Apheyk negyeseksa negko'o Wesse' egegkok
1 Dios apteme
negko'o segmasma,
tén han segyennaqtésso,
apteme han sempasmo
ekwa'a enxoho ekmaso negha.
2 Sa' kañék
magaye negko'o xa,
kapaqxek sa'
eykhe xapop,
kalweywagkok sa'
eykhe egkexe m'a
kañók agko' nak
wátsam ekwányam,
3 kapáwak sa'
eykhe awáxok
wátsam ekwányam,
kalnextegmakha sa' eykhe
élyaqyahayam agkok,
kalyawheykha sa'
eykhe egkexe
eñama ekyennaqte
élnextegeykha.
4 Yetneyk xama wátsam
ekpeykessáseykekxo
nak apwáxok Dios
tegma apwányam apagkok,
tegma apkelyawe
apkelpagkanamap apagko',
apagkok nak ma'a
Dios Meyke Ekhémo.
5 Aphegkek Dios
xa kañe' nak,
megyohók sa'
katnégwomhok exma;
Dios sa' nahan chá'a
epasmok ma'a élsaka enxoho.
6 Kalpayheykha chá'a
apatña'ák énxet'ák,
elpexyennók chá'a énxet
apheykha nak apkelókxa,
kapaqxek chá'a xapop
apkellegásawo enxoho
chá'a appeywa énxet'ák
ma'a Wesse' egegkok.
7 ¡Apheyk negyeseksa
negko'o Wesse' ekha
nak apyennaqte!
¡Cha'a apteme
sentaqmelchesso
negko'o m'a Jacob
Dios apagkok nak!
8 Kólteyánegwoho aqsok
sempelakkasso nak agwetak
apkelane Wesse' egegkok
keso náxop:
9 apmasséssekmek kempakhakma,
ekweykmoho m'a néxa xapop
nak keso nélwanmeygkaxa;
apkelekkexchek ma'a yágke,
nekha'a étkók aptemessásak ma'a sawhéwa,
¡apkelwatnékxeyk ma'a
yátnáxeg apkelyenyawasso
apkenchesso nak kempakhakma!
10 “¡Kólwatés kélnápomáxche'!
Kólya'asagkoho sektáha ko'o Dios!
¡Ko'o sekteme néten agko'
nepyeseksa m'a
pók aptémakxa énxet'ák!
¡Ko'o sekteme néten agko'
ekyókxoho keso náxop!”
11 ¡Apheyk negyeseksa
negko'o Wesse' ekha
nak apyennaqte!
¡Cha'a apteme
sentaqmelchesso
negko'o m'a Jacob
Dios apagkok nak!
© © Enxet Lengua Sur Bible © Paraguayan Bible Society, 2015.