Alpeykeshok sa' chá'a ko'o Wesse' egegkok
1 Alpeykeshok sa' chá'a
ko'o Wesse' egegkok
ekweykmoho kañók
agko' ewáxok;
alpeykeshok sa' chá'a
ekyókxoho sekyennaqte m'a
apwesey ekpagkanamaxche'.
2 Alpeykeshok sa' chá'a
ko'o Wesse' egegkok
ekweykmoho kañók
agko' ewáxok;
mehelwánaqmeyk sa' chá'a
xama enxoho m'a aqsok
éltaqmalma apkelane nak.
3 Cha'a meyaqmagkáseykekxa ko'o
ekyókxoho may'assáxma m'a,
tén han setaqmelchesseyam
ekyókxoho sekháxamáxche',
4 apteme semallahanchesso
nétsapmakxa m'a,
tén han seyeykhássesseykmoho
segkésso seyásekhayo,
tén han ektaqmeleykha
apwáxok sélányo,
5 apteme nahan
sélmésso chá'a ekyókxoho
aqsok ektaqmela,
tén han setnessáseykekxa
chá'a étkok, tén han
segkeyáseykekxa
chá'a sekyennaqte,
ektémól'a náta ekyawe.
6 Elyekpelkohok
chá'a Wesse' egegkok
yetlo ekmámnaqsoho
apkelánéseykekxa
apheykha m'a
kélnaqtawáseykegkoho
nak chá'a.
7 Apxekmóssegkek axta
ámay apagkok ma'a Moisés,
keñe aqsok apkelane
m'a énxet'ák Israel.
8 Wesse' egegkok
apteme ektaqmeleykha
apwáxok henlano',
tén han apmopyósa henlano';
tén han mepekhésamap,
awanhek han segásekhayo.
9 Mehenxénchásekxók
chá'a nentémakxa
yókxoho ekhem,
megkawegqók chá'a aplo;
10 mehenteméssessók
ma'a ekpayhawo
nak henteméssesek,
eñama ekmaso nentémakxa,
tén han mólya'assáxma;
11 awanhók agko' katnehek
apkelásekhayo m'a ektáha
nak chá'a apcháyo,
kaxhok ma'a ekwánxa
nak ekyawe néten,
keso xapop nak.
12 Makhawók chá'a
hegya'ássesek ma'a
mólya'assáxma nak negko'o,
ekhawo ektémakxa nak
ekyetno makhawók mók
ma'a teyapmakxa ekhem
tén han taxnegwánxa ekhem.
13 Eláhapmakha
chá'a Wesse' egegkok
ma'a ektáha nak
chá'a apkeláyo,
aptémól'a xama apyáp
elának ma'a apketchek;
14 hakte apya'ásegkok
néñamakxa negko'o
senlane m'a:
apya'ásegkok
nenteme xapop.
15 Hawók ektémakxa
apyennaqte énxet
ma'a pa'at;
etyapok chá'a ektémól'a
pánaqte exnók naxma:
16 wátekhapchek agkok
chá'a éxchahayam,
kamassegwók chá'a,
kamassegwók han
chá'a ekwetamaxche'.
17 Megkamassegwomek
eyke chá'a apkelásekhayo
Wesse' egegkok ma'a
ektáha nak chá'a apcháyo;
megkatnégwomek chá'a
néxa aptaqmelchessáseykekxa
apheykha apyókxoho m'a
aptawán'ák neptámen nak,
18 apkeláneykegkoho nak
chá'a m'a ekhémo mók
nélpaqhetchásamáxkoho apagkok,
meyenseyam nak chá'a
apkelyaheykekxoho m'a
apkeltémókxa nak etnahagkok.
19 Appekkenmeyk aptaháno
Wesse' egegkok ma'a néten,
apsawheykekxók apteme
Wesse' apwányam
ekyókxoho aqsok.
20 ¡Kólpeykesho
Wesse' egegkok
kélyókxoho kélteme
nak apkelásenneykha
kélyennaqte!
Kéxegke kéllane
nak chá'a m'a
apkeltamhókxa enxoho
chá'a kóltéhek,
kélhaxanma nak chá'a
yaqwayam kólyahakxoho'.
21 ¡Kólpeykesho
Wesse' egegkok
kélyókxoho kélteme
nak apkelásenneykha
kélxámokma,
kéllane nak chá'a m'a
apmopmenyého nak!
22 ¡Kólpeykesho
Wesse' egegkok
kélyókxoho kélteme
nak apkelane,
cham'a ekyókxoho
yókxexma aptémakxa nak
Wesse' apwányam!
¡Alpeykeshok sa' chá'a
ko'o Wesse' egegkok
ekweykmoho kañók
agko' ewáxok!
© © Enxet Lengua Sur Bible © Paraguayan Bible Society, 2015.