LIBRO 4
Dios tén han énxet
1 Wesse',
xép apteme chá'a
negyexánegweykekxexa.
2 Xép apteme Dios
eyeynamo m'a
nanók agko' axta,
meláneykxa axta
makham ma'a egkexe,
tén han xapop,
tén han keso nélwanmeygkaxa,
etnehek sa' eyke chá'a
Dios meyke néxa.
3 Yának chá'a
etnekxak xapop énxet
etnehek appeywa s'e:
“Énxet'ák, kóltemekxa xapop.”
4 Máxa xama ekhem
agko' xép elanok
ma'a mil apyeyam,
ekyeyk'a enxoho hemaxta.
¡Máxa ekmanyehel'a
kaxog hora axta'a!
5 Emasséssók chá'a
ekmanyehe agko'
ma'a énxet'ák,
ektémól'a agwetak
negwanmagko.
6 Máxa m'a pa'at
ekteyapmal'a,
kalyapwak axto'o,
keñe taxnám kalayósek
kaletsapok han.
7 Naqsók
hegmasséssamhok
ma'a aplo nak,
¡mehegya'ássesagkek
nentáhakxa!
8 Yáxña'akxoho
keytnekxak nápaqtók
xép mólya'assáxma,
tén han nentémakxa ekmaso.
9 Kamassegwók
chá'a negko'o
negweynchámeykha,
eñama exchep sentaqnagko;
yahamok han chá'a
kaxog apyeyam negha,
ektémól'a xama
nentekkesso nennama.
10 Setenta apyeyam aqsa
chá'a kammok negha;
keñe m'a apkelyennaqte nak,
ochenta apyeyam aqsa
chá'a néxa apheykha;
kaqhok eyke kaqheykha
egwáxok anxek ekwenaqte,
wánxa aqsa agwetak ma'a
nélya'ásamaxche' exma,
tén han nentamheykha ekyentaxno.
¡Yahamok exog apyeyam,
ekhawo nak han negko'óxa'!
11 ¿Yaqsa ekya'ásegkoho
m'a aplo ekyennaqte nak?
¿Yaqsa ekweteya m'a aplo?
12 Hegya'assásegwom
negko'o ekyaqwátawo negheykha,
yaqwayam sa' negko'o antéhek
negya'áseykegkoho aqsok.
13 Wesse', ¡henlano
makham negko'o!
¿Háxko sa'
ekwánxa nélhaxanma?
¡Hẽlayósho negko'o henlano'
nentáha nak xép apkeláneykha!
14 Hegyánchessesho
negko'o segmésso
segásekhayo
yókxoho axto'o,
ólmeneykmaksek sa'
chá'a negko'o yetlo
élpayheykekxa egwáxok
neyseksók negheykha.
15 Hegmés negko'o
apxámokma apyeyam
élpayheykekxa egwáxok,
ekhawo apwánxa axta
apyeyam néllegeykegkoho
ekyentaxnamo egwáxok.
16 ¡Yána elwetak
apkeláneykha m'a
aqsok apkelane,
keñe apcheymákpoho m'a
aptawán'ák neptámen nak!
17 Keytek sa'
chá'a negko'o
tekhenxet ma'a Dios
Wesse' egegkok segásekhayo.
¡Wesse', hentekkesses
chá'a negko'o nentamheykha,
¡Naqso', hentekkesses
chá'a nentamheykha!
© © Enxet Lengua Sur Bible © Paraguayan Bible Society, 2015.