Ektaqmeleykha nempeywa anxénmakha Dios segánamakxa apagkok
1 Apkeleñémo énxet
meyke nak apkelane
xama aqsok ekmaso,
apyetlókasso nak chá'a
m'a ektémakxa nak
Wesse' egegkok
segánamakxa apagkok.
2 Apkeleñémo
apkelane nak chá'a
m'a apchánamakxa
nak chá'a antéhek,
apketamsamo apagko'
nak chá'a ekweykmoho
kañók agko' apkelwáxok,
3 melánéyak nak
chá'a xama enxoho
m'a aqsok ekmaso,
apkelyetlo nak chá'a
m'a Wesse' egegkok
ámay apagkok.
4 Apkeltémók
chá'a exchep
kalanaxchek ma'a
apkeltémókxa nak antéhek
meyke kélyetnakhásseyam.
5 ¡Émenyeyk eykhe
ko'o mayensemek
sélyeheykekxoho m'a
segánamakxa apagkok nak!
6 Méko katnehek ko'o
xama aqsok semegqasso
sélana enxoho ekyókxoho m'a
apkeltémókxa nak antéhek.
7 Alteméssesek sa' chá'a
ko'o apcheymákpoho
yetlo ekpéwomo
élchetámeykha ewáxok,
séltámeka sa' ma'a
apchánamakxa nak
antéhek ekpéwomo.
8 ¡Émenyeyk
ko'o alának ma'a
segánamakxa apagkok!
¡Ná heyenyow
chá'a xama enxoho!
9 ¿Háxko etnehek
elanagkohok aptémakxa
wokma'ák elának
aptémakxa ekpéwomo?
¡Etnehek ma'a ektémakxa
nak xép appeywa!
10 Étamsamók
agko' ko'o exchep
ekweykmoho kañók
agko' ewáxok;
nágyoho ayenyók ko'o m'a
apkeltémókxa nak antéhek.
11 Ekpekkenmeyk
ko'o ewáxok ma'a
appeywa nak xép,
yaqwayam enxoho
malanyek may'assáxma
nápaqto' xép.
12 ¡Wesse',
élpeykessamók
chá'a ko'o exchep!
¡Hélxekmós ko'o
segánamakxa apagkok!
13 Axének sa' chá'a
ko'o ekyókxoho m'a
apchánamakxa nak antéhek,
apxeyenma nak chá'a exchep.
14 Kapayhekxohok
agko' sa' ko'o ewáxok
eytlakxak ma'a
apchánamakxa nak antéhek,
megkaxók sa' ma'a
ekweykenxa nak chá'a
ekpeykáseykekxa ewáxok
ekxámokma aqsok ahagkok.
15 Altámesaxchek sa'
ko'o m'a apchánamakxa
nak antéhek,
alanok sa' chá'a m'a
ámay apagkok nak.
16 Hepeykessásekxak
sa' ko'o ewáxok ma'a
segánamakxa apagkok,
mehelwánaqmágwomek
sa' ma'a appeywa.
17 ¡Kataqmalmakha
chá'a ko'o apwáxok hélano',
ko'o sektáha xép apkeláneykha!
¡Alyahakxohok sa'
chá'a ko'o appeywa!
18 Hexekmós
yaqwayam sa' ko'o
ótak ma'a aqsok éltaqmela
nélxekmowásamáxche
apagkok nak.
19 Ko'o sekteme
sekwe yaqwatakxoho
keso náxop;
ná hekpósses ko'o m'a
apkeltémókxa nak antéhek.
20 Legeykegkók ko'o
ewáxok yókxoho ekhem,
eñama sekmámenyého
ay'ásegwók ma'a
apchánamakxa nak antéhek.
21 Elpaqhetchesek
chá'a exchep ma'a
megkalyexnegwayam nak
chá'a apkelpeywa,
tén han ma'a
apkeltaqnómap nak chá'a,
apkelyetnakhasso nak chá'a
m'a apkeltémókxa nak antéhek.
22 Hétnakhásses
ko'o m'a sénmexeykha
tén han sewanyeykha,
hakte éláneyak chá'a
ko'o m'a apchánamakxa
nak chá'a antéhek.
23 Elanagkokxak sa'
eykhe aptamhágkaxa
emáwhok hetnéssessamhok
exma ekmaso m'a
kelwesse'e nak,
altámesaxchek sa'
eyke aqsa ko'o
segánamakxa apagkok,
ko'o sektáha nak
xép apkeláneykha.
24 Hepeykessásekxohok
chá'a ko'o ewáxok ma'a
apchánamakxa nak chá'a antéhek;
cha'a ekteme ko'o
sepaqhetcháseykha chá'a m'a.
25 Ketók ko'o sétsapmakxa';
¡hegkés sekyennaqte,
ekhawo aptémakxa
nak appeywa!
26 Éltennassegkek ko'o
exchep sektémakxa,
eyátegmoweykegkokxeyk han.
¡Hélxekmós ko'o
segánamakxa apagkok!
27 Hegkés ko'o sekya'áseyak,
yaqwayam enxoho eytlók ma'a
apchánamakxa nak antéhek,
hakte émenyeyk ko'o
altámesaxchek ma'a
aqsok éltaqmalma
apagkok nak.
28 Eyeykhágweykmók
ko'o sélekxagweykha
seklegeykegkoho ekmáske;
¡hénnaqtés ko'o,
ekhawo ektémakxa
nak xép appeywa!
29 Nágyoho ko'o
eytlók ma'a ámay
ekyetnamakxa nak
negmowána amya'a,
hey'assásegwom ko'o
m'a nélxekmowásamáxche
apagkok nak.
30 Élyéseykha ko'o m'a
ámay ekmámnaqsoho,
émenyeyk ko'o m'a
apchánamakxa nak antéhek.
31 Wesse',
ekyetlamchek ko'o m'a
apchánamakxa nak antéhek,
¡nágyoho amegqáwhok ahagko'!
32 Hepekhésha chá'a
ko'o alának ma'a
apkeltémókxa nak antéhek,
hakte hepeykessásekxak
chá'a exchep ewáxok.
33 Wesse',
hélxekmós ko'o
ektémakxa nak
segánamakxa apagkok,
hakte émenyeyk ko'o eytlók
ma'a ekweykmoho néxa.
34 Hegkés ko'o sekya'áseyak,
yaqwayam alának ma'a
nélxekmowásamáxche apagkok nak;
¡émenyeyk ko'o alyahakxoho',
ekweykmoho kañók agko' ewáxok!
35 Héntemekxa ko'o
m'a ámay agkok nak
apkeltémókxa antéhek,
hakte cha'a ekyetnamakxa
ko'o ekpayheykekxa ewáxok.
36 Yána kalkohok
ko'o ewáxok ma'a
apchánamakxa nak antéhek,
nágyoho kámenyéhok
ewáxok ma'a aqsok
élmeñexamaxche nak.
37 Nágyoho ko'o
katsapok egkenyek
alanok ma'a
aqsok mékoho nak;
¡hegkés sekyennaqte,
yaqwayam enxoho eytlók
ma'a ámay apagkok nak!
38 Elána sa' ma'a
séltennassama axta elána',
ko'o sektáha nak apkeláneykha,
apkelánéssamo nak chá'a m'a
ektáha nak chá'a apcháyo.
39 Hétnakhásses
ko'o m'a sektaqnómaxche
seyáya nak chá'a ko'o,
hakte keltásók agko'
ma'a apchánamakxa
nak chá'a antéhek.
40 Émenyeyk ko'o m'a
apchánamakxa nak antéhek,
¡hegkés sekyennaqte,
hakte xép apteme appéwomo!
41 Wesse',
hexekmós ko'o seyásekhayo,
tén han sewagkasso teyp,
ekhawo séltennassama
axta hetnéssesek.
42 Keñe sa' ewanchek
wátegmowagkokxak ma'a
setaqnagko nak chá'a,
hakte may'ásseykmok
ko'o exchep appeywa.
43 Nágyoho
kamassegwók
sekxeyenma amya'a
ekmámnaqsoho,
hakte eyásenneykekxeyk
chá'a ko'o m'a
apchánamakxa nak antéhek.
44 ¡Émenyeyk ko'o alának ma'a
nélxekmowásamáxche apagkok nak,
ekyókxoho ekhem
megkatnégwayam néxa!
45 Keñe sa'
aweynchamha
chá'a eyáxñekxa',
meyke seyekakxa',
hakte ekyetlamchek ma'a
apchánamakxa nak antéhek.
46 Axének sa' chá'a
ko'o apchánamakxa
antéhek nápaqta'awók
kelwesse'e apkelwányam,
mamegqayhek sa' chá'a.
47 Hakte eyásekhayók ko'o m'a
apkeltémókxa nak antéhek,
hepeykessásekxak chá'a ewáxok.
48 Wásekhohok chá'a
ko'o m'a apkeltémókxa
nak chá'a antéhek,
wámenyéhok han chá'a,
kaxénhok agko' han
chá'a ewáxok ma'a
segánamakxa apagkok nak.
49 Nágkalwánaqma
aqsa m'a appeywa
segkésso axta exchep,
ko'o sektáha nak apkeláneykha,
hakte cha'a keñamak
apkeltémo axta exchep
aleyxmakha m'a,
50 keso setaqmelchessáseykekxa
nak chá'a ko'o ewáxok neyseksa
ekyentaxno ewáxok:
cham'a appeywa segkésso
nak sekyennaqte.
51 Megkayetyapwágweykmok
setaqnaweykha m'a
megkalyexnegwayam nak
chá'a apkelpaqmeyesma,
makke ko'o ayenseykmok ma'a
nélxekmowásamáxche apagkok nak.
52 Kaxénwakxohok
chá'a ewáxok ma'a
apchánamakxa nak
antéhek nano' nak,
Wesse', cha'a
sekweteykxa chá'a
ko'o ektaqmeleykekxa
ewáxok ma'a.
53 Elókassegkek ko'o
m'a élmasagcha'a
nak apkeltémakxa,
apyamasma nak
nélxekmowásamáxche apagkok.
54 Sekmeneykmasso ko'o ektemék
segánamakxa apagkok keso náxop,
sekhamakxa nak yaqwatakxoho.
55 Wesse',
kaxének chá'a ko'o
exchep ewáxok axta'a;
¡émenyeyk ko'o alának ma'a
nélxekmowásamáxche apagkok nak!
56 Keso yaqwayam
nak chá'a alának ko'o s'e:
alyahakxohok ma'a
apchánamakxa nak antéhek.
57 Wesse',
Xép apteme
wánxa ahagkok
neyseksa m'a
ekyókxoho aqsok ahagkok;
ekxénchek ko'o alának
ma'a appeywa nak xép.
58 Ekwasqápeykekxók
ko'o ekweykmoho kañók
agko' ewáxok séltémo
apeykessásekxak apwáxok;
kapyósho sa' hélano',
ekhawo ektémakxa
nak xép appeywa.
59 Kelchetagkassegkek axta
ko'o ewáxok sektémakxa,
tén axta sélyeheykekxoho makham
apchánamakxa nak xép antéhek.
60 Apekhésha chá'a
ko'o alának ma'a
apkeltémók nak antéhek,
yahamók chá'a alána'.
61 Ewakhassegkek
chá'a ko'o kelhanma
m'a élmasagcha'a
nak apkeltémakxa,
mehelwánaqmeyk
eyke chá'a ko'o m'a
nélxekmowásamáxche apagkok.
62 Axta'a eyseksók
chá'a axatakhak
agkések ekxeyenma ewáxok,
eñama élpéwomo m'a
apchánamakxa nak antéhek.
63 Sélxegexma'a ko'o
apyókxoho m'a aptáha
nak chá'a apcháyo,
tén han apkeláneyak
nak chá'a m'a
apchánamakxa nak antéhek.
64 Wesse',
sawheykekxók xép
segásekhayo keso náxop;
¡hélxekmós ko'o
segánamakxa apagkok!
65 Wesse',
tásek xép setnéssessamakxa
ko'o sektáha nak apkeláneykha,
ekhawo ektémakxa
nak xép appeywa.
66 Hélxekmós
yaqwayam atnehek
ektaqmalma sekya'áseyak
tén han sekyekpelchémo,
hakte eyáyók ko'o m'a
apkeltémókxa nak antéhek.
67 Xámok axta
aqsok magwaqhémo,
mehenyassáseykegkaxa axta,
élyaheykekxók eyke
kaxwók ma'a appeywa.
68 Tásek xép apwáxok,
aqsok ektaqmela
nahan chá'a elána';
¡hélxekmós ko'o
segánamakxa apagkok!
69 Apkelmopwancha'a
amya'a chá'a etnahagkok
hesexnenak ma'a
megkalyexnegwayam nak
chá'a apkelpeywa,
éláneyak eyke chá'a ko'o
ekweykmoho kañók
agko' ewáxok ma'a
apchánamakxa nak antéhek.
70 Mopwanchek
elya'asagkohok aqsok,
peykáseykekxeyk
eyke ko'o ewáxok ma'a
nélxekmowásamáxche apagkok nak.
71 Tásek setnéssessamakxa
setnessáseykekxo mékoho,
cháxa keñamak séltámeya nak
ma'a segánamakxa apagkok.
72 Tásók agko'
ko'o sélányo m'a
nélxekmowásamáxche apagkok,
megkaxnawok ma'a
ekwánxa nak ekyókxoho m'a
selyaqye nak keso náxop.
73 Xép apagko' axta sélane,
tén han apkelane sekyókxa';
¡hegkés ko'o sekya'áseyak aqsok,
yaqwayam sa' héltamek ma'a
apkeltémókxa nak xép antéhek!
74 Kalpayhekxak sa'
apkelwáxok sét'a enxoho m'a
apcháyo nak chá'a exchep,
hakte may'ásseykmok ko'o
m'a appeywa nak xép.
75 Wesse',
ekya'ásegkók ko'o
apchánamakxa nak antéhek
ekteme élpéwomo,
ekya'ásegkók han
chá'a ekpayhawo m'a
señássásegkoho enxoho chá'a.
76 ¡Setaqmelchessáseykekxa
ewáxok sa' ko'o katnehek
ma'a seyásekhayo nak xép,
séltennassama axta hetnéssesek!
77 Yepyósho ko'o hélano',
tén sa' aweynchamha makham,
hakte atsók agko' chá'a
ko'o kaxének ewáxok
nélxekmowásamáxche apagkok.
78 Elmegqágwakxohok
apagko' sa' ma'a
éleymáxkoho nak
chá'a apkelpeywa,
cham'a setwáseykegkoho
nak chá'a ko'o
meykexho ektáhakxa;
émenyeyk ko'o
kalchetagkasha ewáxok
ma'a apchánamakxa
nak antéhek.
79 Tásek sa' hey'ótak ma'a
apcháyo nak chá'a exchep,
apkelya'áseykegkoho
nak chá'a apchánamakxa
nak xép antéhek.
80 Kalyahakxohok
sa' ko'o ewáxok
ma'a ekyókxoho
segánamakxa apagkok,
yaqwayam sa'
mamegqayhek chá'a.
81 Élhaxanmók
ahagko' ko'o exchep
hewagkasek teyp;
¡may'ásseykmok ko'o
m'a appeywa nak xép!
82 Kelyelqamaxcheyk
ko'o ahaqta'ák
sélhaxanma m'a
séltennassama axta,
atnehek chá'a s'e:
“¿Háxko sa'
ekwánxa ekhem hey'ótak
hetaqmelchessásekxak ewáxok?”
83 Sekwányamók
mékoho eykhe ko'o,
magwásekhamaxche',
makke hélwagqeykmok ma'a
segánamakxa apagkok nak xép.
84 ¿Háxko sa' ekwánxa
kammok néxa sélhaxanma?
¿Yaqsa sa' ekhem
elyekpelchásseshok ma'a
sénmexeykha nak chá'a ko'o?
85 Emétegkessegkek ko'o
máxek ámay ahagkok ma'a
éleymáxkoho nak chá'a apkelpeywa,
cham'a melyetleykekxa nak xép
nélxekmowásamáxche apagkok.
86 ¡Hepásem ko'o,
élyaqmáseykha ko'o
meykexho sektáhakxa!
¡Naqsók agko'
ekyókxoho m'a
apkeltémókxa nak antéhek!
87 Xegkessegkek ko'o
hélmasséssók keso náxop,
makke ayenseykmok ma'a
apchánamakxa nak xép antéhek.
88 Hegkés sekyennaqte,
eñama seyásekhayo,
keñe sa' alának
apchánamakxa nak
xép antéhek.
89 Wesse',
megkamassegwomek
xép appeywa;
¡yetnegkek ma'a néten!
90 Megkamassegwomek
ektémakxa mehenyenyaweykha;
appekkenmeyk xép xapop,
yetnegkek nahan.
91 Heykegkek makham
ekyókxoho aqsok,
ekhawo ektémakxa nak
apchánamakxa antéhek,
kalyahakxohok chá'a
m'a ekyókxoho aqsok.
92 Kaxtemék axta mehegkésso
ekpayheykekxa ewáxok ma'a
nélxekmowásamáxche apagkok,
heyaqhek axta ekyentaxno ewáxok.
93 Mehelwánaqmeyk
sa' chá'a ko'o m'a
apchánamakxa nak antéhek,
hakte cha'a segkésso
ko'o sekyennaqte m'a.
94 ¡Hewagkas teyp,
hakte ko'o sekteme
exchep apagkok,
ekyetlamchek ma'a
apchánamakxa nak antéhek!
95 Apkelhaxanmeyk ko'o
kataqmelekxak seté
m'a élmasagcha'a
nak apkeltémakxa
yaqwayam heyaqhek,
makke ko'o ayenseykmok
ekxéneykha ewáxok ma'a
apchánamakxa nak antéhek.
96 Ekweteyak ko'o
ekyókxoho aqsok,
yetneyk chá'a néxa',
méko eyke néxa m'a
apkeltémókxa nak antéhek.
97 ¡Awanhek ko'o seyásekhayo
nélxekmowásamáxche apagkok!
¡Yókxoho ekhem chá'a
élchetagkáseykha ewáxok!
98 Ahagkok ko'o
m'a apkeltémókxa nak
antéhek meyke néxa;
eyeykhássesseykmok
sekmowána aqsok,
kaxnók ma'a sélenmexma nak.
99 Ekya'ásegkók aqsok,
ekyeykhásseykmók ma'a
sélxekmósso nak chá'a,
hakte xeyenmók agko'
ko'o ewáxok ma'a
apchánamakxa nak antéhek.
100 Ekya'ásegkók aqsok,
ekyeykhásseykmók
ma'a apkelwányam nak,
hakte élyaheykekxók ko'o m'a
apchánamakxa nak antéhek.
101 Meytleykekxak chá'a
m'a ekyókxoho ámay ekmaso,
yaqwayam alyahakxohok
ma'a appeywa.
102 Mayamasmak ko'o m'a
apchánamakxa nak antéhek,
hakte xép chá'a sélxekmowáseyak.
103 Atsók agko'
ma'a appeywa nak,
yeykhásseykmok
ektémakxal'a atwok
yányawhéna' apyegmenek.
104 Apchánamakxa
antéhek keñamak
sekweteya ko'o
sekya'áseyak;
cháxa keñamak
sektaqnagkama nak
ekyókxoho m'a nentémakxa
megkamámnaqsoho nak.
105 Xép appeywa
ekteme cháléwasso
sélsássesso chá'a exma
sekmahágkaxa enxoho chá'a,
séltátchessesso chá'a
m'a ámay ahagkok.
106 Éltennássek axta
exchep alának aqsok,
alának sa' nahan:
¡alának sa' ma'a
apchánamakxa nak
antéhek élpéwomo!
107 Wesse',
eklegágkok ahagko' ko'o;
¡hegkés sekyennaqte,
apxeyenma axta exchep!
108 Wesse',
ema takha' sekmésso
nak ekxeyenma ewáxok,
hélxekmós apchánamakxa
nak antéhek.
109 Hágkaxwe chá'a ko'o
kagketagkoho watsapok,
makke hélwagqeykmok ma'a
nélxekmowásamáxche apagkok nak.
110 Epekkenchessegkek
ko'o kelhanma
m'a élmasagcha'a
nak apkeltémakxa,
makke ayamasmak ko'o m'a
apchánamakxa nak antéhek.
111 Aqsok ahagkok
meyke néxa ko'o m'a
apchánamakxa nak antéhek,
hakte cháxa sepeykessáseykekxa
chá'a ko'o ewáxok ma'a.
112 Ekméssamók
ahagko' ko'o ewáxok
yaqwayam alának ma'a
segánamakxa apagkok,
ekwokmoho sekwagkasa
néxa sekha.
113 Altaqnawhok
ko'o m'a énxet'ák
apkelmopwancha'a
amya'a nak,
eyásekhayók eyke ko'o m'a
nélxekmowásamáxche apagkok.
114 Xép apteme semasma,
tén han setaqmelchesso;
may'ásseykmok
ma'a appeywa nak.
115 ¡Kólántép sekhakxa,
élmasagcha'a nak kéltémakxa!
ekmakók ko'o alának ma'a
apchánamakxa nak
antéhek Dios ahagkok!
116 Hegkés sekyennaqte,
apxeyenma axta exchep,
keñe sa' aweynchamha chá'a;
¡nágyoho katnehek
eyaqhémo sélhaxneykha!
117 Hepásem,
keñe sa' katnehek
meyke ektáhakxa sekha;
keñe sa' alának chá'a m'a
segánamakxa apagkok.
118 Melmehek chá'a
exchep takha' m'a
apkelyetnakhasso nak
chá'a segánamakxa apagkok,
hakte mékoho agko' ma'a
ektémakxa nak chá'a
élchetámeykha apkelwáxok.
119 Máxa aqsok apák
kélchexakha apkelányo
exchep ma'a élmasagcha'a
nak apkeltémakxa
keso náxop;
cháxa keñamak
seyásekhayo nak ko'o m'a
apchánamakxa nak antéhek.
120 Kelpexyennegkek
ko'o ekyókxoho émpehek
seyeye nápaqto' xép,
eyáyók ma'a
apchánamakxa nak antéhek.
121 Malwátésseykmok
chá'a ko'o sélane m'a
aqsok ekpéwomo;
ná heyenyaw aqsa
hegkések ma'a
setwáseykegkoho nak chá'a.
122 Etne sa' sepasmo chá'a;
nágyoho hetwasagkohok ma'a
éleymáxkoho nak apkelpeywa.
123 Kelyelqamáxchek ko'o ahaqta'ák
sélhaxanma hewagkasek teyp,
élhaxanmeyk hemallahanchesek,
apxeyenma axta exchep.
124 Hetnésses ko'o
ekhawo ektémakxa nak
xép segásekhayo,
ko'o sektáha
nak apkeláneykha;
¡hélxekmós
segánamakxa apagkok!
125 Ko'o, xép apkeláneykha.
Hegkés sekya'áseykegkoho,
hakte émenyeyk
ko'o ay'asagkohok
apchánamakxa
nak antéhek.
126 Wesse',
tásek kaxwók xép
elának aqsok,
hakte megkólyaheykekxohok ma'a
nélxekmowásamáxche apagkok.
127 Cháxa keñamak
sekmámenyého nak ko'o m'a
apkeltémókxa nak antéhek,
megkaxnawok ekwánxa
nak sekmámenyého
m'a sawo ekyátekto
ekmomnáwa ektaqmalma.
128 Cháxa keñamak
seyhayo nak hepékessesagkok
ma'a apchánamakxa nak antéhek,
ataqnawhok ko'o
ekyókxoho m'a nentémakxa
megkamámnaqsoho nak.
129 Keltásók agko' ma'a
segánamakxa apagkok nak;
cháxa keñamak
sélyeheykekxoho nak.
130 Hẽlsássesek chá'a
exma sẽltennáseyncha'a
enxoho chá'a m'a appeywa,
kaltamaksek chá'a m'a énxet'ák
meyke nak apkelya'áseyak.
131 Amayhohok agko'
chá'a ko'o amáwhok
ma'a appeywa,
hakte émenyeyk ma'a
apkeltémókxa nak antéhek.
132 Yepyósho ko'o hélano',
apteméssessamól'a chá'a
exchep ma'a apkelásekhayo nak.
133 Hélánesák chá'a
sekxega ekhawo
ektémakxa nak appeywa;
nágyoho kamok ewáxok
ma'a aqsok ekmaso.
134 Hemallahanches
ko'o nepyeseksa m'a
apkelyennaqteyáseykha
nak chá'a apyempe'ék,
hakte émenyeyk ko'o alának ma'a
apchánamakxa nak antéhek.
135 Kataqmalmakha
apwáxok hélanok ko'o,
sektáha nak apkeláneykha,
hélxekmós segánamakxa apagkok.
136 Kelpexyaweykenteyk
ko'o ahaqta'ák égmenek
sélekxagweykha,
hakte megkóláyók ma'a
nélxekmowásamáxche
apagkok nak.
137 Wesse',
xép apteme appéwomo;
kelpéwók han ma'a
apchánamakxa nak antéhek.
138 Kelpéwók ekyókxoho
m'a apchánamakxa nak antéhek,
naqso' nahan.
139 Alwok ahagko' chá'a
ko'o ótak kalwagqamagkok
appeywa m'a sélenmexma nak.
140 Xámok élmalláneyak
ekyekkónamaxche
m'a appeywa nak;
cháxa keñamak
seyásekhayo nak ko'o,
sektáha nak apkeláneykha.
141 Mékoho ko'o,
tén han magwásekhamaxche',
makke hélwagqeykmok ma'a
apchánamakxa nak antéhek.
142 Megkatnégwomek
chá'a néxa ekpéwomo
m'a ektémakxa nak chá'a
ekpéwomo apkelánéseykekxa
apheykha énxet'ák,
naqsók nahan ma'a
nélxekmowásamáxche apagkok nak.
143 Ekweteyak chá'a ko'o
ekyentaxno ewáxok,
tén han may'áseyak sektáhakxa,
hepeykessásekxak eyke
chá'a ewáxok ma'a
apkeltémókxa nak antéhek.
144 Megkatnégwomek chá'a
néxa ekteme élpéwomo m'a
apchánamakxa nak antéhek;
¡hegkés sekya'áseyak,
keñe sa' aweynchamha makham!
145 Wesse',
ekwóneyha exchep
ekweykmoho kañók
agkók ewáxok;
¡heyátegmowák,
hakte émenyeyk
ko'o alának ma'a
segánamakxa apagkok nak!
146 Élmaxnakkek
ko'o exchep,
hepásem yaqwayam
alyahakxohok ma'a
apchánamakxa nak antéhek.
147 Amonye' élseye
chá'a axatakhak yaqwayam
almaxnak hepasmok,
may'ásseykmok ko'o m'a
apxeyenma axta exchep.
148 Mayenmaha chá'a
amonye' ekyáqtésso
yaqwayam kalchetagkasha
ewáxok ma'a appeywa.
149 Wesse',
yeyxho sekpeywa,
eñama seyásekhayo,
hegkés sekyennaqte,
ekhawo ektémakxa nak xép
ekpéwomo segyekpelchémo.
150 Apchágketchessa'ak
ko'o sekhakxa m'a
seyaqmáseykha apkello nak,
makke kalxegkáseykha
elya'asagkohok ma'a
nélxekmowásamáxche
apagkok nak.
151 Wesse',
apheyk xép keto',
naqsók nahan
ekyókxoho m'a
apkeltémókxa nak antéhek.
152 Nanók agko' ko'o
sekya'áseyak ma'a
apchánamakxa nak antéhek,
appekkenmeyk axta
exchep meyke néxa'.
153 Elano ektémakxa
seklegeykegkoho,
hemallahanches,
hakte mehelwagqeykmok ko'o m'a
nélxekmowásamáxche apagkok nak.
154 Hepásem ko'o
ektémakxa nak sekxénamaxche',
hemallahanches neyseksa
aqsok ekyentaxno,
¡hegkés sekyennaqte,
apxeyenma axta exchep!
155 Megkalxegkáseykha
exchep epasmok
ma'a élmasagcha'a
nak apkeltémakxa,
hakte melyetlók
ma'a ektémakxa nak
segánamakxa apagkok.
156 Wesse',
awanhók agko' xép
apmopyósa henlano';
hegkés sekyennaqte,
ekhawo ektémakxa nak xép
ekpéwomo segyekpelchémo.
157 Apxámok ko'o
m'a sélenmexma nak,
tén han setwáseykegkoho nak chá'a,
makke ayamasmak ma'a
apchánamakxa nak antéhek.
158 Megkalchek ko'o
ewáxok alanok ma'a
apkelyenseyam nak chá'a
aptamhéyak melya'ásseyam,
melyaheykekxoho nak ma'a
apkeltémókxa nak antéhek.
159 Wesse', elano
ektémakxa nak ko'o
sekmámenyého m'a
apchánamakxa nak antéhek;
¡hegkés sekyennaqte
eñama seyásekhayo!
160 Ekmámnaqsoho
agko' ekyókxoho
m'a appeywa nak;
kelpéwók nahan
ekyókxoho m'a
apchánamakxa nak antéhek,
megkamassegwomek han.
161 Énmexeykha chá'a ko'o
meykexho sektáhakxa m'a
énxet'ák apkelwesse'e nak,
cháyók eyke ko'o ewáxok
ma'a appeywa nak.
162 Kapeykásekxak chá'a
ko'o ewáxok ma'a appeywa,
máxa m'a énxet apweteykekxal'a
ekxámokma aqsok élmomnáwa.
163 Ataqnawhok chá'a ko'o
m'a ekmowána amya'a nak,
megkalchehek chá'a ewáxok,
eyke eyásekhayók ma'a
nélxekmowásamáxche
apagkok nak xép.
164 Alpeykeshok chá'a
ko'o exchep yókxoho ekhem,
eñama apchánamakxa
antéhek élpéwomo.
165 Awanhek chá'a
katnehek meyke
ektáhakxa apheykha m'a
apchásekhayo nak chá'a
nélxekmowásamáxche apagkok,
méko han awanchek katlápagkasek.
166 Wesse',
élhaxneyk ko'o exchep
hewagkasek teyp,
hakte éláneyak ko'o m'a
apkeltémókxa nak antéhek.
167 Alyahakxohok chá'a ko'o
m'a apchánamakxa nak antéhek,
wásekhohok ahagko' han chá'a.
168 Élyaheykekxók ko'o m'a
apchánamakxa nak antéhek;
¡apya'ásegkok xép
ekyókxoho sektémakxa!
169 Wesse', ema
takha' ko'o sekwóneykha,
¡hegkés sekya'áseyak,
ekhawo ektémakxa nak appeywa!
170 Ema takha' sélmaxnagko;
¡hemallahanches ektémakxa
ekyentaxno sekha,
apxeyenma axta exchep!
171 Malwátéssemek
sa' chá'a sélpeykessamo,
hakte élxekmóssegkek xép
segánamakxa apagkok.
172 Anneykmaksek sa' ko'o
ektémakxa nak xép appeywa,
hakte kelpéwók ekyókxoho m'a
apkeltémókxa nak antéhek.
173 Eleyxmakha sa' chá'a
yaqwayam hepasmok,
hakte élyéseykha ko'o m'a
apchánamakxa nak antéhek.
174 Wesse',
¡émenyeyk ko'o exchep
hewagkasek teyp!
¡Peykáseykekxeyk ko'o ewáxok
nélxekmowásamáxche apagkok nak!
175 Émenyeyk ko'o
aweynchamha chá'a,
yaqwayam alpeykesho';
hepasmok sa' ko'o m'a
ektémakxa nak segyekpelchémo.
176 Ekxegáneykmek ko'o,
aptémól'a nepkések,
¡hey'óta' hektamok!
Mehelwagqeykmok ko'o m'a
apkeltémókxa nak antéhek.
© © Enxet Lengua Sur Bible © Paraguayan Bible Society, 2015.