Éllekxagwomáxche eñama kélmassésseyam Jerusalén
1 ¡Oh Dios,
apkelántaxnegwa'ak
xapop apagkok ma'a
melya'áseyak nak xép!
¡Aptawáseyha m'a tegma
appagkanamap apagkok,
nápakha'a apketkók
aptemessásekxak
ma'a Jerusalén!
2 ¡Apméssek yaqwayam
etawagkok máma m'a
apkeláneykha aphopák,
melyenseyam axta
chá'a apkelyetleykha,
tén han aqsok nawha'ák!
3 Máxa yegmen
aptemessásak
apyegkenchesa éma
apagkok ma'a ekyókxoho
kañe' nak Jerusalén,
méko han élátawaña.
4 Ẽlya'ásseykmek chá'a
negko'o m'a apheykha
nak neyáwa negókxa;
ẽlasméssegkek ma'a
segwakhaya nak,
ẽlxéneykha nahan
chá'a ekmaso.
5 Wesse' egegkok,
¿yaqsa sa' ekhem
elwataksek sẽltaqnawéyak?
¿Megkamassegwomeya
sa' aplo ektémól'a táxa?
6 ¡Eyenyenta aplo
neyseksa apchókxa m'a
melpeykessamo nak chá'a exchep,
mey'áseykegko nak xép,
tén han mewóneykencha'a nak chá'a.
7 Hakte apmassésseykmek
Jacob ma'a,
ekmaso aptemessáseykekxak
ma'a apchókxa'.
8 Nágyána aqsa
hempehewakxak
negko'o apkeltémakxa
ekmaso axta m'a
ẽlyapmeyk nano';
¡kapyósho henlanok
negko'o s'e kaxwo' nak,
hakte nélyelqáxche'!
9 Oh Dios,
Sẽlwagkasso nak
chá'a teyp negko'o,
¡hempásem,
hẽlmallahanches
aqsok ekmaso,
ná eyaqmagkásekxa
mólya'assáxma,
¡eñama apkelmeyeykha
apwesey eyeymáxkoho!
10 Nágyoho etnehek
apkelpeywa m'a
pók énxet'ák nak:
“¿Háxko aphakxa Dios apagkok?”
¡Hégho negko'o anlanha
aphéssessamo mók
apkeletsapma m'a apkeláneykha!
¡Keñe sa' elya'asagkohok han ma'a
melpeykessamo nak chá'a exchep!
11 Yeyxho apkelápentegeykha
ekmáske m'a apkelmomap nak,
elwagkas teyp
yetlo ekyawe agko'
apmopwána m'a
apkelxénamap nak etekyewekxa'.
12 Oh Wesse',
eyaqmagkásekxa sa'
senteméssessamakxa
negko'o m'a apheykha
nak negyáwa',
ekweykmoho siete,
eñama aptaqnaweykha
chá'a exchep;
13 keñe sa' negko'o
nenteme nak
énxet'ák apagkok,
nenteme nak nepkések
apkelleykha yókxexma apagkok,
agmések sa' chá'a
ekxeyenma egwáxok xép,
¡agmeneykmássesek
sa' chá'a negko'o
negmeneykmasso,
keso kaxwo' nak
tén han megkatnégwayam néxa!
© © Enxet Lengua Sur Bible © Paraguayan Bible Society, 2015.