Énmexmók ko'o aphakxa exchep
1 Wesse',
ekwóneyha ko'o exchep,
¡epekhaksoho exegma'!
¡yeyxho chá'a sekpeywa
sekwóneyncha'a enxoho!
2 Yána kaxhok
ko'o sélmaxnagko
aphakxa m'a
aqsok ekmátsa
nak ekpaqneyam
éten agkok,
yána kaxhok
aqsok kélmésso
naqsa nak chá'a
taxnám ma'a
sélya'asso nak
chá'a néten emék,
3 Wesse',
hepekkenches
ko'o xama apmasma nak
chá'a apaqmétek ekmaso;
hélánesagkoho chá'a
sekpeywa peya
enxoho chá'a apaqmétek.
4 Nágyoho ko'o
kaxének ewáxok
alának aqsok ekmaso;
nágyoho alyetlawha m'a
apkeláneykegkoho nak
chá'a apkeltémakxa ekmaso,
essenhan apasmok
apkeláneyak ektámáxche
ekyawe m'a
élmasagcha'a nak
apkeltémakxa.
5 Hepasmok chá'a
ko'o señassásegkoho
enxoho m'a énxet
meyke nak aptémakxa,
máxa sokmátsa
ekmátsal'a ekpaqneyam
chá'a katnehek
ma'a sepaqhetchesa
enxoho ekyennaqte.
Mataqnókkehek
chá'a ko'o xa
sepékessáseyak nak;
alenxanmagkohok sa'
aqsa sélmaxnagko,
neyseksa setekpageykha.
6 Kólchexeynták sa'
néten meteymog ma'a
apkelámha amonye'e
apagkok nak ma'a
élmasagcha'a apkeltémakxa,
elya'ásegwók sa'
ektáha naqso' ma'a
sektáhakxa sekpeywa.
7 Kólexpánchesha sa'
apexchakkok ma'a
ekpayho nak takhaxpop,
ektémól'a kólpeynchok
xapop namyep.
8 Wesse',
énmexmók ko'o
aphakxa exchep.
Ekye'eykekteyk ko'o
exchep séltémo hemyók:
ná heyenyow aqsa.
9 Nágyoho
hemok kelhanma
sélpekkenchessama
nak emonye';
cham'a apkelhanma
nak énxet'ák
élmasagcha'a apkeltémakxa.
10 Kalmekxohok sa'
agkok apkelhanma
m'a élmasagcha'a
nak apkeltémakxa,
keñe sa' ko'o axog aqsa
meyke setnahakxa.
© © Enxet Lengua Sur Bible © Paraguayan Bible Society, 2015.