Ektaqmeleykha egwáxok eyáxñeyo nak nentémakxa
1 Wesse',
hexén ko'o
meyke sektémakxa,
hakte malaneyk
ko'o xama aqsok
ekmaso neyseksa
sekweynchámeykha.
Wesse',
may'ásseykmok ahagko'
ko'o exchep;
2 elano ko'o sektémakxa,
¡hékpelkoho!
¡elano ektémakxa nak
élchetámeykha ewáxok,
tén han ma'a kañók
agko' nak ewáxok!
3 Mehelwánaqmágweykmok ko'o
m'a segásekhayo nak,
mayenseykmok han xép;
4 mapaxqeykha han ma'a
apkelmopwancha'a nak amya'a,
malyetleykha han ma'a
apkelmeyókásamákpoho
apagko' nak chá'a apkeltémakxa.
5 Ataqnawhok chá'a ko'o
m'a apchaqneykekxa nak
élmasagcha'a apkeltémakxa;
¡mapaxqeykha xama enxoho m'a
élmasagcha'a nak apkeltémakxa!
6 Wesse', émenyeyk
ko'o eypetchegwomhok
ekwatnamáxchexa nak
aqsok apagkok,
yetlo sélyenyesso emék,
hakte méko táhak may'assáxma,
7 tén sa' anneykmaksek alpeykesho',
axének sa' ma'a ektémakxa nak
chá'a apkelane aqsok éltaqmalma.
8 Wesse', eyásekhayók ko'o m'a
tegma appagkanamap aphamakxa nak,
ekyetnamakxa nak apcheymákpoho.
9 Náheyaqha aqsa ko'o xamo' ma'a
énxet'ák melya'assáxma nak;
Nágyoho aqsa hetnehek ma'a
ektamheykegkaxa nak énxet'ák
ekyetno nak chá'a apkelyógkexma',
10 cham'a ekmaso
agko' nak aqsok apkelánéyak,
tén han apkelmomo
nak chá'a selyaqye
yaqwayam mexének
ektemégweykmoho exma.
11 Méko eyke
ko'o aqsok ekmaso
sélane neyseksa
sekweynchámeykha,
¡hewagkas teyp,
kapyósho hélano'!
12 Méko élyapwátéyak
xapop ma'a sénmeykegkaxa,
¡apcheymákpoho sa'
chá'a ko'o atnéssesek
Wesse' egegkok
nápaqta'awók ma'a
énxet'ák apagkok!
© © Enxet Lengua Sur Bible © Paraguayan Bible Society, 2015.