Aqsok apkelánesso axta Dios énxet'ák apagkok
1 Énxet'ák ahagkok, kóleyxho
nélxekmowásamáxche ahagkok;
¡kóltaqmelchesho
kélháxenmo sekpeywa!
2 Altennaksek sa'
ko'o kéxegke aqsok
sekyetcháseykekxoho;
axének sa' ma'a aqsok
eyápomáxko nak
kólya'asagkoho',
eyeynamo m'a nano' axta.
3 Aqsok nenlegaya axta,
tén han negya'áseykegkoho nak,
sẽltennáseykha axta chá'a
m'a ẽlyapmeyk nano',
4 óltennasha sa'
chá'a m'a egketchek.
Óltennasha sa' chá'a
kaxwe nak apmáheyo
elántépekxak egmonye',
ektémakxa ekyawe
apmopwána Wesse' egegkok,
tén han aqsok sempelakkasso
nak agwetak apkelane.
5 Apméssegkek axta
segánamakxa Dios ma'a Jacob;
appekkenchessegkek axta
han apkeltémókxa chá'a
etnahagkok ma'a Israel,
apkeltémók axta han
elxekmósek aptawán'ák neptámen
ma'a ẽlyapmeyk nano' nak,
6 yaqwayam enxoho
elya'asagkohok ma'a
peya nak elántépekxak
makham egmonye',
cham'a apketchek
mepalleykmo nak makham,
yaqwayam enxoho han
elxekmósek apketchek ma'a;
7 yaqwayam enxoho
etnahagkok apkeláyo m'a Dios,
tén han megkalwagqamagkehek
ma'a aqsok apkelane axta;
yaqwayam enxoho
elyahakxohok han ma'a
apkeltémókxa nak antéhek,
8 metnahagkek ma'a
aptamheykegkaxa axta
apyapmeyk nano',
élyennaqte apkelwáxok,
tén han élyeyháxma,
ekmanyehe eyaqmagkasek
mók élchetamso apkelwáxok,
¡énxet'ák apkelyenseyam nak
apkelyetleykha Dios!
9 Apkenyaheykegkek
axta apkeltaqhémo
neptámen ma'a
Efraín énxet'ák apagkok,
yetlo yágke apagkok,
tén han sawhéwa,
cham'a émpakhamaxko axta;
10 axta eláneykegkok ma'a
aphéssamo axta mók
apkelpaqhetchásamákpoho m'a Dios,
axta han elyeheykekxak ma'a
nélxekmowásamáxche apagkok.
11 Kelwagqámeykegkek axta
m'a aqsok apkelane axta chá'a,
cham'a aqsok sempelakkasso nak
agweta' apxekmósso axta chá'a.
12 Apkeláneyak axta
chá'a aqsok sempelakkasso
agwetak Dios nápaqta'awók
apyapmeyk nano' ma'a
yókxexma Soan,
ekpayho nak Egipto:
13 apmeykáseykekxeyk axta
neyseksa wátsam ekwányam,
apkelyeykháseykekxeyk axta m'a,
máxa axta kélhaxtegkesso
tegma apteméssessók
apmeykegko yegmen.
14 Yaphope axta
chá'a apxegkessessók
apmonye'e ekhem,
keñe axta chá'a axta'a
táxa eyápogwate.
15 Appáxqatmeyk axta han
neyseksa meteymog
meykexa nak énxet,
tén axta apméssama
ekyawe agko' yegmen
yaqwayam énagkok,
eñama m'a kañók agko' xapop.
16 ¡Aptekkessegkek
axta yegmen Dios
ma'a meteymog,
yegmen ényé ekyennaqte!
17 Apkellenxanmeykegkók
axta eyke aqsa apkeláneyak
melya'assáxma nápaqtók Dios;
apkelenmexeykekxeyk axta
Dios Meyke nak Ekhémo m'a
yókxexma meykexa nak énxet.
18 Apmáheyók axta
épkeynek Dios
apkelmaxneyeykencha'a
aqsa chá'a m'a aptéyak.
19 Axta etnehek
chá'a elpaqmésmakha
ekmaso exének se'e:
“¿Apwancheya hegagkok
nento Dios yókxexma
meykexa nak énxet?
20 Naqsók axta
appáxqatma Dios
neyseksa meteymog,
keñe han ekteyapma
yegmen ma'a,
ektémól'a wátsam,
tén han ekpayheykekxo
yegmen ma'a xapop;
¿apwancheya han
hegmések nento m'a?
¿apwancheya han egkések
ápetek ma'a énxet'ák apagkok?”
21 Xama axta aplegaya
Wesse' egegkok xa,
aplamchek axta;
¡máxa táxa axta temék aplo,
aptaqnagkamchek
axta m'a Jacob!
22 Hakte axta eláyók ma'a Dios,
apkelya'ásseykmek axta
apmopwána epasmok.
23 Appaqhetchessegkek
axta Dios yaphope m'a
aphamakxa nak néten,
apkelmeykásekxeyk
axta atña'ák ma'a néten;
24 ¡appalchessásenteyk axta
énxet'ák apagkok ma'a maná,
hótáhap apkeñama nak néten,
yaqwayam etawagkok!
25 ¡Apteykegkek axta
énxet'ák ma'a nento
apteykegkoho nak ma'a
Dios apkelásenneykha!
¡Apkeleykegkek axta
ekxámokma aptéyak ma'a Dios!
26 Teyapmakxa
ekhem axta keñamak
aptekkessama éxchahayam,
tén han nepyeyam,
kexchaheykmek axta néten;
¡Dios axta aptekkesso
yetlo apmopwána!
27 Appalchessásenteyk axta ápetek
nepyeseksa énxet'ák apagkok;
¡palleykenteyk axta náta,
ektémól'a yagkamex ma'a
neyáwa nak wátsam ekwányam!
28 Appalchásenteyk axta
Dios neyseksa apheykegkaxa,
tén han ma'a neyáwa
nak apkelpakxenéyak.
29 Apteykegkek axta
ekweykmoho apkelyaqkáneykmo,
cháxa apméssama axta Dios
aqsok apkelmopmenyého xa.
30 Axta eyke
elyaqkáneykmok makham,
apkelenseykha axta
makham ma'a aptéyak
31 eyáhapweykto
m'a Dios aplo,
apkelnapmeyk axta m'a
énxet'ák apkelyennaqte
apagko' axta.
¡Apkelnapmeyk axta m'a
énxet'ák élyennaqte axta
apyempe'ék ma'a Israel!
32 Apkeláneykegkokxeyk
axta aqsa makham
melya'assáxma neyseksa
eykhe ekteme xa ekyókxoho nak;
apkelya'ásseykmek axta m'a
aqsok sempelakkasso nak
agwetak apkelane Dios.
33 Axta keñamak
apmassésseykmo Dios
ekmanyehe agko',
ektémól'a xama
negwátekhapma,
asagkek axta
ektémakxa apkeletsapma.
34 Wánxa aqsa han
chá'a elchetmok Dios
ma'a apkelnapa
enxoho chá'a nápakha,
elyo'ókxak axta chá'a;
elmaxneyagkok axta
chá'a meyke
apkelyeytekkesseyam;
35 kaxénwakxohok axta
han chá'a apkelwáxok
apkelmasma m'a
Dios Meyke nak Ekhémo,
tén han apkelwagkassama teyp.
36 Kaltaqmalmakha
axta chá'a apkelpeywa,
atsek axta chá'a katnehek
apkelpeywa etnahagkok
apkelmopwancha'a amya'a,
37 apkelmopwancha'a
amya'a axta aqsa
chá'a aptamheykegkok,
axta eláneykegkok
ma'a ekhémo mók
apkelpaqhetchásamákpoho.
38 Apyósekak axta eyke
apkelányo m'a Dios,
meyaqmagkásekxeyk axta
chá'a apkeltémakxa ekmaso,
axta han emassésseykmok;
megyohók axta chá'a
katxek apwáxok aplo.
39 Kaxének axta
chá'a apwáxok Dios
apteme énxet aqsa m'a;
aptamhéyak ekho éxchahayam,
ekxegál'a keñe megkataqhegwome'.
40 ¡Xámokmeyk axta
melyaheykekxa m'a Dios,
tén han apkelapwagkassesso
apwáxok ma'a yókxexma
meykexa nak énxet!
41 Épkeynekxak
axta aqsa chá'a;
¡apyentaxnéssessegkek
axta apwáxok ma'a
Appagkanamap nak Israel!
42 Axta kalxeyenweykekxohok
chá'a apkelwáxok ma'a ekhem
apkelwagkassama axta teyp Dios,
yetlo apmopwána,
nepyeseksa m'a apkelenmexma;
43 apkelánéssama axta
aqsok ekyawe agko'
ma'a yókxexma Soan,
ekyetnama nak Egipto,
tén han ma'a aqsok
segyegwakkassamo nak agweta';
44 aptemessáseykekxo
axta éma m'a wátsam yegmen,
megkalmopwagko axta
apmáheyo énagkok
ma'a egipcios.
45 Apchahayak
axta sempéhe,
tén han paha',
apkeltakxeykegko
axta apyókxoho,
tén han apsawhoma;
46 apkeltémók axta
etawagkok sawa' m'a
aqsok kélcheneykekxa,
apkeneykekxa axta
m'a énxet'ák nak.
47 Yegmen élyennaqte
axta apchehék
aptawássaseykencha'a m'a
higo yámet apkeneykekxa',
tén axta yeyam appok
apchahaya m'a anmen
yámet apkeneykekxa.
48 Kelnáhakkassegkek
axta yegmen élyennaqte
m'a weyke apnaqtósso,
keñe axta
nepkések apnaqtósso
apkelnáhakkassama takha'.
49 Apkeltaqnaweykegkók
apagko' axta Dios:
apchahayak axta aplo,
apkeltémók axta
kóllegássesagkoho',
apkellegassáseykegkók
axta apkelwáxok,
máxa axta m'a
sẽltennassól'a agwetak
aqsok ekmaso.
50 ¡Axta emágweykekxak aplama!
Axta eltémók chá'a elweynchamha,
apkelnapmeyk axta
apchahaya aqsok ekmaso;
51 ¡apkelnapmeyk axta
chá'a apyókxoho átnaha
apketkók étchek nak
ma'a kelán'ák Egipto,
cham'a kañe'
nak Egipto!
52 Apkelántekkessegkek
axta énxet'ák Israel,
máxa axta apteméssessók ma'a
nepkések kélnaqtóssol'a,
apnaqleykekxeyk axta
énxet'ák apagkok
apkelyeykháseykekxo m'a
yókxexma meykexa nak énxet.
53 Aptaqmelchessegkek
axta apnaqleykha,
yaqwayam enxoho
megkaxek chá'a apkekakxa',
chápeykekxeyk axta eyke
wátsam ekwányam
ma'a apkelenmexma.
54 Apnaqleykekxeyk
axta énxet'ák apagkok
Dios ma'a xapop apagkok
ekpagkanamaxche nak,
cham'a élámhakxa nak
meteymog élwenaqte,
apmomakxa axta m'a
eñama apmopwána.
55 Apkelántekkessegkek axta
nápaqta'awók Israel ma'a
melya'áseyak nak Dios;
apmelásektegkek axta xapop
nepyeseksa m'a ektáhakxa
nak chá'a énxet'ák apagkok,
apkelheyáseykha axta han
ma'a apheykegkaxa nak.
56 Apkelyepkeynmeyk
axta eyke chá'a m'a
Dios Meyke nak Ekhémo,
apkenmexeykekxo chá'a,
axta elyeheykekxohok chá'a m'a
apkeltémókxa axta etnahagkok;
57 aphémók axta m'a
apyapmeyk nano',
apkelyamasmeyk axta,
apkelyenseykmek axta
han apkelyetleykekxa;
apkeltaqhegweykmek axta,
máxa axta m'a yágke
ekyetnakhágwayam la'a ekxega!
58 Aplókassegkek
axta apkeláneykegko
apkelwatnamakxa aqsok,
apkelwatnéssamakxa
chá'a aqsok ma'a
mók aqsok kéláyókxa,
tén han apkelpeykessamo
m'a kéleykmássesso,
aplókassegkek
axta apkelmeyeykha.
59 Aplamchek axta
Dios apweteya xa
aqsok nak,
tén axta apkexakhama
apagko' ma'a Israel,
60 apyamasmeyk axta m'a
kélpakxanma appagkanamap
apyetnama axta m'a Siló,
apxagkok axta
nepyeseksa m'a énxet'ák.
61 Apchahayók axta
apmoma apkelenmexma
m'a yántéseksek,
ekyetchesamaxkoho nak
apcheymákpoho,
tén han apmopwána.
62 Apméssegkek axta
yaqwayam elnápok
énxet'ák apagkok
ma'a apkelenmexma,
hakte apkeltaqnaweykegkók
apagko' axta.
63 Apkeletsepmeyk axta wokma'ák
neyseksa kempakhakma;
¡néxa axta temégweykmok
yaqwayam kalyamhopagkok
kelán'a étkók!
64 Apkeletsepmeyk axta
han apkelmaxnéssesso
Dios énxet'ák apagkok,
sawo axta chá'a kélyetxeykegkok,
yawanchek axta han ekmáheyo
kallekxagwaha m'a
apnaqteyegka'a neptámen.
65 Apxatakha'ak axta
eyke Wesse' egegkok,
máxa axta aptáhak
ma'a xama énxet
apteyenmal'a exatakha',
aptémól'a kempakhakma yáp
exátekhágwók natámen
éllágwayam eyaqhe vino,
66 apkeltaqheyásawók
axta apkelenmexma,
apmenxenchek axta;
¡apkelmegqásawók
apagko' axta meyke néxa!
67 Axta han elanók ma'a
José aptawán'ák neptámen,
axta nahan elyésaha m'a
Efraín énxet'ák apagkok;
68 Judá énxet'ák apagkok
axta aqsa Apkelyesáha,
tén han ma'a egkexe Sión,
apchásekhayo apagko'
axta chá'a.
69 Apkelanak axta tegma
appagkanamap apagkok,
netnók agko'
ekhawo nak ma'a néten,
appekkenmeyk axta han
meyke néxa m'a,
ektéma nak xapop.
70 Apkelyéseykha axta
apkeláneykha David,
apteme axta
apkeláneykha nepkések;
71 apkelwátéssessegkek
axta apkeláneykha
nepkések apnaqtósso,
yaqwayam enxoho
elánesha m'a
énxet'ák apagkok,
yaqwayam etnehek
apkeltaqmelchesso
énxet'ák Israel.
72 Apkeláneykha axta David
Dios énxet'ák apagkok;
yetlo apmopwána aqsok,
apnaqleykha axta chá'a
yetlo meyke aptémakxa.
© © Enxet Lengua Sur Bible © Paraguayan Bible Society, 2015.