Keltásók agko' xép aqsok apkelane
1 Kólmeneykmásses Dios,
kélyókxoho kélheykha nak keso náxop
yetlo ekpayheykekxa kélwáxok;
2 kólmeneykmásses
negmeneykmasso m'a
apwesey eyeymáxkoho nak;
kólmeneykmásses
negmeneykmasso
ektaqmalma eñama
apteme apwányam apagko'.
3 Kólteme kólának Dios se'e:
“Keltásók agko'
xép aqsok apkelane.
Apmopwána ekyawe
keñamak xép
apkelpexyennama
apmonye' m'a
apkelenmexma nak;
4 apyókxoho énxet'ák
apkelpeykásawók xép
apheykha nak keso náxop,
apkelmeneykmássessek
han ma'a negmeneykmasso
apkelxéna apwesey.”
5 Kólchexyem,
kólteyánegwatámho
Dios apkelane aqsok,
aqsok sempelakkasso
apkelánesso axta m'a énxet'ák:
6 xapop ekyamaye axta
aptemessáseykekxak ma'a
wátsam ekyawe nak,
keñe axta m'a ẽlyapmeyk
nano' axta negko'o
apkelyeykheykekxo náxop
ma'a wátsam nak;
¡axta nenlánegweykmok
nélsawássessamo ekyókxoho
senteméssessamakxa axta Dios ma'a!
7 Apmopwána keñamak aptéma
wesse' apwányam meyke néxa;
meyenyókáseykha apaqtek
apkeláneykencha'a m'a apkelókxa nak,
yaqwayam enxoho melenmexekxék ma'a
énxet'ák apkelenmexeykekxoho nak chá'a.
8 Énxet'ák,
¡kaltaqmalmakha kélpeywa
kólxének Dios egagkok!
¡kóllegaksoho m'a
negmeneykmasso
nélpeykessamo nak!
9 Hakte cha'a keñamak
nélweynchámeykencha'a
negko'o makham ma'a;
megyahayók hẽlpelápagkasek.
10 Dios egagkok,
apkelányok negko'o
exchep nentémakxa
yaqwayam ékpelkoho',
¡ẽláxñáseykekxe',
máxa enteméssessók
ma'a kéltémól'a sawo
ekmope kólaxñásekxa'!
11 Egáhakkasseykteyk yám'én;
empátegkessegkek
aqsok ekyentaxno agko'.
12 Apchahayók han
sẽlteyammeykencha'a
m'a sẽlenmexma nak;
nélmalláneykekxeyk chá'a
negko'o m'a yegmen,
tén han táxa,
ẽlwagkassa'ak eyke
yaqwánxa óllókasek nélyampe.
13 Atxek sa' ko'o
tegma appagkanamap apagkok,
tén sa' almések aqsok sélwatno;
keñe sa' alának ma'a aqsok
séltennasso axta alána',
14 cham'a
séltennassama axta alána',
sekweteya axta ekmaso sekha.
15 Almések sa' ko'o
exchep aqsok sélwatnésso
kélnaqtósso seknaqmelasso nak;
almések sa' ma'a weyke kelennay'a,
tén han yát'ay apkelennay'a nak,
tén han ma'a nepkések
apkelennay'a sélnapma nak.
16 Kólchexyem kélyókxoho,
¡kélaye nak chá'a Dios!
¡Kóleyxho sa',
peya nak altennasha
setnéssessamakxa ko'o m'a!
17 Ekpaqmeyesmeyk
axta ko'o sekwóneykencha'a,
ekmeneykmássessegkek
axta sélpeykessamo.
18 Asagkek axta agkok ko'o
élchetamso ewáxok,
meheyéxók axta m'a
Wesse' egegkok;
19 ¡ehaxnawók axta eyke,
apmeyk axta han takha'
sélmaxnagko!
20 ¡Apcheymákpoho sa'
chá'a kólteméssesek Dios,
apmoma axta takha' sélmaxnagko,
sexekmóssama axta seyásekhayo!
© © Enxet Lengua Sur Bible © Paraguayan Bible Society, 2015.