May'ásseykmok ko'o Dios eyáyók han appeywa
1 Dios ahagkok,
yepyósho ko'o hélano',
hakte yetneyk énxet
sénmexeykha nak;
yókxoho ekhem sektámeykenta',
tén han setwáseykegkoho.
2 Yókxoho ekhem ko'o
sénmexeykha m'a
sélenmexma nak;
apxámok apagko' ma'a
énxet'ák sektámeykenta
nak chá'a ko'o,
yetlo éleymáxkoho apkelwáxok.
3 Yetneyk agkok
chá'a ko'o seyekakxa',
may'ássemek chá'a exchep.
4 May'ásseykmok ko'o Dios,
eyáyók han appeywa;
may'ásseykmok ko'o Dios,
méko seyekakxa'.
¿Háxko apwanchek ko'o
hetnéssesek énxet?
5 Yókxoho ekhem
sepaqhetchesseykta ekmaso;
wánxa aqsa élxeyenma
apkelwáxok hetnéssessamhok
exma ekmaso.
6 Elyexanmaha chá'a hélanha
sekmahágkaxa enxoho,
eleyxek chá'a kataqmelekxak sete,
yaqwayam heyaqhek.
7 ¿Megkóllegássesagkoya sa'
eñama apkeltémakxa élmasagcha'a?
O Dios,
etnessásekxa mékoho
énxet'ák yetlo aplo.
8 Apya'ásegkok xép
sélyexanmeykencha'a;
apkelyetsáteykegkek xép
ekwánxa ahaqta'ák égmen'ák.
¿Ya etáxéssók xép
weykcha'áhak apagkok xa?
9 Yenyahagkok sa'
sélenmexma séltamho
enxoho hepasmok xép.
Ekya'ásegkók ko'o
Dios sepasmoma.
10 May'ásseykmok ko'o Dios,
eyáyók han appeywa;
may'ásseykmok ko'o Wesse' egegkok,
eyáyók han appeywa;
11 may'ásseykmok ko'o Dios,
méko seyekakxa'.
¿Háxko apwanchek ko'o
hetnéssesek énxet?
12 O Dios,
alának sa' ko'o m'a
aqsok séltennasso
axta alána',
alának sa' yetlo
sélteméssesso apcheymákpoho,
13 hakte emallahanchessek
ma'a nétsapma,
megya'awok ayaqnenek
héltemessásekxak kóneg,
yaqwayam enxoho
aweynchamha chá'a
nápaqtók Dios,
neyseksa élseyéxma
segméssamo nak chá'a
ekyennaqte egnények.
© © Enxet Lengua Sur Bible © Paraguayan Bible Society, 2015.