Wesse' egegkok apteme segmasma
1 Dios ahagkok,
hewagkas ko'o teyp,
neyseksa apmáheyo
hemok sélenmexma;
hemyow ko'o neyseksa
sektámeyam ma'a énxet'ák.
2 Hewagkas teyp nepyeseksa
énxet'ák élmasagcha'a
nak apkeltémakxa,
nágyoho ko'o heyaqhek ma'a
ekyetno nak chá'a apkelyógkexma',
3 apyetneyk énxet'ák apkelyennaqte,
sélhaxanma nak apmáheyo heyaqhek.
Wesse',
magwanmexeykekxak xép,
malaneyk han may'assáxma;
4 malaneyk ko'o aqsok
ekmaso xama enxoho,
makke kahaxanmak
appekhéssamo sektámeyam.
¡Exatakha'!
¡hélanyexegma', elano!
5 Wesse',
Dios ekha
nak apyennaqte,
Dios apagkok
nak Israel, exatakha',
ellegássesagkoho xa énxet'ák
melya'áseyak nak xép;
nágkalapyósho elanok xa
élmasagcha'a nak apkeltémakxa,
apkelsexnenagko nak
chá'a apnámakkok.
6 Axta'a chá'a elchexyók,
elpáwha chá'a ektémól'a semheg,
elhaxnegchamok chá'a
m'a tegma apwányam.
7 Katyapok chá'a
apkelpeywa ekmaso,
máxa sókwenaqte
sempexyekhayól'a
m'a apkelpeywa,
yának chá'a
megkañáxchek apkelpeywa.
8 Wesse',
yesmaksek eyke
chá'a exchep ma'a,
elwanyohok chá'a exchep
xa melya'áseyak nak xép.
9 Dios ahagkok,
sa' eyke ótak chá'a
sekmeyamáxche
m'a aphakxa nak,
hakte xép apteme
semasma apyennaqte,
tén han setaqmelchesso.
10 Hélanyexegmak sa' ko'o
m'a Dios seyásekhayo nak;
hexekmósek sa'
apmenxena m'a sélenmexma.
11 Nágkalapyósho elano',
yaqwayam sa' kalxénwakxohok
chá'a apkelwáxok ma'a
énxet'ák ahagkok nak;
yexpánches yetlo apmopwána,
etnessásekxa kóneg agko'.
¡Wesse' egegkok
apteme sentaqmelchesso!
12 Apkelpeywa chá'a
kalanaksek melya'assáxma;
¡kalmekxak sa' ma'a
ektémakxa nak
éleymáxkoho apkelwáxok,
tén han ma'a aptamhéyak
nak chá'a apkelmopwancha'a
amya'a apkelxeyenma
elanagkok aqsok!
13 ¡Emasséssem,
esawhoho yetlo aplo!
¡Melwetakpekxók sa' chá'a!
¡Kólya'asagkohok sa' Dios
apteme Wesse' apwányam
ma'a Israel,
ekweykmoho m'a
ektemegwánxa nak néxa xapop!
14-15 Apkelchexyekmek
sa' agkok axta'a,
apkelpáwanto enxoho
ektémól'a semheg,
apkelhaxnegchágwa'akto
enxoho tegma apwányam
etegyagkok aptéyak,
elwónchesha sa'
eñama melyaqkányam.
16 Keñe sa' ko'o,
anneykmássesek xép
axto'o alpeykesho';
magwésagkok sa'
axének ektémakxa
nak xép segásekhayo,
tén han apmopwána.
Hakte xép
apteme setaqmelchesso,
tén han sekyexanmomakxa
ekwa'a enxoho ekmaso sekha.
17 Dios ahagkok,
anneykmássesek sa' ko'o
exchep negmeneykmasso,
hakte xép apteme
semasma apyennaqte,
tén han setaqmelchesso,
¡xép apteme Dios,
seyásekhayo nak ko'o!
© © Enxet Lengua Sur Bible © Paraguayan Bible Society, 2015.