Méko kaxhok ma'a aqsok nenxaweykekxa eñama nak Dios
1 ¡Dios ahagkok,
hetaqmelches ko'o,
hakte eyásenneykekxeyk
ko'o exchep,
ektémakxa nak
xép sentaqmelchesso!
2 Ektáhak ko'o seyáneya exchep se'e:
“Xép Wesse' ahagkok,
éñamakxa ekyókxoho
aqsok ahagkok;
méko aghéshok xép.”
3 Kalyeyha'ak ma'a aqsok
kéláyókxa nak apchókxa,
etnehek chá'a elxének
ma'a ekleklamo nak chá'a
apkelwáxok elyetlakxa',
4 cham'a apxámáseyak nak
chá'a aqsok apcháyókxa,
apkelyetleykekxa nak chá'a
yetlo melyenseyam.
¡Mapasmekxeyk ko'o
m'a apkelánéyak nak
aqsok apkelnapma!
¡Maxének xama
enxoho élwesey m'a
aqsok apkeláyókxa!
5 Wesse',
xép apwánxa
apagkok segkésso
aqsok eyeyméxchexa;
apyánchessamók
xép segkésso
seyemleykekxoho,
xép apmeykha sekyennaqte.
6 Xapop ektaqmalma agko'
ko'o epayhémók sekxawe;
¡Keltásók agko' aqsok
sepayhémo nak sélxaweykekxa!
7 Alpeykeshok sa'
ko'o Wesse' egegkok,
epaqhetchesek chá'a
ewáxok axta'a hélxekmósagkok.
8 Malwátéssemek
chá'a ko'o ekxéneykha
ewáxok Wesse' egegkok,
aphegkek ko'o neheykha'
ekpayho sélya'assamakxa',
méko kawának hetegkesek.
9 Cháxa keñamak
eyátseykencha'a
nak ko'o ewáxok,
tén han
ekpayheykekxo ewáxok.
Méko sa'
chá'a katnehek
ekyókxoho sekyókxa,
10 hakte megyohok
sa' axnamok ma'a
apkelmaheykegkaxa nak
chá'a apkeletsapma,
¡megyohok sa'
axnamok kañe' máxek
ko'o sektáha nak xép
apkeláneykha meyenyaweykha!
11 Hexekmósek sa'
ko'o exchep ma'a
ámay ekyennaqte nak
egnények agyetlakxa'.
Yetnegkek ekpayheykekxa
egwáxok ma'a
aphakxa nak xép,
tén han ekmátsa
egwáxok meyke néxa m'a
nekhók aphakxa nak xép.
© © Enxet Lengua Sur Bible © Paraguayan Bible Society, 2015.