Énxet apwányamók apkelmaxnagko
1 Wesse',
ekya'awekteyk ko'o exchep
séltamho hetaqmelchesek;
¡nágyoho ko'o amegqeyk
xama enxoho!
2 ¡Hemallahanches,
hewagkas teyp,
hakte péwók
xép aptémakxa!
Heyeyxho ko'o,
hewagkas teyp.
3 Etne exchep
semasma apyennaqte,
¡etne exchep
tegma apyennaqte
sekyexanmomakxa,
tén han sewagkasso teyp!
¡Xép apteme
semasma apyennaqte,
tén han tegma
apyennaqte ahagkok!
4 Dios ahagkok,
hewagkas ko'o teyp
neyseksa apmáheyo
hemok ma'a élmasagcha'a
nak apkeltémakxa,
tén han apkelyennaqteyáseykha
nak chá'a apyempe'ék.
5 Hakte axta ay'ásseykmok
chá'a ko'o exchep Wesse',
seyeynamo m'a
sektémakxa axta étkok,
seyásenneykekxa axta
chá'a ektemék.
6 Nanók axta ko'o
seyásenneykekxa exchep
sekyetnamakxa axta
kañe' méme awáxok.
¡Xép axta setekkesso!
¡Alteméssesek sa' chá'a ko'o
exchep apcheymákpoho!
7 Apxámok axta énxet'ák
élyamassama apkelwáxok
apkelweteya setnamakxa',
xép eyke apteme
sekyexánegweykekxexa'.
8 Yókxoho ekhem chá'a
ko'o sekmeneykmasso
axének ma'a apcheymákpoho;
9 ná etne aqsa mehelányo
sektáha enxoho sekwányamo;
ná heyenyaw aqsa,
ekmassa enxoho
ekha sekyennaqte.
10 Apyepetchákxeyk
pók ma'a sélenmexma
apmáheyo nak
chá'a heyaqhek,
apkelánekxeyk
apkelpaqmeyesma apkelxéna
yaqwánxa hetnéssesek.
11 Aptáhak chá'a s'e:
“¡Kólemhák, kólma sa',
hakte apyenyókek ma'a Dios,
méko kawagkasek teyp!”
12 Dios ahagkok,
ná heyenyaw aqsa ko'o,
¡hey'óta heykxe hepásegwata'!
13 ¡Elmegqágwakxohok
sa' ma'a sélenmexma
sénmexeykha nak chá'a,
kólmasséssók sa'!
¡Elasmésakpok sa' ma'a
apmáheyo nak chá'a
hetwássesha sekha!
14 Malwátéssemek sa' eyke
ko'o sélhaxanma exchep,
ayánchessamhok sa'
aqsa sélpeykessamo;
15 yókxoho ekhem sa'
chá'a ko'o axének
sẽlwagkassama teyp xép,
tén han senláneseykekxa negheykha.
¡May'ásegkok eykhe
ko'o xa aqsok nak!
16 Wesse',
axének sa' ko'o
ektémakxa nak
ekyawe aqsok apkelane;
¡axének sa' chá'a ko'o exchep
wánxa apteme appéwomo!
17 Dios ahagkok,
xép axta sélxekmósso
eyeynamo m'a
sektémakxa axta étkok,
makhemek eyke makham
ko'o sekxeyenma m'a
aqsok élyawe apkelane nak.
18 Dios ahagkok,
ná heyenyaw aqsa,
sektáha nak sekwányamo,
tén han ekmopa nak épátek,
seyewagko nak makham
altennaksek ektémakxa
apmopwána ekyawe s'e
kaxwe apkektega nak,
tén han ma'a yaqwayam
nak elántépok egmonye'.
19 Oh Dios,
weykmok xép aptémakxa
ekpéwomo m'a néten,
élyawa agko' xép aqsok apkelane;
¡méko aghéshok xép!
20 Xámok eykhe
exchep segkésso
aqsok ekmaso,
tén han ekyentaxno sekha,
hélenxánegkeshok sa'
eyke makham sekha;
megyohók sa'
amhagkok ma'a
apkelmaheykegkaxa
nak apkeletsapma,
21 heyánchessásekxak sa'
nahan ko'o kélteme séláyo,
hepeykessásekxak sa'
makham ewáxok.
22 Anneykmaksek sa' eyke
ko'o negmeneykmasso,
alpeykeshok ektémakxa
nak mehenyenyaweykha,
yetlo sekpáwasso arpa,
alpeykeshok sa'
Dios ahagkok,
Appagkanamap nak Israel,
yetlo sekpáwasso yát'axpog.
23 Kapayhekxak sa' ko'o ewáxok
sekmeneykmássesa enxoho,
ekweykmoho kañók agko' ewáxok,
hakte ewagkassegkek teyp.
24 Yókxoho ekhem
sa' chá'a axének xép
apteme appéwomo,
hakte apkelmegqágweykxeyk
ma'a apkeltémo axta
hetnéssessamhok exma ekmaso,
mékoho aptamhákxa'.
© © Enxet Lengua Sur Bible © Paraguayan Bible Society, 2015.