Nélmaxnagko néltémo hempasmok Dios
1 Wesse', ná hepaqhetches
aqsa ko'o ekyennaqte
eñama setaqnagko,
ná heñássesagkoho aqsa
ko'o aplawa enxoho.
2 Élyaqxakkak ko'o m'a
yágke aktek apagkok,
¡etekpogkek han apmek
señassásegkoho!
3 Aplo keñamak
eklegágkoho sekyókxa,
méko ektaqmelakxa
enxoho exchakkok,
eñama may'assáxma
4 Eyeykhágweykmók
ko'o may'assáxma;
yentexók agko',
malenmáxamáxche'.
5 Seyeyháxma ko'o
keñamak élesógweykmo
agko' ma'a sélyense,
keltahapmek nahan.
6 Yókxoho ekhem
ekyaqhápeykha ewáxok,
sekháxaheykha,
tén han sélapwayam.
7 Mexanmeyk agko' émpehek;
¡eklegeykegkók ekyókxoho émpehek!
8 Ekyelqamáxcheyk ahagko',
meyke sekyennaqte temék;
¡legeykegkók ewáxok,
eyápentegkessegkek ekmáske!
9 Wesse',
apya'ásegkok xép
ekyókxoho aqsok
sekmámenyého,
¡megkaxyánegkessók
ektémakxa seyápentegeykha!
10 Tayha agko' egkenyek,
eyenyókek sekyennaqte,
¡wokmok ahaqta'ák élhánaqte!
11 Weykmók nahan
mehepetchegweyktámho
m'a sélxegexma'a
sélásekhayo nak,
tén han ma'a énámakkok
ahancha'awo' nak,
apcháya m'a sélyense.
12 Kelhanma chá'a
epekkenchessók emonye' m'a
apmáheyo nak chá'a heyaqhek;
hexének chá'a hemasséssók
ma'a apmáheyo nak chá'a
hetnéssessamhok exma ekmaso,
yókxoho ekhem élxeyenma
apkelwáxok hesexnenak ko'o.
13 Máxa meyke eheyk'ák
akke ko'o ektemék,
máxa mañeya ektemék;
mapaqmeyesmak han,
máxa ektemék ma'a
meyke sekpeywal'a.
14 Máxa ektemék
ko'o m'a énxet meñél'a
ektemegweykmoho exma,
megyátegmowéyak la'a
eñak apxénamap.
15 Wesse',
Dios ahagkok,
élhaxanmeyk
eyke ko'o exchep
heyátegmakkasagkok.
16 Wánxa eyke aqsa
sélmaxneya exchep,
maltamho ko'o wasmésaxche',
tén han kalpayhekxak
apkelwáxok énxet'ák
eñama sektéyam.
17 Ketók ko'o
sekyaqnenmakxa';
meheyamasmak xama
enxoho seklegeykegkoho.
18 ¡Axének sa'
ko'o may'assáxma,
hakte tawáseykha
élchetamso ewáxok!
19 Apxámágkek
ko'o sélenmexma,
apxámok ma'a
setaqnagko nak ko'o
meykexho ektáhakxa.
20 Ekmaso chá'a
apyaqmagkáseykekxak
sekteméssessamakxa ektaqmela;
élenmexeykekxeyk chá'a
ko'o eñama séltémo
alának aqsok ektaqmela.
21 Wesse'
¡ná heyenyow ko'o exakko'!
Dios ahagkok,
¡ná heyenyow aqsa ko'o!
22 Dios, Sewagkasso nak chá'a teyp,
epekhaksoho hepásegwata'.
© © Enxet Lengua Sur Bible © Paraguayan Bible Society, 2015.