1 Élyáxeg, amenyeyk ko'o ewáxok tén han sélmaxnagko Dios kawakxohok apkelwagkásamap teyp ma'a israelitas. 2 Ewanchek ko'o axének ekyetnama ekyawe agko' apkelmopmenyého elanagkok apmopmenyého nak ma'a Dios; makke yaqhémók ma'a ektémakxa nak ekmámnaqsoho apkelya'áseykegkoho. 3 Hakte melya'áseykegkok apteme chá'a Dios apteméssesso ekpéwomo apkeltémakxa m'a énxet'ák, apmenyeyk aqsa chá'a elteméssesakpohok apagko' ekpéwomo apkeltémakxa; cháxa keñamak melyaheykekxoho nak chá'a m'a sempekkenchessama axta Dios yaqwayam henteméssesek ekpéwomo nentémakxa. 4 Hakte Cristo apteméssesso néxa m'a segánamakxa, yaqwayam enxoho kólteméssesek apkelpéwomo apyókxoho énxet eñama melya'ásseyam.
5 Axta aptemék aptáxéssama Moisés apxeyenma senteméssesso nak ekpéwomo nentémakxa nenlane m'a segánamakxa nak: “Énxet apkelane nak ektémakxa m'a segánamakxa, exkak sa' ekyennaqte apnények.” 6 Keñe m'a sẽlteméssesso nak ekpéwomo nentémakxa eñama magya'ásseyam, katnehek chá'a amya'a kaxénaxchek se'e: “Nágkatne élchetamso apwáxok se'e: ‘¿Yaqsa sa' kamhagkok néten?’ —cháxa néltémo eweywenták Cristo xa—; 7 essenhan ‘¿Yaqsa sa' katxek ma'a élmaheykegkaxa nak eghagák?’” —cháxa néltémo éphagwaták Cristo apkeñama nepyeseksa m'a apkeletsapma nak. 8 ¿Yaqsa axta ekxénamaxko xa?: “Ketók ekyetnamakxa aphakxa exchep ma'a Dios appeywa, yetnók ma'a apátog nak tén han ma'a apwáxok.” Cháxa amya'a magya'ásseyam nenlegassama nak chá'a negko'o xa. 9 Apxénchek agkok xép Jesús apteme Wesse' apagkok, tén han megkay'ásseykmo enxoho apwáxok apxátekhásseykmo m'a Dios, ewagkasakpok sa' teyp. 10 Hakte megkay'ásseyam nak egwáxok, henxének chá'a Dios nenteme ekpéwomo nentémakxa, keñe m'a nenxeyenma nak negya'áseykegkoho Jesucristo, cháxa ekteme nélwagkásamáxche teyp xa.
11 Temék eknaqtáxésamaxche s'e: “Énxet mey'ásseyam enxoho m'a Cristo, megkatnehek sa' eyaqhémo apteme mey'ásseyam.” 12 Méko apyeykhamap pók ma'a énxet'ák, cham'a judíos nak tén han ma'a metnaha nak judíos; hakte wánxa xama Wesse' egegkok, cham'a Wesse' apagkok nak apyókxoho énxet, appasmomól'a chá'a yetlo memyágweykekxa aqsok ma'a apyókxoho ektáha nak chá'a apkelwóneykha apwesey. 13 Hakte keso ektémakxa nak eknaqtáxésamaxche appeywa s'e: “Apyókxoho énxet ektáha nak chá'a apkelwóneykha apwesey, elwagkasakpok sa' teyp.” 14 ¿Háxko eyke katnehek elwónmakha apwesey metnama enxoho makham melya'ásseyam? ¿Háxko eyke katnehek etnahagkok melya'ásseyam, mellegaya enxoho makham kóllegaksek ma'a apwesey? ¿Háxko eyke katnehek ellega', méko enxoho éltennáseykencha'a m'a amya'a eñama nak Dios? 15 ¿Háxko eyke katnehek eltennaha amya'a, megkatnaha enxoho apkeláphásamap? Ekhawo ektémakxa nak ekxeyenma ektáxésamaxche s'e: “¡Tásók agko' nak la'a agwetak elwak ma'a apkelsáyam nak amya'a ektaqmela!”
16 Háwe eyke apyókxoho énxet apkelma takha' m'a amya'a ektaqmela. Ekhawo ektémakxa axta apxeyenma Isaías: “Wesse', ¿yaqsa megkay'ásseykmo eklegaya m'a amya'a néltenneykha nak negko'o?” 17 Nenlege amya'a keñamak nenteme magya'ásseyam, Cristo appeywa nahan keñamak ma'a amya'a nak.
18 Akke ektáhak ko'o sélmaxneyeykha s'e: ¿Enxeykel'a ellegeyk amya'a énxet'ák? ¡Apkellegaye'! Hakte temék eknaqtáxésamaxche s'e:
“Sawheykekxók axta ekyókxoho
yókxexma apkelpeywa xa
énxet'ák nak,
weykmók axta apkelpeywa
m'a néxa xapop nak
keso nélwanmégkaxa.”
19 Axta ektáhak makham sélmaxneyáncha'a s'e: ¿Enxeykel'a elya'áseykegkok énxet'ák Israel xa? Axta aptemék sekxo' appeywa Moisés se'e:
“Wának sa' ko'o
kólnathak kéxegke m'a
pók énxet'ák mékoho nak;
wának sa' ko'o kóltaqnaweygkok
kéxegke m'a énxet
melya'áseyak nak aqsok.”
20 Keñe axta Isaías megyéseykekxo aptéma appeywa s'e:
“Éteyeykekxeyk axta ko'o m'a
énxet'ák mehektamsama axta;
ekxekmowásamáxkók
axta nahan ma'a
metegyeykencha'a axta
sekwesey.”
21 Keñe axta apkelxeyenma israelitas, aptéma appeywa Isaías se'e: “Yókxoho ekhem axta ko'o sélhaxanma m'a énxet'ák meyke nak sélyaheykekxoho, tén han sénmexeykekxa nak chá'a.”
© © Enxet Lengua Sur Bible © Paraguayan Bible Society, 2015.