoho. 24 Apteméssessegkek eyke aqsa Dios ekpéwomo apkeltémakxa meyke ekyánmaga eñama ektaqmeleykha apwáxok apkelányo, apkelmallahanchessama axta m'a élmoma axta, eñama m'a Cristo Jesús. 25 Apteméssessegkek axta Dios Cristo yaqwayam etnehek apmassésso mólya'assáxma, cham'a apyegkenma axta éma apagkok. Magya'ásseyam akke aqsa chá'a hegwetaksohok xa megkólyaqmagkáseykekxa nak nentémakxa. Cháxa aptémakxa axta Dios apmáheyo henxekmósek ektémakxa senteméssesso ekpéwomo nentémakxa, meyaqmagkáseykekxa nentémakxa mólya'assáxma nenlane axta m'a nanók axta, 26 hakte apkelenmáxamákpók aqsa m'a nentémakxa. Apmáheyók henxekmósek negko'o ektémakxa senteméssessama ekpéwomo nentémakxa s'e kaxwo' nak, hakte cham'a aptémakxa nak apteme ekpéwomo aptémakxa, teméssessegkek chá'a ekpéwomo apkeltémakxa m'a apteme nak chá'a melya'ásseyam Jesús.
27 ¿Háxko ekyetnámxa kaxwók ektémakxa nak eyeymáxkoho apwáxok énxet nápaqtók Dios? Kélmassésseykmek kaxwo'. ¿Yaqsa ektéma? Háwe eñama apkeláneyak ma'a éltémókxa nak antéhek segánamakxa, akke m'a aptamhéyak nak melya'ásseyam. 28 Cháxa keñamak negya'ásegweykmo nak negko'o apxeyenma Dios apteme apkelpéwomo m'a énxet'ák eñama melya'ásseyam, háwe eñama apkeláneyak ma'a éltémókxa nak antéhek segánamakxa.
29 ¿Wánxa enxeykel'a judíos Dios apagkok ma'a Dios? ¿Háweya nahan Dios apagkok ma'a apyókxoho pók aptémakxa nak énxet'ák? Neykhe anhan Dios apagkok ma'a apyókxoho pók aptémakxa énxet'ák nak, 30 hakte Dios aqsa apteme wánxa xama; cham'a Dios apteméssessamól'a ekpéwomo apkeltémakxa m'a ekha nak melya'ásseyam, meyke apkelányo m'a ekha nak kélyenyekhássesso nekha apyempehek essenhan ma'a meyke nak. 31 ¿Magya'ásseyamya keñamak nentemessáseykekxo chá'a negko'o mékoho m'a segánamakxa nak? Ma', nenxeyenmeyk eyke chá'a negko'o ekteme naqsók agko' ma'a éltémókxa nak antéhek segánamakxa.
© © Enxet Lengua Sur Bible © Paraguayan Bible Society, 2015.