Wesse' egegkok apteme segyekpelchémo ekpéwomo aptémakxa
1-2 Dios Wesse' ahagkok,
ekya'awekteyk ko'o
exchep séltamho
hetaqmelchesek;
¡hewagkas ko'o teyp
nepyeseksa m'a
apyókxoho sétleykha nak
chá'a apmáheyo heyaqhek!
¡Hemallahanches,
hakte máxa
yámakméwa m'a;
hetnéssesek katnehek
nekha'a étkók,
keñe méko
hewagkasek teyp!
3 Dios Wesse' ahagkok,
¿yaqsa aqsok séláneya ko'o?
¿Éláneyak enxeykel'a
ko'o aqsok ekmaso?
4 ¿Ekmaso enxeykel'a
ekyaqmagkáseykekxak
setnéssessamakxa
ektaqmela émók?
¿Ektawáseykegkók
enxeykel'a ko'o
meykexho ektáhakxa
m'a sénmexma nak?
5 Ektemék sa' agko' xa,
hémheykha sa' ma'a
sénmexma nak;
hethanyekxak sa',
tén sa' héñawasha náxop,
éttelegwasha sa' náxop
ma'a ektémakxa nak
ekha séláyo.
6 ¡Wesse',
yempekxa néten elwok!
¡Elenmexekxa m'a
sélenmexma apkello nak!
¡Hepásegwata'!
xép appekkenma
axta appeywa
hentaqmelchessásekxak
negheykha
7 Ewakhésap ma'a
pók aptémakxa
nak chá'a énxet,
epekken aptaháno
m'a néten
apyetseksa'ák nak
apheykegkaxa'.
8 Wesse',
elyekpelkohok chá'a
exchep ma'a pók
aptémakxa nak énxet'ák:
hékpelkoho ko'óxa
ektémakxa nak
meyke sektémakxa;
hékpelkoho ko'óxa
ektémakxa nak
ektaqmalma sektémakxa.
9 Dios appéwomo,
apkelányo nak
chá'a ektémakxa
élchetámeykha egwáxok,
tén han ekxéneykha
egwáxok kañók agko',
¡emasséssem apkeltémakxa
ekmaso m'a élmasagcha'a
nak apkeltémakxa,
eyke ewasqakkas
neyseksa apha m'a
énxet meyke nak aptémakxa!
10 Cha'a semasma ko'o
m'a Dios apha nak néten,
apwagkassamo nak
chá'a teyp ma'a énxet
apkelyeheykekxoho nak chá'a.
11 Dios apteme
segyekpelchémo
ekpéwomo aptémakxa,
aptaqnagkamo nak chá'a
nentémakxa ekmaso
yókxoho ekhem.
12 Sa' agkok
ey'aweykxak énxet
ma'a Dios,
emaxneyekxak sa'
sókwenaqte apagkok
ma'a Dios;
apkeykessek axát'ák
yágke apagkok
peya yahaxtaqpog,
13 apmátchessek yágke
aktek eyáléwomól'a naw'a,
¡apmákxeyk apmeykha
segaqhamól'a!
14 Kóllano m'a
ekmaso nak aptémakxa:
chássek apwáxok,
etekkesek sa' ma'a
nentémakxa ekmaso,
etekkesek sa' han ma'a
negmowána amya'a.
15 Apmetmeyk máxek
ekmattawóneg agko',
etyemekxohok sa'
eyke apagko' ma'a
máxek apagkok nak.
16 ¡Kápekxak sa' ma'a
aptémakxa ekmaso,
tén han apyennaqteyáseykha
apyempehek!
17 Alteméssesek sa'
ko'o apcheymákpoho
Wesse' egegkok,
hakte péwók aptémakxa m'a;
anneykmássesek sa' ko'o
apwesey Wesse' egegkok,
apwesey nak Meyke Ekhémo.
© © Enxet Lengua Sur Bible © Paraguayan Bible Society, 2015.