Nélmaxnagko néltémo hempasmok Dios
(Sal 108.1-5)1 Dios ahagkok,
yepyósho ko'o hélano',
yepyósho hélano',
hakte ekya'aweykteyk xép
séltamho hemyók.
Axnaták sa' ko'o
kóneg apxempenák
yaqwayam hemyók,
ekwokmoho ekyeyk'a
m'a aqsok ekmaso.
2 Awónmakha sa' ko'o m'a
Dios meyke nak ekhémo,
cham'a Dios sepasmo nak
chá'a ekyókxoho setnamakxa.
3 Néten sa' kañék
heyátegmowagkok
tén sa' hewagkasek teyp,
nepyeseksa m'a énxet'ák
apkellómo apagko'
nak setwáseykegkoho,
hexekmósek sa' ko'o
seyásekhayo m'a Dios,
tén han apteme apmámnaqsoho.
4 Ekyetnegkek ko'o náxop
neyseksa yámakméwa
ektómo nak chá'a énxet;
máxa sawhéwa m'a am'ák nak,
tén han yágke aktek,
keñe m'a axkok nak,
ekhawo m'a sókwenaqte
ekmahantal'a.
5 Dios ahagkok,
aphegkek xép ma'a
teyp nak néten.
¡Sawheykekxók xép
apcheymákpoho
nélwanmeygkaxa!
6 Epekkenchessegkek ko'o
emonye' kelhanma
m'a sélenmexma nak,
yaqwayam enxoho heyelaqtések;
emétegkessegkek máxek
ámay ahagkok,
appalleykekxók apagko' eyke
m'a máxek apagkok nak.
7 Dios ahagkok,
ekpenchessek eyke ko'o
séláneykekxa ewáxok,
ekpenchessek séláneykekxa ewáxok,
yaqwayam anneykmássesek
negmeneykmasso.
8 Ewáxok, kaxatakha';
exatakha' arpa,
tén han yát'axpog,
¡axatakhak sa' ko'o
axto'ók agko'!
9 Wesse',
alpeykeshok sa' ko'o exchep
nepyeseksa énxet'ák,
anneykmássesek sa'
nepyeseksa pók
aptémakxa nak énxet'ák.
10 Hakte awanhek
xép segásekhayo,
weykmok ma'a néten nak,
weykmok ektémakxa
mehegyenyaweykha m'a
yaphope ekyápaqmate nak.
11 Dios ahagkok,
aphegkek xép ma'a
teyp nak néten.
¡Sawheykekxók xép
apcheymákpoho
nélwanmeygkaxa!
© © Enxet Lengua Sur Bible © Paraguayan Bible Society, 2015.