Negmeneykmasso negmallanma
1 Wesse' egegkok,
payhekxeyk apwáxok
wesse' apwányam,
hakte xép
apmeyásak apyennaqte;
¡Payhékxók agko' apwáxok
hakte xép apmeyásak apmallanma!
2 Apméssek xép
ekmámenyého nak apwáxok;
memyágweykxak apmésa m'a
aqsok apkelmaxneyeykha.
3 Apkelanyexágkek yetlo
apkelmésso aqsok éltaqmalma,
apketchessessek han apqátek
ma'a apketchesso apqátek
sawo ekyátekto ekmomnáwa.
4 Apkelmaxnakkek axta
ekyennaqte apnények,
apméssek axta han:
cham'a ekwenaqte nak apha,
tén han meyke néxa.
5 Xép appasmo
keñamak ekyáya
m'a apmopwána;
apméssegkek
apcheymákpoho,
tén han apxénamap ektaqmela.
6 Megkamassegwomek sa'
apteméssesso apkeleñémo;
kapayhekxohok agko'
sa' chá'a apwáxok ma'a
apha enxoho xamo' xép.
7 Xép, wesse' apwányam,
megkóltaqhesha sa' chá'a exchep,
hakte mey'ásseykmok
chá'a m'a Wesse' egegkok;
¡hakte mey'ásseykmok chá'a
m'a segásekhayo nak
Meyke Ekhémo!
8 Elmok sa'
chá'a exchep
yetlo apmopwána
m'a apyókxoho
apkelenmexma nak;
elmok sa' ma'a
aptaqnagko nak
chá'a exchep;
9 emasséssók sa'
ektémól'a táxa axagkok,
cham'a apwa'a sa'
yaqwayam elyekpelkoho'.
Esawhohok sa' elwatnek
Wesse' egegkok
yetlo aplo yahak ma'a
táxa segaqhamól'a.
10 Emasséssók sa'
nélwanmeygkaxa,
tén han nepyeseksa
énxet'ák ma'a apketchek,
tén han aptawán'ák neptámen.
11 Emáwhok sa' eykhe
etnéssessamhok exma
ekmaso exchep,
elánekxak sa' eykhe
apkelpeywa yaqwánxa
etnéssesek yenmexek xép,
megkatyepek sa' eyke
yaqwánxa etnahagkok,
12 hakte xép sa'
emenxenek ma'a,
emátchesek sa'
yágke apagkok
ekpayhókxa nak
apchaqneykegkaxa'.
13 Wesse',
¡exnekxa néten
yetlo apmopwána!
¡Ólátsaha sa' yetlo
nélmeneykmasso
eñama apmallanma!
© © Enxet Lengua Sur Bible © Paraguayan Bible Society, 2015.