Ektémakxa axta apkelxega apkelánteyapma m'a israelitas
1 Keso ektémakxa axta apkelxega israelitas, sekxók apkelánteyapma axta m'a Egipto, yetlo apkelyaqyehéyak apkelxega aptémól'a sẽlpextétamo, apnaqleykha axta m'a Moisés tén han Aarón. 2 Apnaqtáxéseykegkek axta aqsa élwesey yókxexma Moisés apkelchampeykekxexa axta chá'a apkelxega, apkeltémókxa axta etnehek ma'a Wesse' egegkok. Keso ektémakxa axta apkelxega tén han apkelánteyapma chá'a s'e:
3 Apkelánteyepmeyk axta israelitas yókxexma Ramsés ekhem quince eyeynókxal'a apxega apkemha apmonye' pelten ma'a apyeyam, natámen la'a élánamáxchexa m'a ekhem megkólwagqayam Pascua. Apkelánteyepmeyk axta yetlo apkelya'áseykha néten apmeyk nápaqta'awók ma'a apyókxoho egipcios, 4 neyseksa apkelátawanye apketchek átnaha apketkók ma'a apyókxoho egipcios, Wesse' egegkok axta apkelnapma, apkeltémókxa axta kólteméssesek apkelenmexma m'a aqsok apkeláyókxa nak.
5 Apkelánteyepmeyk axta israelitas apkeleñama m'a Ramsés, apkelpakxenweykmek axta m'a Sucot.
6 Apkelánteyepmeyk axta makham apkeleñama m'a Sucot, apkelpakxenweykmek axta m'a Etam, néxa axta m'a yókxexma meykexa nak énxet.
7 Apkelánteyepmeyk axta makham apkeleñama m'a Etam, apkeltaqhegweykmek axta neptámen apkelmeyeykento m'a Pi-hahirot, ekyetnama nak ekteyapmakxa ekhem teyp ma'a Baal-sefón, apkelpakxenweykmek axta m'a ekpayho nak Migdol.
8 Apkelánteyepmeyk axta makham ma'a Pi-hahirot, apkelyeykheykekxeyk axta m'a wátsam ekwányam, apkelweykmek axta m'a yókxexma meykexa nak énxet. Ántánxo ekhem axta apkelxega náxop ma'a yókxexma meykexa nak énxet Etam, apkelpakxenweykmek axta m'a Mará.
9 Apkelxegeykekxeyk axta makham apkeleñama m'a Mará, apkelweykmek axta m'a Elim, ekheykegkaxa axta doce ekteyapmakxa yegmen, élaqneykegkaxa axta setenta áxa, apkelpakxenweykmek axta nahan ma'a.
10 Apkelántépeykekxeyk axta makham ma'a Elim, apkelpakxenweykmek axta m'a nekha nak Wátsam Ekwányam Ekyexwase.
11 Apkelántépeykekxeyk axta makham apkeleñama m'a Wátsam Ekwányam Ekyexwase nak, apkelpakxenweykmek axta m'a yókxexma meykexa énxet nak Sin.
12 Apkelántépeykekxeyk axta makham apkeleñama m'a yókxexma meykexa nak énxet Sin, apkelpakxenweykmek axta m'a Dofcá.
13 Apkelántépeykekxeyk axta makham apkeleñama m'a Dofcá, apkelpakxenweykmek axta m'a Alús,
14 Apkelántépeykekxeyk axta makham apkeleñama m'a Alús, apkelpakxenweykmek axta m'a Refidim, melwetágweykenxa axta yegmen yaqwayam énagkok ma'a énxet'ák.
15 Apkelántépeykekxeyk axta makham apkeleñama m'a Refidim, apkelpakxenweykmek axta m'a yókxexma meykexa nak énxet Sinaí.
16 Apkelántépeykekxeyk axta makham apkeleñama m'a yókxexma meykexa nak énxet Sinaí, apkelpakxenweykmek axta m'a Quibrot-hataavá.
17 Apkelántépeykekxeyk axta makham apkeleñama m'a Quibrot-hataavá, apkelpakxenweykmek axta m'a Haserot.
18 Apkelántépeykekxeyk axta makham apkeleñama m'a Haserot, apkelpakxenweykmek axta m'a Ritmá.
19 Apkelántépeykekxeyk axta makham apkeleñama m'a Ritmá, apkelpakxenweykmek axta m'a Rimón-peres.
20 Apkelántépeykekxeyk axta makham apkeleñama m'a Rimón-peres, apkelpakxenweykmek axta m'a Libná.
21 Apkelántépeykekxeyk axta makham apkeleñama m'a Libná, apkelpakxenweykmek axta m'a Risá.
22 Apkelántépeykekxeyk axta makham apkeleñama m'a Risá, apkelpakxenweykmek axta m'a Quehelata.
23 Apkelántépeykekxeyk axta makham apkeleñama m'a Quehelata, apkelpakxenweykmek axta m'a egkexe Séfer.
24 Apkelántépeykekxeyk axta makham apkeleñama m'a egkexe Séfer, apkelpakxenweykmek axta m'a Haradá.
25 Apkelántépeykekxeyk axta makham apkeleñama m'a Haradá, apkelpakxenweykmek axta m'a Maquelot.
26 Apkelántépeykekxeyk axta makham apkeleñama m'a Maquelot, apkelpakxenweykmek axta m'a Táhat.
27 Apkelántépeykekxeyk axta makham apkeleñama m'a Táhat, apkelpakxenweykmek axta m'a Térah.
28 Apkelántépeykekxeyk axta makham apkeleñama m'a Térah, apkelpakxenweykmek axta m'a Mitcá.
29 Apkelántépeykekxeyk axta makham apkeleñama m'a Mitcá, apkelpakxenweykmek axta m'a Hasmoná.
30 Apkelántépeykekxeyk axta makham apkeleñama m'a Hasmoná, apkelpakxenweykmek axta m'a Moserot.
31 Apkelántépeykekxeyk axta makham apkeleñama m'a Moserot, apkelpakxenweykmek axta m'a Bené-jaacán.
32 Apkelántépeykekxeyk axta makham apkeleñama m'a Bené-jaacán, apkelpakxenweykmek axta m'a yókxexma Hor Guidgad.
33 Apkelántépeykekxeyk axta makham apkeleñama m'a Hor Guidgad, apkelpakxenweykmek axta m'a Jotbata.
34 Apkelántépeykekxeyk axta makham apkeleñama m'a Jotbata, apkelpakxenweykmek axta m'a Abroná.
35 Apkelántépeykekxeyk axta makham apkeleñama m'a Abroná, apkelpakxenweykmek axta m'a Esión-guéber.
36 Apkelántépeykekxeyk axta makham apkeleñama m'a Esión-guéber, apkelpakxenweykmek axta m'a yókxexma meykexa énxet nak Sin, cham'a Cadés nak.
37 Apkelántépeykekxeyk axta makham apkeleñama m'a Cadés, apkelpakxenweykmek axta m'a egkexe Hor, néxa yókxexma nak ma'a Edom. 38 Apchántegkek axta néten egkexe Hor ma'a appasmo apkelmaxnéssesso Dios énxet'ák apagkok Aarón eñama apkeltémo m'a Wesse' egegkok, axta apketsapweykmok nahan ma'a, émha amonyel'a ekxega ekhem pelten cinco, ekweykmo axta cuarenta apyeyam apkelánteyapma israelitas ma'a Egipto. 39 Ciento veintitrés apyeyam apagkok axta weykmok Aarón apketsapma axta m'a néten egkexe Hor.
40 Aplegayak axta nahan amya'a wesse' apwányam cananeos apkeñama axta m'a Arad, aphama axta m'a Négueb yókxexma nak Canaán, apkelwaya israelitas.
41 Apkelántépeykekxeyk axta makham apkeleñama m'a egkexe Hor, apkelpakxenweykmek axta m'a Salmoná.
42 Apkelántépeykekxeyk axta makham apkeleñama m'a Salmoná, apkelpakxenweykmek axta m'a Punón.
43 Apkelántépeykekxeyk axta makham apkeleñama m'a Punón, apkelpakxenweykmek axta m'a Obot.
44 Apkelántépeykekxeyk axta makham apkeleñama m'a Obot, apkelpakxenweykmek axta m'a lié-abarim, néxa yókxexma nak ma'a Moab.
45 Apkelántépeykekxeyk axta makham apkeleñama m'a lié-abarim, apkelpakxenweykmek axta m'a Dibón-gad.
46 Apkelántépeykekxeyk axta makham apkeleñama m'a Dibón-gad, apkelpakxenweykmek axta m'a Almón-diblataim.
47 Apkelántépeykekxeyk axta makham apkeleñama m'a Almón-diblataim, apkelpakxenweykmek axta m'a élámhakxa nak egkexe Abarim, ekpayho nak ekteyapmakxa ekhem teyp Nebo.
48 Apkelántépeykekxeyk axta makham apkeleñama m'a élámhakxa nak egkexe m'a Abarim, apkelpakxenweykmek axta m'a ekpayhegweykenxa nak xapop Moab, nekha nak ma'a Jordán, ekpayho nak Jericó. 49 Bet-jesimot axta nahan cheynamók ma'a apkelpakxenéyak axta m'a nekha Jordán, ekweykekxoho m'a Abel-sitim, ekpayhegweykenxa nak xapop ma'a Moab.
Segánamakxa ekxeyenma nak negma xapop Canaán tén han éxpánchesamaxche'
50 Appaqhetchessek axta Wesse' egegkok Moisés ma'a ekpayhegweykenxa nak xapop Moab, nekha nak wátsam Jordán, ekpayho nak Jericó. Aptáhak axta apcháneya s'e:
51 “Etne sa' elának israelitas se'e: Kélyeykhákxeyk sa' agkok kéxegke m'a wátsam Jordán, kélántaxna sa' ma'a apchókxa Canaán, 52 kólántekkes sa' apyókxoho énxet apheykha nak ma'a apchókxa, kólmasséssessem sa' ekyókxoho m'a meteymog kéleykmássesso apkeláncháseyak nak, tén han ma'a kélpeykáseykekxa nak chá'a sawo kéllane kéleykmassáseykha, kólpalchesses sa' nahan náxop ekyókxoho m'a apkelpeykessamókxa nak chá'a aqsok ekhéyak nak ma'a néten egkexe. 53 Kólma sa' ma'a apchókxa nak, kólhakha sa' nahan ma'a, hakte ekméssek ko'o kéxegke m'a, yaqwayam kóltéhek kélagkok. 54 Xama aqsok sa' eyke kóltawaksek kólexpánchesek nepyeseksa m'a apyókxoho ektáhakxa nak chá'a apnámakkok apagko' énxet; ekyawakxa xapop sa' chá'a kólmések ma'a apxámakxa enxoho chá'a apnámakkok, keñe sa' ma'a apqántawók nak chá'a, kólmések chá'a ketsék xapop, exkak sa' chá'a xama énxet yetlo apnámakkok apancha'awo' ma'a eyaqhókxa enxoho chá'a ekxeyenma m'a ektawásamáxche nak aqsok. 55 Sa' agkok kólántekkásak kéxegke énxet apheykha nak ma'a apchókxa, elya'aksek sa' exma m'a apkeleymomap nak, máxa sa' etnéssesek ma'a ektémól'a segyéxaqxo ekyetno egaqtek, essenhan sẽlwáxaqxól'a egyempehek ketekma apma'ák, kélhakmo sa' kéxegke m'a apchókxa nak; 56 keñe sa' atnéssesek ko'o kéxegke, ekxénakxa nak ko'o ewáxok atnéssesek ma'a énxet'ák nak.”
© © Enxet Lengua Sur Bible © Paraguayan Bible Society, 2015.