Nélmaxnagko néltémo ólmallanagkok
1 Wesse' egegkok sa' xép
yátegmowagkok eyesagko
enxoho ektáhakxa apha;
Jacob Dios apagkok
sa' emyók xép.
2 Sa' yenyeyk
yáphássesek xép
yaqwayam epasmok ma'a
tegma appagkanamap nak Sión.
3 Kaxének sa' chá'a
apwáxok ma'a
ekyókxoho aqsok
apmésso naqsa nak chá'a,
emok sa' takha' yetlo
ekleklamo apwáxok ma'a
aqsok apkelwatno nak xép.
4 Elának sa' ekyókxoho
m'a ekmámenyého
nak chá'a apwáxok xép,
esawhohok sa' elának
ekyókxoho m'a ekxeyenma
nak apwáxok elána'.
5 Keñe sa'
negko'o ólátsaha
kalpayhekxak egwáxok
eñama apmallanma,
ólya'aksek sa'
néten bandera
yetlo nenxeyenma
apwesey Dios egagkok.
¡Wesse' egegkok sa'
elának ekyókxoho aqsok
apkelmaxneyeykha nak!
6 Ekya'ásegkók ko'o
Wesse' egegkok
egkések apmallanma m'a
wesse' apwányam
ektáha nak apkelyéseykha;
ekya'ásegkók yátegmowagkok
ma'a aphamakxa nak
néten ekpagkanamaxche',
ekya'ásegkók egkések
ekxámokma apkelmalláneyak
yetlo apmopwána.
7 Nápakha énxet'ák
chá'a yásenneykxak ma'a
yátnáxeg apkelyenyawasso
apkenchesso nak kempakhakma,
nápakha han chá'a
elásenneykxak ma'a
yátnáxeg apkelchánte;
keñe negko'o
negásenneykekxo chá'a
m'a Dios Wesse' egegkok.
8 Kalyelqaxkohok eyke
chá'a apyay'ák ma'a,
keñe elyaqnenek chá'a,
keñe negko'o,
mólyaqnenek chá'a,
ólchempekxak chá'a néten.
9 ¡Wesse',
emallahanches xép ma'a
wesse' apwányam nak!
¡Hegátegmowák chá'a
negko'o negwóneyncha'a enxoho!
© © Enxet Lengua Sur Bible © Paraguayan Bible Society, 2015.