¡Dios, hẽlwagkas makham negko'o teyp!
1 Wesse', tásek xép
apteméssessamakxa
s'e apchókxa nak;
aptaqmelchessásekxeyk
makham apheykha m'a
Jacob énxet'ák apagkok;
2 meyaqmagkáseykekxak
apkeltémakxa ekmaso
énxet'ák apagkok,
tén han ekyókxoho
melya'assáxma nak;
3 Apkelwátessamók agko' aplo,
tén han apkeltaqnawéyak
énxet'ák apagkok.
4 Dios,
Sẽlwagkasso nak teyp,
¡hẽlwagkas makham
negko'o teyp,
ná elenxanmagkoho
sẽltaqnawéyak!
5 ¿Megkamassegwomeya
sa' sẽltaqnawéyak negko'o?
¿Megkatnégwomeya
sa' néxa aplo?
6 ¿Mehẽlmeyásekxeya sa'
makham negko'o nélyennaqte,
yaqwayam sa' kalpayhekxak
negko'o egwáxok,
nentáha nak énxet'ák apagkok
eñama exchep?
7 Oh Wesse',
¡henxekmós
negko'o sẽlásekhayo,
hẽlwagkas han teyp!
8 Weyxhok sa' ko'o
peya nak exének
Wesse' egegkok;
hakte exének sa'
egkések meyke
ektáhakxa apheykha
m'a énxet'ák apagkok,
cham'a ektáha nak chá'a
melyenseyam apkelyetleykha,
melánegkokxo enxoho
makham apkeltémakxa
élyeyháxma.
9 Yahamok chá'a
elwagkasek teyp
Dios ma'a ektáha
nak chá'a apcháyo;
keytek sa' chá'a
apcheymákpoho s'e
negheykegkaxa nak.
10 Keypetchekxak
sa' segásekhayo
m'a ektémakxa nak
mehegyenyaweykha,
kapathétekxak sa'
mók ma'a meyke
ektáhakxa nak negha,
tén han ekpéwomo
nentémakxa,
11 katyapok sa' aqsok
ekmámnaqsoho
keso náxop,
keñe sa' ma'a
ekpéwomo nentémakxa
eñama nak Dios,
kanmexentámhok náxop,
ekyetnamakxa nak néten.
12 Wesse' egegkok
apagko' sa' nahan
hegmések aqsok éltaqmalma,
keyxnések sa' aqsok
negkeneykekxa m'a xapop.
13 Nentémakxa
ekpéwomo sa'
kaxog apmonye',
kalanaksek sa'
ámay apagkok.
© © Enxet Lengua Sur Bible © Paraguayan Bible Society, 2015.