Nélmaxnagko néltémo hentaqmelchesek Dios
1 Dios ahagkok,
yeyxho sekpaqméteykha
eñama seyápagqánamaxche';
hemyow nepyeseksa m'a
sélenmexma apkello nak.
2 Hekpós ko'o apmonye'e
m'a élmasagcha'a
nak apkeltémakxa,
cham'a apkelyexamakpoho
nak chá'a apkeláneykekxa
apkelpaqmeyesma
yaqwánxa hetnéssesek;
hemallahanches ko'o
élxeyenmakxa nak chá'a
apkelwáxok hetnéssesek
ma'a élmasagcha'a
nak apkeltémakxa,
3 apkeláneykekxa nak chá'a
yaqwánxa etnehek apkelpeywa,
ektémól'a sókwenaqte kólmaxneyekxa',
melmágweykekxa nak chá'a
apkelpeywa elpaqmétek ekmaso,
ektémól'a yágke kólhaxtaqpog,
segaqhamól'a hegyaqxa'.
4 Elyátak chá'a énxet
meyke nak apkeltémakxa
m'a apkelyexanmomakxa nak,
etlakkasek chá'a elyáta',
meyke apkelegweykekxa'.
5 Elyáteyakpok chá'a emáwhok
elanagkok aqsok ekmaso;
elanagkokxak chá'a aptamhágkaxa
ekpósek epekkenek kelhanma,
yának chá'a megkóteyáxchek
aptamhágkaxa,
6 yának han chá'a méko
kategyaha amya'a
apkeltémakxa ekmaso.
Sa' eyke etegyaha
amya'a apkeltémakxa m'a
apya'áseykegkoho nak
kañók agko' élchetamso
apwáxok énxet.
7 Dios sa' eyke elyátak
ma'a yágke apagkok,
etlakkasek sa'
elyensasagkok;
8 apkelpeywa apagkók
sa' kálsexnáneyekxa',
elesmaksek sa' chá'a m'a
ektáha nak chá'a apkelwete.
9 Keñe sa' apyókxoho énxet
etnehek apcháyo m'a Dios,
tén han elxének chá'a
m'a aqsok apkelane;
elya'asagkohok sa' han
ma'a aqsok apkelane nak.
10 Kalpayhekxak sa'
apkelwáxok énxet'ák
éltaqmalma nak
apkeltémakxa,
apkelwet'a sa'
apteméssesakxa m'a
Wesse' egegkok,
keñe sa' elyo'ókxak
yának eltaqmelchesek,
kalpayhekxak sa'
apkelwáxok ma'a
apyókxoho énxet'ák
meyke nak apkeltémakxa.
© © Enxet Lengua Sur Bible © Paraguayan Bible Society, 2015.