Negyepetcheykekxa egmók tén han meyke eyeymáxkoho egwáxok
1 Apméssegkek agkok kéxegke Cristo kélmowána kólwasqakkasaxchekxoho', tekkessessek agkok nahan kélwáxok kélmáheyo kóltaqmelchessásekxak apkelwáxok kélnámakkok ma'a kélásekhayo nak, apheyk agkok nahan kélwáxok ma'a Espíritu, kélya'ásegkok agkok nahan kéxegke ektémakxa m'a apmopyósa nak anlanok egmók, 2 hélpeykessásekxa agko' sa' ko'o ewáxok kólweynchamha chá'a yetlo kélhéssamo mók kélwáxok, tén han kélhéssamo mók kélásekhamaxkoho tén han kélhéssamo mók ma'a yaqwánxa enxoho kóllána'. 3 Nágkóllána aqsa chá'a xama aqsok eñama kélenmexamaxche essenhan ma'a éleymáxkoho kélwáxok, kóllána chá'a aqsok yetlo megkeymáxkoho kélwáxok, kélxama nahan chá'a kéméxcheyk kólteméssesek éltaqmalma apkeltémakxa m'a kélnámakkok, keñe kéxegke megkólxének chá'a ektaqmalma kéltémakxa. 4 Nágkólchetam chá'a kélxakcha'awók kéxegke m'a aqsok yaqwayam nak kapasmok, kólchetagkas nahan chá'a aqsok yaqwayam kapasmok ma'a kélnámakkok.
5 Katne kéxegkáxa élchetamso kélwáxok kóllanok kélmók ma'a ektémakxa nak élchetamso apwáxok ma'a Cristo Jesús.
6 Aphawók axta eykhe
m'a aptémakxa nak Dios,
axta eyke elenxáneykmok
apteme aphémo m'a Dios,
7 apyenyeykekxeyk axta aqsa m'a
aptémakxa axta,
apheyásamákpekxók axta m'a
aptémakxal'a kélásenneykha.
Apheyásamákpekxók axta m'a
aptémakxa nak chá'a énxet.
Máxa énxet apagko' axta
aptamheykekxak apwaya,
8 aptemessásamap
apagko' axta nahan mékoho,
ekha apkelyaheykekxoho axta nahan
aptemessásamákpok
ekweykmoho apketsapma,
ekweykmoho apketsapma m'a
néten aqsok ektegyésso.
9 Ékeso éñamakxa
apméssama nak Dios yaqwayam
etnehek néten agko' meyke ekhémo,
tén han ektaqmalma agko' apwesey
neyseksa m'a ekyókxoho kélwesey nak,
10 yaqwayam enxoho
eltekxeyagkok aptapnák apyókxoho
ektáha nak apheykha néten,
tén han keso náxop,
tén han ma'a élmaheykegkaxa nak eghagák
kólteméssesek eyeymáxkoho apwesey m'a Jesús,
11 tén han apyókxoho énxet elya'asagkohok
Jesucristo apteme Wesse',
yaqwayam enxoho kólteméssesek
apcheymákpoho m'a Dios Egyáp.
Énxet'ák apkelyetleykekxa Cristo apteme élseyéxma keso náxop
12 Élyáxeg sélásekhayo, kólyánchessamho sa' ko'o kélteme kélyaheykekxoho sekpeywa keso sekha nak makhawo' kélhágkaxa kéxegke, ekhawo kéltémakxa nak chá'a kélyaheykekxoho sekpeywa, háwe ekwánxa agkok ma'a sekha enxoho chá'a kélnepyeseksa kéxegke. Nágkólyensem chá'a kéllane kéltamheykha yaqwayam enxoho kólsawhegwók kélwagkásamáxche teyp yetlo kéláyo kélagko' ma'a Dios; 13 hakte Dios apteme aptekkessesso chá'a kélnepyeseksa kéxegke m'a kélmámenyého nak chá'a kóllának ektaqmela, tén han apteme chá'a appasmo yaqwayam kólsawhegwomok kéllane.
14 Kóllána chá'a ekyókxoho aqsok meyke kélpaqméteykha ekmaso, tén han meyke kélpaqmeyesma kólxének xama aqsok, 15 yaqwayam sa' métyehek xama énxet ekyetna kéxegke kélsexnánémaxche tén han megkólya'assáxma xama enxoho, kólteme nahan kéxegke Dios apketchek eyáxñeyo kéltémakxa nepyeseksa xa énxet'ák élmasagcha'a nak apkeltémakxa, tén han melya'assáxma. Kélápogwategkek chá'a kéxegke nepyeseksa xa énxet'ák nak, aptémól'a yaw'a ekyáqtésakxaxma keso náxop, 16 megkólyenseykmo cha'a m'a amya'a ekyennaqtéssamo nak egnények. Keñe sa' apkexyekmo enxoho makham ma'a Cristo, ewanchek ko'o keyxkohok sekpeywa alxénmakha kéxegke, hakte ay'asagkohok sa' ko'o megkatnama eyaqhémo m'a ektémakxa nak sélteyásamáxche, tén han ma'a ektémakxa nak sektamheykha. 17 Amátog eykhe ko'o yaqwayam enxoho kasawhaxkohok kélnegkenma kéxegke m'a aqsok kélmésso naqsa nak Dios eñama megkólya'ásseyam, kapayhekxak eyke aqsa ko'o ewáxok, kawakxohok nahan kélyókxoho kéxegke m'a ektémakxa nak ekpayheykekxa ewáxok ko'o. 18 Kalpayhekxa' kéxegkáxa kélwáxok, hélpasmekxa ektémakxa nak ko'o ekpayheykekxa ewáxok.
Timoteo tén han Epafrodito
19 Apkeltamhók sa' agkok Wesse' egegkok Jesús, wáphaksek sa' ko'o Timoteo kélheykegkaxa kéxegke, yaqwayam sa' kapayhekxak ko'o ewáxok añak amya'a ektémakxa kélheykha kéxegke. 20 Hakte mateyk ko'o pók énxet ekhawo nak ko'o ektémakxa élchetamso ewáxok ektémakxa nak ma'a tén han ekmámnaqsoho nak ekxéneykha apwáxok apkeltémo etaksek ma'a yaqwayam nak kapasmok kéxegke; 21 apyókxoho énxet aqsa chá'a aptegyeykegkok apagkok apagko' ma'a aqsok, melchetamsók ma'a aqsok eñama nak Jesucristo. 22 Kélya'áseykegkók eyke kaxwók kéxegke ektémakxa nak aptaqmelchásamákpoho m'a Timoteo, tén han ektémakxa nak sewháneyo ko'o sektamheykha néltenneykha m'a tásek amya'a, máxa hatte aptemék sepasmoma chá'a m'a sektamheykha. 23 Wáphássesek sa' ko'o kéxegke m'a Timoteo, cham'a sekya'ásegwokmo sa' ko'o yaqwánxa hetnehek; 24 makke ay'ásseykmok nahan ko'o Wesse' egegkok peya yának kañehémhok ko'óxa amyekxak ma'a kélheykegkaxa nak kéxegke.
25 Xeyenmeyk nahan ko'o ewáxok wáphaksek kélheykegkaxa kéxegke m'a egyáxeg Epafrodito apteme nak sekxegexma sektamheykha, tén han sélnápomáxkoho xamo', cham'a kéláphasso axta kéxegke yaqwayam hepasmok hegkések ma'a eyeyméxchexa nak ko'o aqsok. 26 Awanhók agko' apkelwetayo kéxegke m'a, yetnakhayók nahan apwáxok, hakte kéllegayak hek han amya'a apháxamákpo. 27 Naqsók axta apháxamákpo, xegkessamók axta yetsapok; apyósek axta eyke apkelányo m'a Dios, háwe axta eyke wánxa apxakkók apmopyósa apkelányo Dios ma'a, ko'o axta anhan, yaqwayam enxoho megkayágwomók ko'o ekyaqhápeykha ewáxok sekweteya nak se'e kaxwo' nak. 28 Cháxa keñamak sekpekheyásawo nak ko'o seyáphasso kélhágkaxa kéxegke, yaqwayam sa' kalpayhekxak kélwáxok kéxegke kélwetákxo sa' makham, yaqwayam sa' megkayaqhapmakha agko' ko'o ewáxok. 29 Kólma sa' takha' yetlo élpayheykekxa kélwáxok, nentémakxal'a anlának egyáxeg nentémo xamo' nak magya'ásseyam Wesse' egegkok, kólteme chá'a kéláyo énxet aptéma nak xa, 30 hakte xegkessamók axta yetsapok eñama apyetleykha m'a Cristo. Axta yeyék apketsapma, ketók axta apketsapmakxa, eñama apkelane aptamheykha xamók ko'o, megkólmowagko axta kóllának kéxegke hélpasmok ko'o.
© © Enxet Lengua Sur Bible © Paraguayan Bible Society, 2015.