Megkataqmelak agáwhok selyaqye
1 Kóltaqmelchesho sa'
kélháxenmo s'e énxet'ák,
tén han kélyókxoho
kélheykha nak keso náxop,
2 ekxákma nak
aqsok kélagkok,
tén han meyke nak
aqsok kélagkok,
ekha nak kéláyo,
tén han meyke nak kéláyo.
3 Apaqmétek sa' ko'o
yetlo sekya'áseyak,
kapéwhok sa' han
ektáhakxa élchetamso ewáxok;
4 ataqmelcheshok sa'
ko'o élchetagkáseykha
ewáxok ma'a amya'a
segaqhássessamo
nak sentémakxa,
keñe sa' axének
ektémakxa neyseksa
sekpáwasso arpa.
5 ¿Yaqsa katnehek
ko'o weyk ekwa'a
enxoho ekhem ekmaso,
sewakha'a enxoho
m'a sélenmexma
élmasagcha'a nak apkeltémakxa?
6 Ekxámokma aqsok apagkok
akke apkelásenneykekxak ma'a,
elxénmakha chá'a ekxámokma
aqsok apagkok,
7 méko eyke awanchek
kawagkasaxkohok agkok teyp,
méko han kayánmagkasek ma'a Dios,
ekyánmaga ekyennaqte.
8 ¡Méko selyaqye
awanchek kamok
apyennaqte énxet,
9 yaqwayam enxoho
eweynchamha chá'a
meyke néxa,
tén han emallánek
ma'a nétsapma!
10 Hakte agwethok
chá'a eletsapok
apyókxoho énxet,
cham'a apmopwancha'a nak aqsok
tén han ma'a élyeyháxma nak,
keñe pók elmekxak chá'a m'a
aqsok apagkok ekxámokma nak.
11 Enegkenagkok eykhe chá'a
apkelwesey m'a xapop apagkok,
takhaxpop sa' eyke katnehek
apxanák meyke néxa;
¡sa' exmakha chá'a
megkatnégwayam néxa m'a!
12 Háwe apha meyke
néxa m'a énxet,
megkeyxek ekxámokma
aqsok apagkok,
eletsapok chá'a
ektémól'a aqsok nawha'ák,
13 Cháxa ektémakxa
elmassegwók ma'a
apkelásennamakpekxa
apagko' nak chá'a;
cháxa ektémakxa
elmassegwók ma'a
éltaqmeleykha nak
chá'a apkelpeywa
elxénakpekxohok apagko'.
14 Nétsapma chá'a
éláneykha xa énxet'ák nak,
eknaqleykekxa chá'a
m'a takhaxpop nak,
máxa aptamheykegkok
ma'a nepkések
yaqwayam la'a etekyók.
Kelsakak sa' agkok,
elmallánek sa'
ma'a éltaqmalma
nak apkeltémakxa,
keñe sa' ma'a
élmasagcha'a nak apkeltémakxa,
kamaskok sa' apkelyennaqte,
takhaxpop sa' etnehek apxanák.
15 Hemallahanchesek
sa' eyke ko'o Dios
ektémakxa ekmowána nétsapma,
hakte héntemekxak sa'.
16 Nágkeytnakhoho apwáxok
apwet'a enxoho xama énxet
kaxámak aqsok apagkok,
tén han apxámásegko enxoho
apxagkok aqsok éltaqmela,
17 hakte apketsekkek
sa' agkok ma'a,
mopwanchek sa' eswok
xama aqsok enxoho,
megkalyetlewek sa'
aqsok éltaqmela
apagkok ma'a
takhaxpop nak.
18 Kapayhekxak sa'
eykhe apwáxok
neyseksa apha,
kaltaqmalmakha chá'a
apkelpeywa exének
ma'a énxet'ák,
eñama ekxámokma
aqsok apagkok,
19 kammok sa' eyke ekhem
yaqwánxa yetsapok,
métekxók sa' chá'a
ekhem éltátchesso.
20 Háwe apha meyke
néxa m'a énxet,
megkeyxek ekxámokma
aqsok apagkok,
eletsapok chá'a
ektémól'a aqsok nawha'ák.
© © Enxet Lengua Sur Bible © Paraguayan Bible Society, 2015.