Dios apmésso apyennaqte wesse' apwányam
1 Aptáhak Wesse' egegkok
apcháneya wesse' ahagkok se'e:
“Exa ekpayhókxa nak
sélya'assamakxa',
ekwokmoho seknegkenchesa
kóneg apmagkok ma'a
apkelenmexma nak.”
2 Esawheyásekxohok
sa' xép apteme
wesse' apwányam ma'a
Wesse' egegkok,
eyeynamo m'a Sión.
¡Etne kaxwók apkeláneykha
m'a apkelenmexma nak!
3 Epasmekxak sa'
énxet'ák apagkok
peya enxoho yempakha'.
Etépekxak sa' aqsa
chá'a wokma'ák apagkok
yókxoho ekhem ma'a
egkexe élpagkanamaxche nak,
ektémól'a yálye ektéyeykmohol'a
amonye' ekteyapma ekhem.
4 Appenchessek han
apteméssesso naqso'
ma'a Wesse' egegkok,
mopwanchek chá'a
epeynchámekxak appeywa:
“Xép apteme
apkelmaxnéssesso
Dios énxet'ák apagkok
megkatnégwayam néxa,
ekhawo ektémakxa axta
aptamheykha Melquisedec.”
5 Apheyk Wesse' egegkok
ekpayhókxa nak
xép apkelya'assamakxa;
emasséssók sa'
apkelwesse'e apkelwányam
ma'a aplawa sa';
6 exének sa' chá'a
yaqwánxa kólteméssesek
ma'a apyókxoho énxet'ák;
ethanchásekxak sa'
mók kélhapák;
¡elpáxqátek sa' kélpátek
ekyókxoho keso náxop!
7 Ének sa' yegmen
ényé m'a ámay nak,
kagkeyásekxak sa'
apyennaqte m'a yegmen.
© © Enxet Lengua Sur Bible © Paraguayan Bible Society, 2015.