Axnagkok negmeneykmássesso Wesse' egegkok
(1 Cr 16.23-33)1 Kólmeneykmásses
Wesse' egegkok,
axnagkok negmeneykmasso;
kólmeneykmásses
Wesse' egegkok,
kélyókxoho kélheykha
nak keso náxop;
2 kólmeneykmásses
Wesse' egegkok,
kaltaqmalma kélpeywa
kólxének apwesey;
kólxén chá'a yókxoho
ekhem apteme
segwagkasso teyp.
3 Kólxén ektémakxa
apcheymákpoho
tén han ektémakxa aqsok
sempelakkasso agwetak
apkelane nápaqta'awók
ma'a apyókxoho énxet'ák,
tén han ekyókxoho yókxexma,
4 hakte Wesse' egegkok
apteme apwányam apagko',
payhawók ólteméssesek
apcheymákpoho,
¡apcheymáp nahan
neyseksa m'a
ekyókxoho aqsok
ekha nak élmowancha'a!
5 Mékoho m'a aqsok
apcháyókxa nak
chá'a pók énxet'ák,
Wesse' egegkok axta
eyke apkelane néten.
6 ¡Yetnegkek ekyawe agko'
élyenma m'a aphakxa nak!
¡Yetnegkek apmopwána,
tén han ektaqmalma m'a tegma
appagkanamap apagkok nak!
7 Kóltemésses
apcheymákpoho
Wesse' egegkok,
énxet'ák yetlo kélnámakkok,
kóltemésses nahan ekha
eyeymáxkoho m'a ektémakxa
nak apmopwána
Wesse' egegkok;
8 kólteme kéláyo
Wesse' egegkok,
ekpayhawo nak
kólteméssesek;
kólántaxnegwakxa m'a
kañe' apxagkok nak
yetlo kélseykekxa
aqsok kélmésso naqsa.
9 Kólpeykesho
Wesse' egegkok ma'a
kañe' tegma appagkanamap
apagkok aptaqmalma.
¡Apyókxoho énxet'ák sa'
elpexyennók apmonye'!
10 Kólteme sa' kólának
pók aptémakxa énxet'ák se'e:
“¡Wesse' egegkok apteme
Wesse' apwányam!”
Apyennaqtéssamók axta
appekkenma nélwanmeygkaxa,
yaqwayam enxoho
megkayawheykha;
aphéssamók han mók
apkeltaqmelchesso
m'a énxet'ák.
11 ¡Kalpayhekxa
kélwáxok énxet'ák
kélheykha nak néten
tén han kélheykha
nak keso náxop!
¡Kapáwa awáxok
wátsam ekwányam,
tén han ekyókxoho
aqsok ekhéyak
nak ma'a kañe'!
12 ¡Kapayhekxa
awáxok yókxexma,
tén han ma'a ekyókxoho
élleykha nak awáxok!
¡Kólwehesha
kólátsaha yenta'a
élyawe élámha nak naxma,
13 nápaqtók Wesse' egegkok
apxegakmo nak!
¡Naqso', apxegakmek
yaqwayam etnehek
wesse' apwányam keso náxop,
elanha sa' énxet'ák
keso nélwanmeygkaxa,
yetlo ekpéwomo aptémakxa,
tén han ekmámnaqsoho'.
© © Enxet Lengua Sur Bible © Paraguayan Bible Society, 2015.