Nélmaxnagko néltémo hempasmok Dios
(Sal 108.6-13)1 Oh Dios,
aplo keñamak xép
segkexakhama negko'o,
nekha'a egketkók
enteméssessók;
¡hentemessásekxa kaxwo'
senteméssessamakxa axta nano'!
2 Apyawheyáseykha axta xapop,
tén axta ekmayheykekxo;
¡elápekxa kaxwók
ma'a élmayhe nak,
hakte palleykme'!
3 Apkellegassáseykegkók
axta ekyentaxno agko'
ma'a énxet'ák apagkok,
ẽleykegkek axta negko'o exchep
vino segyeykessamo nak exma.
4 Apkelméssegkek axta
chá'a exchep xama aqsok
magkenatchesso ektáha
nak chá'a apcháyo,
yaqwayam melyátakpehek yágke.
5 ¡Hegátegmowák negko'o,
hẽlwagkas teyp yetlo apmopwána!
¡Elmallahanches ma'a
ektáha nak apchásekhayo!
6 Aptáhak appaqmeta Dios ma'a
tegma appagkanamap apagkok nak:
“¡Yetlo ekpayheykekxa
ewáxok sa' ko'o almésagkok
énxet'ák ahagkok ma'a
xapop nak Siquem,
tén han ma'a
ekyapwátegweykenxa
nak xapop Sucot,
sekmallana sa'!
7 Ahagkok ko'o m'a Galaad,
tén han Manasés;
Efraín akke apteme
sétchesso épátek;
Judá akke apteme yámet
sekmeykencha'awól'a
chá'a sekteme wesse';
8 Moab akke apteme
sokpayhe ekwányam
sélyenyessamakxal'a chá'a emék;
ayenyók sa' ko'o
séltéto emagkok
ma'a neyseksa Edom,
magkenatchesso
sektáha ahagkok;
¡awónchesha sa'
sélma sa' ma'a filisteos!”
9 ¿Yaqsa sa' heyentemekxak
ko'o m'a tegma apwányam
kélhaxtegkesso nak nepyáwa'?
¿Yaqsa sa' heyentemekxak
ekweykekxoho m'a Edom?
10 Hakte egkexakhamchek
negko'o exchep Dios;
¡massék apkelyetlawa m'a
sẽlpextétamo egagkok!
11 Hempásem negko'o
ólenmexek ma'a
nélenmexma nak,
hakte mékoho agko' ma'a
sempasmo nak énxet.
12 Anlának sa'
negko'o ekyawe
agko' aqsok yetlo
sempasmo m'a Dios;
¡elteyammaha sa'
nélenmexma nak!
© © Enxet Lengua Sur Bible © Paraguayan Bible Society, 2015.