Nélmaxnagko néltémo hempasmok Dios
1 Oh Dios,
nenlege egagko' negko'o
séltennáseykha m'a
ẽlyapmeyk nano' axta,
apteméssessamakxa axta chá'a
apkelyennaqtamakxa axta,
cham'a nentámen axta:
2 meyke apmeykha axta
apkelántekkessók xép ma'a
énxet'ák melya'áseyak nak xép,
apkellegassáseykegkók axta
pók aptémakxa énxet'ák,
keñe apkelhesseykmo
ẽlyapmeyk negko'o m'a.
3 Háwe axta apmék,
tén han sókwenaqte
élmallahanchesso m'a ẽlyapmeyk;
háwe axta apma xapop ma'a.
¡Xeyep apmopwána
axta keñamak
tén han apyennaqte!
¡Xeyep apha nepyeseksa
axta keñamak,
hakte apkelásekhayók axta!
4 ¡Wesse' Apwányam ahagkok!
¡Dios ahagkok!
Xép axta apkelmallahanchesso
énxet'ák apagkok;
5 xép sempasmo axta keñamak
negmenxanma m'a nélenmexma;
¡xép apwesey axta keñamak
nentemessáseykekxo
kóneg ma'a ektáha axta
chá'a segketámeyam!
6 Magwáyók ko'o
yágke ahagkok,
tén han sókwenaqte ahagkok
hemallahanchesek;
7 xép keñamak
negmassésseykmo
m'a nélenmexma nak,
xép aptemessáseykekxa'
mékoho m'a
sẽltaqnagko axta chá'a.
8 ¡Oh Dios,
kaqheykha sa' chá'a
negko'o egwáxok xép,
ólpeykeshok sa'
chá'a apwesey!
9 Keñe segkexaya kaxwo;
mékoho entemessásekxa'.
Massék apkelyetlawa m'a
sẽlpextétamo egagkok nak.
10 Apkeltamhók xép
ónyahagkok apmonye'e
m'a nélenmexma;
ẽlmenyexchásegkek aqsok
egagkok ma'a sẽltaqnagko nak,
apkelsákxeyk ma'a apmakókxa
enxoho chá'a elsakxa'.
11 Máxa nepkések
entemessásak sẽlmésa
kélnaqleykekxal'a aptekyómakxa;
ẽxpánchessek sẽlya'asa
nepyeseksa m'a énxet'ák
melya'áseyak nak xép;
12 meyke ekmomnáwa agko'
apkexakhák énxet'ák apagkok,
méko han aqsok ekwetassama
eñama apkexakha.
13 Nélasmésamaxche
enteméssessók;
ẽltaqnaweykegkek ma'a
apheykha nak negyáwa',
ẽlya'ásseykmek han chá'a.
14 Apkeltémók chá'a exchep
hẽlasmaksek ma'a
melya'áseyak nak xép;
egwet'ak agkok chá'a,
élyeykesha chá'a
apqatkok hegya'ássók.
15 Yókxoho ekhem ko'o
sélteméssesso mékoho;
ekháxaheykha sekmegqakto,
16 eñama m'a
sélenmexma nak,
apmáheyo nak
chá'a hektámegma',
tén han hetaqnók,
tén han hetwasagkoho'.
17 Keso sentémakxa
nak negko'o,
háwe eñama
megkaxeyenma nak
egwáxok xép.
¡Magyetnakhassók
ma'a ekhémo mók
nélpaqhetchásamáxkoho apagkok!
18 Megkaxeyenmak
egwáxok agyenyók xép,
mólyetnakhágweykmok han
ma'a ámay apagkok nak.
19 Keñe exchep
sennaqtawáseykegkoho
segkexakhagweykmo
m'a élleykegkaxa nak
semheg nawha'ák éllo.
¡Egáhakkassegkek
ekyáqtessóxma ekmaso!
20 Ẽlwagqámeykegkek axta
agkok negko'o exchep, Oh Dios,
nélpeykasawo enxoho m'a aqsok
kéláyókxa eñama nak mók nekha,
21 ey'asagkohok axta exchep,
hakte apya'ásegkok xép
ektémakxa nak ekpaqméteykha
kañók agko' apwáxok énxet.
22 Ketók eyke chá'a
negko'o nentekyómakxa
eñama negyetleykha exchep;
máxa ẽlteméssessók ma'a
nepkések kélnaqleykekxal'a
aptekyómakxa.
23 ¡Exatakha', Wesse'!
¿Yaqsa ektáha aptena nak?
¡Ná hegkexáwho apagko' aqsa!
24 ¿Yaqsa ektéma
apyexanmoma nak?
¿Yaqsa ektéma
megkaxeyenma nak
apwáxok negko'o,
néllegeykegkoho egagko' nak?
25 Nélyelqamáxcheyk negko'o,
ẽlyettelegwáseykha náxop,
mékoho ẽltemessáseykxa',
náxop negheykegkok.
26 ¡Etnemekxa néten,
hempásegwata',
hẽlwagkasseta teyp,
eñama ekyawe segásekhayo!
© © Enxet Lengua Sur Bible © Paraguayan Bible Society, 2015.