Wesse' yeyxho negko'o nélmaxnagko
1 Wesse',
apteme nak semasma,
ekwóneyha ko'o exchep.
¡Heyátegmowák sa'!
Sa' agkok heyátegmowágkok,
axhok sa' ma'a énxet'ák
apkeletsapma nak.
2 Yeyxho sa' sekwóneykha
séltamho enxoho hepasmok,
sélya'asa enxoho emék ma'a
ekpayho nak apyetnakxa
tegma appagkanamap
apagkok aptaqmalma.
3 Ná heñássesagkoho
aqsa xamo' ma'a
élmasagcha'a
nak apkeltémakxa,
nágyoho hetnehek ma'a
ektamheykegkaxa nak
apkeláneykegkoho nak
aqsok ekmaso,
negane nak
kaltaqmeláha apkelwáxok
elának pók,
láneyók eyke m'a
aqsok élmasagcha'a.
4 Ellegássesagkoho
eñama apkeltémakxa
élmasagcha'a,
exnésho sa' ma'a
apkeltémakxa nak;
ekhawo nak ektémakxa
aqsok ekmaso apkeláneyak.
5 Megkalxeyenmak
apkelwáxok ma'a
aqsok apkelane axta
Wesse' egegkok,
¡emasséssók sa' meyke
apkelánteyapwayam!
6 ¡Apcheymákpoho
sa' chá'a kólteméssesek
Wesse' egegkok,
hakte apháxenmok
ko'o sélmaxnagko!
7 Wesse' egegkok apteme
ko'o sénnaqtésso;
tén han semasma;
axta ko'o ay'ásseykmok,
epasmomchek axta.
Payhekxeyk ko'o ewáxok,
anneykmaksek sa',
agkések sa' ekxeyenma
ewáxok Wesse' egegkok.
8 Wesse' egegkok
apkelyennaqtésso
m'a énxet'ák apagkok;
tén han appasmo,
apyexánegweykekxexa
m'a wesse' apwányam
apkelyéseykha nak.
9 Wesse',
elwagkas teyp
énxet'ák apagkok;
elmésák éltaqmalma
apheykha m'a ektáha
nak xép apagkok.
Eltaqmelches aptémól'a
keláneykha nepkések;
¡elqeynmakha chá'a
meyke néxa!
© © Enxet Lengua Sur Bible © Paraguayan Bible Society, 2015.