¡Wesse' egegkok apteme néten ekyókxoho aqsok!
1 ¡Kólmeneykmásses
Wesse' egegkok,
axnagkok negmeneykmasso,
hakte apkeláneyak ma'a
aqsok sempelakkasso
nak agweta'!
¡Apmallanegkek yetlo
ekyawe agko' apmopwána,
tén han apyennaqte
ekteme nak ekpagkanamaxche'!
2 Apkellegassegkek
Wesse' egegkok ma'a
ektémakxa apmallanma,
apxekmóssegkek
aptémakxa ekpéwomo
nápaqta'awók apyókxoho
énxet'ák nak keso náxop;
3 megkalwagqeykmok
apkelásekhayo
tén han melyenyaweykha
m'a énxet'ák Israel.
¡Weykmók néxa xapop
apkelwete énxet'ák
apmallanma m'a Dios egagkok!
4 Kólmeneykmásses
Dios kélyókxoho
kélheykha nak keso náxop
yetlo ekpayheykekxa kélwáxok;
kalpayhekxoho agko' kélwáxok,
kólmeneykmásses negmeneykmasso.
5 Kólmeneykmásses
negmeneykmasso
Wesse' egegkok,
yetlo kélpáwasso arpa,
tén han ma'a yát'axpog.
6 Kólmeneykmés yetlo
ekpayheykekxa kélwáxok,
nápaqto' Wesse' egegkok,
apteme nak Wesse' Apwányam,
yetlo kélpáwasso kélaqkahasso.
7 Kaxtegyow
wátsam ekwányam,
tén han ekyókxoho aqsok
ekhéyak nak kañe',
tén han ma'a
ekyókxoho nélwanmeygkaxa',
yetlo m'a apheykha nak awáxok;
8 wátsam,
kóltekpogmakha kélmék;
egkexe,
kólyepetchekxa kélmók,
kólwehesha kólátsaha
9 nápaqtók Wesse' egegkok,
apxegakmo nak yaqwayam etnehek
wesse' apwányam keso náxop.
Elanha sa' apyókxoho énxet'ák
keso nélwanmeygkaxa',
yetlo ekpéwomo aptémakxa,
meyke ekyeykhamaxche mók.
© © Enxet Lengua Sur Bible © Paraguayan Bible Society, 2015.