¡Wesse' egegkok apteme Wesse' Apwányam!
1 ¡Kalpayhekxa kélwáxok
kélyókxoho kélheykha
nak keso náxop!
¡Kalpayhekxa kélwáxok
kélheykha nak ekyókxoho
egkexe étkók!
¡Wesse' egegkok apteme
Wesse' Apwányam!
2 Wakhayak ma'a
yaphope ekyentaxno;
appekkenmeyk
apkelánekxésso
ektaqmalma apheykha
énxet'ák ma'a
aptémakxa nak
wesse' apwányam,
tén han ekpéwomo agko';
3 xegamchek táxa
eyáléwe m'a apmonye',
kalwatnek chá'a m'a
apkelenmexma
apheykha nak nepyáwa'.
4 Kaltátchesek chá'a
nélwanmeygkaxa m'a
élyenma apagkok nak;
¡kalpexyennók chá'a
xapop ekwet'a enxoho!
5 Máxa pápa' chá'a
katnehek kalpayhekxak
nápaqtók Wesse' egegkok
ma'a meteymog
élwenaqte nak,
nápaqtók ma'a
apagkok nak
ekyókxoho keso náxop.
6 Kaxének chá'a néten
ma'a aptémakxa ekpéwomo;
apyókxoho énxet'ák chá'a
elwetak apcheymákpoho.
7 Apkelmegqágwákxók
ma'a apkelpeykessamo nak
chá'a kéleykmássesso,
eyaqheykencha'a nak
chá'a apkelwáxok ma'a.
¡Kelháxahágkek apmonye'
m'a ekyókxoho aqsok
ekha nak élmowancha'a!
8 Oh Wesse',
kelpayhekxeyk agko'
apkelwáxok ma'a
apheykha nak Sión,
tén han ma'a tegma
apkelyawe nak Judá,
eñama m'a apkeltémókxa
nak chá'a etnahagkok;
9 hakte xép Wesse',
meyke nak ekhémo,
apteme néten ma'a
ekyókxoho aqsok
nak keso náxop,
tén han apteme
néten agko' neyseksa
m'a ekyókxoho aqsok
ekha nak élmowancha'a.
10 Yásekhohok
Wesse' egegkok
ma'a aptaqnagko
nak aqsok ekmaso;
emyók han chá'a m'a
melyenseyam nak
chá'a apkelyetleykha;
megyohok chá'a emok
ma'a élmasagcha'a
nak apkeltémakxa.
11 Kalsássesek chá'a
élseyéxma m'a énxet
ektaqmalma nak aptémakxa;
keñe chá'a ekpayheykekxa
egwáxok ma'a énxet'ák
meyke nak apkeltémakxa.
12 ¡Kalpayhekxa kélwáxok
eñama Wesse' egegkok,
kéxegke éltaqmalma
nak kéltémakxa,
kólpeykesho m'a apwesey
ekpagkanamaxche nak!
© © Enxet Lengua Sur Bible © Paraguayan Bible Society, 2015.