Selofhad apketchek kelwán'ák
1 Yetneyk axta cinco kelwán'ák apkelyáxeg ma'a Manasés énxet'ák apagkok, élwesey axta Mahlá, Noá, Hoglá, Milcá, tén han Tirsá. Selofhad axta apketchek, aptawán'ák neptámen axta m'a Héfer, Galaad, Maquir, Manasés, tén han ma'a José. 2 Kelmahágkek axta átog nentaxnamakxa kélpakxanma apchaqneykekxexa nak chá'a énxet'ák xa cinco kelán'ák nak, yaqwayam kalpaqhetchesaxkohok ma'a Moisés, tén han ma'a appasmo apkelmaxnéssesso Dios énxet'ák apagkok Eleazar, tén han ma'a apkelámha apmonye'e nak apnámakkok. Axta entáhak éláneya s'e: 3 “Apketsepmeyk axta negko'o egyáp ma'a yókxexma meykexa nak énxet, háwe eyke Coré énxet'ák apagkok ma'a, apkenmexeykekxo axta m'a Wesse' egegkok. Apketsepmeyk axta eñama mey'assáxma apagkok apagko', meyke apwete apketchek apkelennay'a xama enxoho. 4 Makke kapayhawok kamassegwók apwesey negko'o egyáp nepyeseksa m'a apnámakkok apancha'awo nak, eñama mete xama enxoho apkenna' apketche. Hẽlmés negko'óxa xapop nepyeseksa m'a táta axta apkelyáxeg tén han apkelpepma.”
5 Apkeltennássek axta Moisés Wesse' egegkok ektáhakxa axta aqsok élmaxnagko xa kelán'ák nak. 6 Aptáhak axta Wesse' egegkok apchátegmowágko s'e: 7 “Payhawók ektamhágkaxa m'a Selofhad apketchek kelwán'ák nak. Elmésák sa' xapop nepyeseksa m'a yáp axta apkelyáxeg tén han apkelpepma, kalxewekxak sa' ma'a yáp axta xapop apagkok. 8 Eltennasák sa' nahan israelitas, apketsapa enxoho chá'a xama meyke apwete apketche apkenna', kaxkekxak sa' chá'a xapop apagkok ma'a apketche kelwána; 9 méko sa' agkok xama enxoho apketche kelwána, elxewekxak sa' chá'a xapop apagkok ma'a apkelyáxeg essenhan apkelpepma; 10 méko sa' agkok nahan apyáxeg essenhan apepma, elxewekxak sa' xapop apagkok ma'a apyáp apkelyáxeg nak essenhan apkelpepma. 11 Méko sa' agkok nahan apyáxeg essenhan apepma m'a yáp nak, exkekxak sa' xapop apagkok ma'a apnámakkok apancha'awo' nak. Cháxa yaqwánxa sa' chá'a etnahagkok israelitas xa, séltamhókxa nak ko'o etnehek xép se'e kaxwo nak.”
Josué kélyéseykha yaqwayam etnehek apyaqmagkasso Moisés
(Dt 31.1-8)12 Aptáhak axta Wesse' egegkok apcháneya Moisés se'e:
—Yenát sa' se'e egkexe nak Abarim, yenmexho sa' ma'a xapop sekmésakxa nak ko'o m'a israelitas. 13 Appenchessek sa' agkok apwete m'a, yetsapok sa', epáxaqwakxak sa' ma'a apyapmeyk nano', ektéma axta m'a apepma Aarón, 14 axta kólyeheykekxak kéxegke séltémókxa kóltéhek xa kélqánet nak, apkelpaqméteykencha'a axta ko'o sexéneykencha'a énxet'ák ma'a yókxexma meykexa nak énxet Sin, axta nahan héláyók ko'o nápaqta'awo xa énxet'ák nak, apmáyheykegko axta yegmen. (Cham'a ekteyapmakxa nak yegmen Meribá, yókxexma Cadés, yókxexma meykexa nak énxet Sin.)
15 Keñe axta Moisés aptáha apcháneya Wesse' egegkok se'e:
16-17 —Dios Wesse' ahagkok, apmésso nak apkelyennaqte apyókxoho énxet'ák, elyésha sa' xama apkemha apmonye' yaqwayam sa' etnehek apkemha apmonye' apagkok ma'a énxet'ák apagkok, tén han apnaqleykha chá'a m'a apkelmahágkaxa enxoho chá'a, yaqwayam enxoho metnehek elweynchamha m'a aptamheykegkaxal'a nepkések meyke nak éltaqmelchesso.
18 Aptáhak axta Wesse' egegkok apchátegmowágkokxo Moisés se'e:
—Josué, Nun apketche, apteme énxet apha apwáxok espíritu. Ema sa' ma'a, enegkenek sa' apmék néten apqátek. 19 Éntemekxa sa' ma'a aphakxa nak apkelmaxnéssesso Dios énxet'ák apagkok Eleazar, tén han ma'a nápaqta'awo nak apyókxoho énxet'ák, egkes sa' aptamheykha nápaqta'awók ma'a apyókxoho nak; 20 egkés sa' nekha m'a ektémakxa nak xép apteme ekha kéláyo, yaqwayam sa' elyahakxohok ma'a apyókxoho énxet'ák Israel. 21 Ey'ókxak sa' nahan Josué m'a apkelmaxnéssesso Dios énxet'ák apagkok Eleazar, keñe sa' Eleazar hélmaxneyha ko'o emha apwesey, emha m'a Urim. Josué sa' eyke eltennaksek chá'a apkeltamhókxa etnahagkok israelitas ekyókxoho aqsok apkelánegkaxa enxoho chá'a.
22 Apkelanak axta Moisés ma'a apkeltamhókxa axta etnehek ma'a Wesse' egegkok. Apmeyk axta Josué, apyentamákxeyk axta m'a aphakxa nak apkelmaxnéssesso Dios énxet'ák apagkok Eleazar, tén han nápaqta'awók ma'a apyókxoho énxet'ák. 23 Apnegkenchek axta apmék néten apqátek, tén axta apmésa aptamheykha, ekhawo apkeltamhókxa axta etnehek Wesse' egegkok ma'a Moisés.
© © Enxet Lengua Sur Bible © Paraguayan Bible Society, 2015.