Énxet'ák Israel apkelmallanma
1 Apkempákxeyk agkok
chá'a néten Dios,
yexpaqnek chá'a
m'a apkelenmexma,
yenyahagkok chá'a
apmonye' m'a
aptaqnagko nak chá'a;
2 elmassegwók aqsa
chá'a ektémól'a
éten kamassegwók,
elpayhekxak chá'a,
ektémól'a pápa'
kólpekkenek nátex;
¡emassegwók chá'a
nápaqtók Dios
ma'a élmasagcha'a
nak apkeltémakxa!
3 Kalpayhekxak eyke
chá'a apkelwáxok ma'a
ektaqmalma nak apkeltémakxa;
kalpayhekxohok agko'
chá'a apkelwáxok
nápaqto' Dios,
¡elnextegmakha chá'a
néten elátsaha!
4 Kólmeneykmásses
chá'a kéxegke m'a Dios,
kólmeneykmásses chá'a
negmeneykmasso
kólxének apwesey;
kólpeykesho chá'a
kéxegke m'a
apxegamo nak chá'a
néten yaphope.
¡Kólmés chá'a
ekpayheykekxa
kélwáxok Wesse' egegkok!
¡Kalpayhekxa chá'a
kélwáxok nápaqto'!
5 Dios, aphama nak cha'a m'a
tegma appagkanamap apagkok,
cha'a apteme chá'a apyapmeyk
ma'a apkelyéheykha nak,
tén han apkeltaqmelchesso
m'a xentampe'e nak.
6 Egkések chá'a
aphamakxa Dios ma'a
aptaqmópeyak nak chá'a,
elántekkesek chá'a
m'a apkelmomap nak,
egkeyásekxa chá'a
ektaqmalma apheykha;
exmakha sa' eyke chá'a
xapop ekmaso nak ma'a
élmasagcha'a nak apkeltémakxa.
7 Oh Dios,
xama axta apxegama
exchep apmonye'e m'a
énxet'ák apagkok,
apyeykheykekxo m'a
yókxexma meykexa nak aqsok,
8 yawheykha axta xapop,
máméyak axta han
ekyawe agko',
kelpexyennamomchek axta
apmonye' m'a Dios nak Sinaí,
cham'a Dios nak Israel.
9 Oh Dios,
apmáméssegkek axta
exchep ekyawe agko';
apkelyampayók apagko'
axta m'a énxet'ák apagkok,
apkelmeyáseykekxeyk axta
eyke exchep apkelyennaqte.
10 Apkelheykmek axta
énxet'ák apagkok ma'a,
oh Dios, apkelméssegkek
axta eyke exchep
eyeyméxchexa aqsok ma'a
meyke nak aqsok apagkok,
eñama ektaqmeleykha apwáxok.
11 Apméssek axta
appeywa Wesse' egegkok;
xámok axta han kelán'ák
élsóncha'a m'a
aptáhakxa appeywa.
Axta entáhak chá'a s'e:
12 “¡Apkenyahágkek kelwesse'e
yetlo sẽlpextétamo apagkok!”
Melasséxchek axta han
aqsok élyementaméyak
élenmexma m'a kelán'ák,
cham'a axanák nak,
13 keñe kéxegke
kélheykekxo aqsa m'a
élyáqtamakxa nak kélnaqtósso.
¡Kelmágkek axta m'a
wáx'ay apxempenák
kélyepetchesso nak
sawo ekmope ekmomnáwa!
¡Apwa' élyenméyak nak
sawo ekyátekto ekmomnáwa!
14 Apteyekmek axta han
yeyam egkexe Salmón,
apmenxena axta Dios
ekha apyennaqte m'a
kelwesse'e apkelwányam.
15 ¡Netna'awók agko'
neykel'a egkex'a nak Basán,
netna'awók agko'
neykel'a m'a naw'ék nak!
16 Kéxegke kélteme
nak egkexe netna'awo',
¿yaqsa ektáha kélnatha'a
nak kéllano m'a egkexe
yaqweykenxa nak
exek ma'a Dios?
¡Exek sa' chá'a meyke néxa
Wesse' egegkok ma'a!
17 Xámok agko'
yátnáxeg apkelyenyawasso
apagkok ma'a Dios;
Sinaí apkeñamak
apmeyánto m'a
tegma appagkanamap apagkok,
yetlo m'a yátnáxeg
apkelyenyawasso nak.
18 Oh Dios, apxámok xép
apnaqlákxo énxet'ák
apkelmomap apmeyákxo
m'a netno' agko' nak;
apkelxakak nahan
chá'a m'a aqsok
apkelmésso m'a énxet'ák,
wokmók nahan
apkelmeyásamap ma'a
apkenmexeykekxa nak
chá'a exchep, Wesse'.
19 ¡Tásek sa' chá'a
katnehek xép apxénamap
Wesse' egagkok,
Dios egagkok,
Sẽlwagkasso nak teyp,
yókxoho ekhem chá'a
apkelpatmeykha m'a
nélpata ekyentaxno nak!
20 Dios egagkok
apteme xama Dios
segwagkassamo nak teyp,
apwanchek hégketchesek nétsapma.
21 Elpáxqatchesek sa'
apqatkok Dios ma'a
apkelenmexma nak,
apqatkok nak ma'a
melwáteséyak nak
apkeláneyak melya'assáxma.
22 Aptáhak Wesse' egegkok se'e:
“Anaqlósawakxak sa'
ko'o makham kélenmexma
apkeleñama m'a Basán nak;
anaqlósawakxak sa' makham
apkeleñama m'a
wátsam ekwányam
ekmattawóneg nak,
23 yaqwayam sa'
kólyássesek kélmagkok
éma apagkok ma'a
kélenmexma nak,
tén han keynagkok ma'a
kélnaqtósso semheg nak.”
24 Oh Dios, Dios ahagkok,
Wesse' apwányam ahagkok,
apkelwetákpek apkelxegakmo
énxet'ák ma'a tegma
appagkanamap apagkok,
apkelsawássessamo nak xép
eñama apkelmallanma.
25 Apmonye'e apkelxegak
ma'a apkelmeneykmasso nak,
keñe axayók ma'a
apkelpáwasso nak,
keñe kelán'a étkók
élxega m'a neyseksa nak,
yetlo élpáwasso m'a
élaqtáwáseykha.
26 ¡Kólpeykesho chá'a
kélyókxoho kéxegke m'a
Dios Wesse' egegkok!
¡Kólpeykesho chá'a
kélyókxoho Israel
kélaqnákxoho nak se'e!
27 Apmonye' apxegak
ma'a Benjamín,
apsexyo nak,
keñe neptámen
apxámokma
apkelámha amonye'e
nak Judá, Zabulón,
tén han Neftalí.
28 Dios ahagkok,
henxekmós apmopwána;
¡hentemessásekxa makham
ma'a senteméssessamakxa
axta negko'o sempasmoma!
29 Keñe m'a
tegma appagkanamap apagkok
netno' nak, cham'a Jerusalén,
apkelseykekxéssamakxa nak
chá'a apkelmésso naqsa aqsok
ma'a kelwesse'e apkelwányam,
30 epaqhetches sa' Egipto,
cham'a aqsok nawhak
ekleykha nak neyseksa ekho',
cham'a weyke kelennay'a
ekxámokma éllo nak,
tén han weyke étkók
élmámenyého nak ma'a
aqsok ekxámokma,
eknaqtawáseykegkoho
nak chá'a énxet'ák;
¡yexpánches sa'
ma'a énxet'ák
ekmátsa nak chá'a
elanagkok kempakhakma!
31 Egipto sa'
eleñék apkelámha
apmonye'e kélásenneykha;
elya'ássesek sa' néten
apmék Dios elmaxneyagkok
ma'a énxet'ák Etiopía.
32 ¡Kólmeneykmásses Dios
kélheykha nak ekyókxoho
apkelókxa keso náxop,
kólmeneykmásses
negmeneykmasso
m'a Wesse' egegkok,
33 cham'a apxegamo
nak chá'a netno' nak,
néten nanók ekyetnamakxa nak!
Kóleyxho ektáhakxa
éxtegyawà appeywa,
cham'a appeywa
ekyennaqte nak.
34 Kólyekpelkoho
Dios apmopwána:
sawheykekxók
apcheymákpoho
m'a kañe' Israel,
weykmok apmopwána
m'a netnók agko' nak
yaphope ekyápaqmate.
35 Yeykpok chá'a Dios,
aphama nak ma'a
tegma appagkanamap apagkok;
Elmések chá'a apkelmopwancha'a,
tén han apkelyennaqte
énxet'ák apagkok ma'a
Dios apagkok nak Israel.
¡Tásek sa' chá'a katnehek
apxénamap ma'a Dios!
© © Enxet Lengua Sur Bible © Paraguayan Bible Society, 2015.