Énxet kéltawáseykegkoho apkelmaxnagko
1 Dios ahagkok,
yeyxho ko'o sélmaxnagko;
ná etne megyaháxenmo
sekwóneykha.
2-3 Hélyahakxoho,
heyátegmowák;
ekwóneyha ko'o exchep
eyesagko setnahakxa.
Élpexyennegkek ko'o seyeye
apkelpeywa m'a sélenmexma,
tén han apkelpáxameykha m'a
élmasagcha'a nak apkeltémakxa.
Egkéssek ekyentaxno sekha;
apkellókók apagko' sektamokmo.
4 Tayha egkenyek,
eyáhapwa'ak ma'a
negaye nak ótsapok.
5 Taxneyk ewáxok
sélmenaye ekyawe;
¡élpexyennegkek seyeye!
6 Keñe sektáha s'e:
“Kaxho anna axtal'a
ko'o exempenák
aptémól'a wáx'ay;
tén axta wampa',
amhagkok yaqwánxa
allókasek sekyampe.
7 Wampak axta amhagkok
makhawók agko';
axnamok axta m'a
yókxexma meykexa
nak énxet.
8 Wanyehek axta
ekpekhe agko'
eyxánegkesek ma'a
éxchahayam ekyennaqte,
tén han segyettekhane.”
9 Wesse',
emasséssem xép
ma'a énxet'ák nak,
yána kalxeganmok
ektémakxa apkelpaqmeyesma,
wánxa aqsa sekweteya chá'a ko'o m'a
apkelyennaqteyáseykha apyempe'ék,
tén han apkelenmexamap,
10 yókxoho ekhem
ektépeykha m'a kañe'
nak tegma apwányam,
tén han yókxoho axta'a.
Yetnegkek kañe' m'a
ekmaso nentémakxa',
tén han nélenmexamaxche';
yetnegkek nahan
ma'a negmenyexma;
11 sawheykekxók
negyennaqteyáseykha
egyempehek ma'a
apkelyánmagkásamákpexa
nak chá'a énxet'ák,
tén han nélyexancháseykha egmók.
12 Mehetaqnagkók ko'o
m'a xama sénmexma,
sekmowána nak ko'o
magwanmexók chá'a;
mehektámeykmok han
chá'a m'a aptáha nak
chá'a sénmexeykha,
sekmowána nak chá'a
ko'o eyxánegkesek.
13 ¡Xép akke etaqnagkók,
apteme nak sekxegexma,
apteme nak sekxegexma ahagko',
14 sektémo nak chá'a
sekxegexma m'a Dios
tegma appagkanamap apagkok,
yaqwayam ólpaqhetchesaxkohok
yetlo éltaqmeleykha egwáxok,
sektéma nak chá'a sekxegexma
ólweynchamha nepyeseksa
énxet'ák apxámokma!
15 ¡Katlakkas eletsapok
sélenmexma nak ko'o!
¡Exnagwom yetlo
apaqta'ák apkelmaheykegkaxa
nak apkeletsapma,
hakte yetnegkek apkelwáxok
ma'a aqsok ekmaso!
16 Awónmakha sa'
eyke ko'o m'a Dios;
hewagkasek sa' teyp
ma'a Wesse' egegkok.
17 Apaqmeyesmakha sa',
alekxagwaha sa' han
axto'o, taxnám, tén han axta'a,
yeyxhok sa' nahan
ko'o sekpeywa m'a.
18 Hewagkasek sa' teyp ma'a
neyseksa kempakhakma;
megyohok sa' watsapok,
apxámok sa' eykhe etnehek
ma'a sélenmexma nak.
19 Eñak sa' ko'o
sekpeywa m'a Dios,
apteme nak
wesse' apwányam
meyke néxa',
keñe sa'
etnessásekxak mékoho,
hakte melyaqmagkasseykmok
apkeltémakxa m'a,
megyeyek nahan ma'a Dios.
20 Apkelxegexma'a apagko'
apkenmexeykekxa';
meláneykegkok ma'a
aptémakxa axta apkelpaqmeyesma
yaqwayam elásekhakpoho'.
21 Elmaha chá'a m'a
apkelpeywa éltaqmalma nak,
ekyeykhágweykmohol'a
m'a weyke nam'agkok
apyegmenek pexmok agkok,
keñe m'a apkelwáxok nak
élxéneykencha'a m'a kempakhakma.
Elmaha chá'a m'a
apkelpeywa éltaqmalma nak,
ekyeykhágweykmohol'a
m'a pexmok égmenek,
sawo élmahamtakcha'a
eyke m'a apkelpeywa nak.
22 Egkés Wesse' egegkok ma'a
aqsok ekyetnakhassamo nak apwáxok,
sa' ewasqakkasek xép ma'a;
megyohok chá'a eyaqnenek ma'a
énxet apkelyeheykekxoho nak.
23 Dios ahagkok,
megkawegqók sa' chá'a
apkelweynchámeykha m'a énxet'ák
ekyetno nak chá'a apkelyógkexma',
tén han ma'a apkelmopwancha'a
nak chá'a amya'a;
xép sa' epalchesegmak ma'a
kañók agko' nak takhaxpop,
keñe ko'o
may'ásseykmok xép.
© © Enxet Lengua Sur Bible © Paraguayan Bible Society, 2015.