Ektémakxa kélpeykessamo néten
1 Énmexawók axta ko'o néten natámen xa, keñe sekwet'a ekmayhékxo átog ma'a néten; máxa axta kélaqkahasso ekpáwà m'a sekleg'a axta émha amonye' kélpeywa, axta táhak amya'a seyáneyáxko s'e: “Yenátwata s'e, axekmósek sa' xép aqsok peya nak katnehek natámen xa.”
2 Yetlókok axta apma sekwanmagko Espíritu, ekwet'ak axta ekyetna taháno ektaqmalma m'a néten, ekwet'ak axta han apha énxet ma'a néten taháno nak. 3 Máxa axta meteymog ektaqmalma ekyennaqte agko' la'a m'a ektáha axta apha néten taháno ektaqmalma, máxa axta m'a meteymog ekyexwasél'a, keñe axta m'a neyáwa taháno ektaqmalma apyetnama pemhet, hó pa'at axta apchápogwate ektémól'a meteymog hó pa'at la'a. 4 Ekwet'ak axta han ko'o veinticuatro taháno éltaqmela yetlo apheykha néten veinticuatro apkelámha apmonye'e neyáwa xa taháno ektaqmalma nak: apkelmope axta apkelántaxno, sawo ekyátekto ekmomnáwa axta han ma'a apkelatchesso apqatkók. 5 Tekkek axta chá'a élyenma ekyetnakxa m'a taháno ektaqmalma nak, tekkek axta han chá'a kélpeywa, tén han ekho takha' appáwà, keláléwágkek axta anhan siete táxa amonye' ekhágkaxa xa taháno nak. Siete espíritus apkeleñama Dios axta m'a. 6 Máxa axta anhan wátsam ekwányam ekyetna amonye' xa taháno ektaqmalma nak, máxa axta aqsok élyenmál'a.
Ekwet'ak axta han ko'o cuatro aqsok ekha élennama neyseksa xa taháno nak, tén han ma'a neyáwa', sawheykekxók axta kélaqta'ák ma'a agkenya'ák, ekweykekxoho m'a akpa'ák. 7 Máxa axta méwa m'a sekwet'a axta sekxo', keñe m'a mók ekhawo m'a weyke kennawókla'a, keñe axta mók ekhawo énxet, keñe axta mók ekhawo m'a ektémól'a náta ekyawe kampaha. 8 Seis axta chá'a axempenák xama xa cuatro aqsok ekha nak élennama, sawheykekxók axta kélaqta'ák ma'a ekyókxoho émpe'ék, tén han ma'a kañe' awáxok. Yókxoho ekhem, tén han yókxoho axta'a axta chá'a megkalwátésseyam ekteme élpeywa s'e:
“¡Aptaqmalma, aptaqmalma,
aptaqmalma Wesse' egegkok
Dios ekha apyennaqte,
cham'a aphama axta nano',
keso apha nak makham kaxwo' nak,
cham'a peya nak han ewata'!”
9-10 Kelteméssessek agkok chá'a apcheymákpoho Dios xa aqsok ekha nak élennama, tén han élteméssesa enxoho eyáyo Dios, tén han élmésa enxoho élpayheykekxa awáxok ma'a apha nak néten aptaháno ektaqmalma, cham'a apha nak han megkatnégwayam néxa', keñe chá'a eltekxeyagkok aptapnák nápaqtók Dios ma'a veinticuatro apkelámha apmonye'e nak, elpeykeshok chá'a, ekxeygkok chá'a apkelatchesso apqatkok éltaqmela apmonye' m'a Dios, etnehek chá'a apkelpeywa s'e:
11 “Payhawók kólteméssesek
xép apcheymákpoho,
Wesse' egegkok Dios,
tén han kóltéhek kéláyo,
payhawók nahan keytek
ma'a apmopwána,
hakte apkeláneyak axta
exchep ekyókxoho aqsok;
xép apmopmenyého axta keñamak
ekheykegko ekyókxoho aqsok,
tén han élánamáxko.”
© © Enxet Lengua Sur Bible © Paraguayan Bible Society, 2015.