Ektémakxa nak chá'a apkeltamheykha apkelmaxnéssesso Dios énxet'ák apagkok tén han levitas
1 Aptáhak axta Wesse' egegkok apcháneya Aarón se'e:
“Xeyep sa' chá'a kaphemmok apsexnánémap megkataqmela enxoho chá'a élánamáxche aqsok ma'a kélpakxanma appagkanamap tén han ma'a apketchek ekweykekxoho m'a nápakha nak Leví énxet'ák apagkok ektáha nak xép énxet'ák apagkok; xeyep sa' eyke aqsa chá'a wánxa kaphemmok apsexnánémap tén han apketchek eyesagko enxoho chá'a kéxegke kéllánéyak kéltamheykha ektémakxa nak chá'a apkeltamheykha m'a apkelmaxnéssesso Dios énxet'ák apagkok. 2 Yának sa' eyke chá'a epasmok xép aptamheykha tén han apkeltamheykha apketchek kélpakxanma ekhémo mók nélpaqhetchásamáxkoho m'a nápakha nak Leví énxet'ák apagkok, ektáha nak xép énxet'ák apagkok. 3 Elanagkok sa' chá'a aqsok apkeltamhókxa enxoho chá'a elanagkok xép ma'a, eltemeykha sa' nahan ma'a kélpakxanma nak, melyepetchegwomok sa' eyke m'a aqsok kélmeykha nak chá'a m'a kélpakxanma appagkanamap, tén han ma'a ekwatnamáxchexa nak aqsok; aptamhágkek sa' agkok xa, eletsapok sa', kawakxohok sa' nahan kéxegkáxa. 4 Kéméxcheyk eltemeykha xamók xép ma'a kélpakxanma appagkanamap nak, tén han ma'a ekyókxoho kéltamheykha ekpayhawo nak chá'a kóllána'. Méko sa' eyke xama énxet apwanchek elyepetchegwomhok kéxegke, megkatnaha nak aptamheykegkaxa; 5 kéxegke wánxa kéltamheykha m'a kélpakxanma appagkanamap nak, tén han ma'a ekwatnamáxchexa nak aqsok. Keñe sa' ko'o kamaskok séltaqnawéyak ma'a israelitas. 6 Élyetnakhassegkek axta ko'o kélyáxeg'a levitas, nepyeseksa m'a israelitas, yaqwayam almések kéxegke, yaqwayam enxoho elanagkok apkeltamheykha m'a kélpakxanma apchaqneykekxexa nak chá'a énxet'ák. 7 Xép sa' eyke aqsa chá'a elának aptamheykha ektémakxa nak chá'a apkeltamheykha apkelmaxnéssesso Dios énxet'ák apagkok yetlo apketchek ma'a ekwatnamáxchexa nak chá'a aqsok, essenhan élánamáxche nak chá'a aqsok ma'a teyp nak apáwa. Kéxegke kéltamheykha xa nentamheykha nak, hakte ko'o axta sekmésso kéxegke kélmowána kóllának xa ektémakxa nak apkeltamheykha m'a apkelmaxnéssesso Dios énxet'ák apagkok. Yetneyk sa' agkok énxet apkelane aptamheykha ektémakxa nak chá'a apkeltamheykha apkelmaxnéssesso Dios énxet'ák apagkok, neyseksa metne, ematñekxak sa'.”
Ekpasmo nak chá'a apkelmaxnéssesso Dios énxet'ák apagkok tén han ma'a levitas
8 Aptáhak axta Wesse' egegkok apcháneya Aarón se'e:
“Ekméssek ko'o exchep yaqwayam etaqmelchesek ma'a aqsok sélmésso naqsa nak chá'a ko'o. Almések sa' ko'o exchep ekyókxoho aqsok sélmésso naqsa élpagkanamaxche sélmésso naqsa nak chá'a israelitas, tén han ma'a apketchek, ekpayhawo nak chá'a kóltéhek kélagkok; katnehek sa' meyke néxa xa. 9 Keñe sa' ma'a kélnaqtósso ektekyawa kélwatno nak chá'a, etnehek sa' xép apagkok ma'a ekyókxoho aqsok aktek ekyexna sélmésso naqsa nak ko'o israelitas, tén han ma'a kélnaqtósso ektekyawa sélmésso nak chá'a ekyaqmageykekxa melya'assáxma, essenhan apkelsexnánémap; xép sa' etnehek apagkok se'e ekyókxoho aqsok sélmésso naqsa élpagkanamaxche nak, tén han ma'a apketchek. 10 Apyókxoho apkelennay'a kélnepyeseksa sa' apwanchek etawagkok xa aqsok sélmésso naqsa nak, sa' eyke etawagkok ma'a kañe' ekpagkanamaxchexa nak, hakte élpagkanamaxche xa.
11 “Agkések sa' nahan xépxa mók aqsok sélmésso naqsa élpagkanamaxche, tén han apketchek apkelennay'a, tén han kelwán'ák, ekheykha nak makham xamók xép, sélseykekxésso nak chá'a m'a israelitas. Megkatnégwomek sa' chá'a néxa ekteme xa. Apwanchek sa' chá'a etwok xama énxet ektáha nak aphawóxama, megkamagyása nak apyempehek. 12 Almések sa' nahan ma'a émha amonye' ekyexna sélseykentegkesso nak chá'a ko'o israelitas yókxoho apyeyam: cham'a pexmok égmenek ektaqmalma nak, tén han ma'a vino ektaqmalma, tén han ma'a hótáhap aptaqmalma nak. 13 Keñe sa' nahan ma'a émha amonye' ekyexna nak aqsok apnakxéyak segkésso ko'o m'a, xeyep sa' etnehek apagkok. Apwanchek sa' chá'a etwok xama énxet ektáha nak aphawóxama, megkamagyása nak apyempehek. 14 Ekyókxoho aqsok sélmésso naqsa sepagkanchesso nak chá'a m'a israelitas, xép sa' etnehek apagkok.
15 “Apyókxoho apmonye' apkelwete nak chá'a apketchek ma'a israelitas, tén han amonye' ekpalleyam nak chá'a étkók apnaqtósso, sélmésso nak chá'a ko'o, xeyep sa' etnehek apagkok. Yának sa' eyke chá'a kólyánmagkasek apketchek appalleyam apmonye'e m'a énxet, essenhan ma'a apnaqtósso ekpalleyam nak amonye'e, élmanyása nak. 16 Kólyánmagkasek sa' chá'a ekwokmo enxoho xama pelten aptéyam, cinco sawo' selyaqye sa' kammok ekyánmaga, ekweykenxa nak chá'a élmomaxche m'a kélpakxanma appagkanamap, ekwayam nak chá'a once gramos ekyentaxno. 17 Megyohok sa' eyke kólyánmagkasek ma'a amonye' ekpalleyam nak étkók ma'a weyke, tén han nepkések, tén han ma'a yát'ay. Ko'o ahagkok xa, elnápok sa'; eyegkenek sa' éma agkok ma'a néten nak ekwatnamáxchexa aqsok, keñe sa' ewatnek pexmok agkok etnéssesek aqsok kélmésso naqsa ekmátsa nak ekpaqneyam atekhánek ko'o. 18 Xeyep sa' elmekxak ma'a ápetek nak, ekhawo nak han ma'a agkenyek nak aqsok kéltósso, cham'a kélmésso naqsa ektaqmalma, tén han ma'a eywok élya'assamakxa nak. 19 Almések sa' ko'o exchep ma'a ekyókxoho apcháncheseykekxa nak israelitas sélpagkanchesso ko'o, tén han ma'a apketchek apkelennay'a, tén han ma'a kelwán'ák, ekheykha nak makham xamók xép. Megkamassegwomek sa' chá'a ekteme xa. Ekhémo mók nélpaqhetchásamáxkoho megkólmowána nak megkalanaxche', meyke néxa, sélánésa nak ko'o exchep, tén han ma'a aptawán'ák neptámen nak.”
20 Aptáhak axta Wesse' egegkok apcháneya Aarón se'e:
“Megkaxek sa' xép xapop apagkok, tén han yókxexma apagkok ma'a kañe' Israel, ektéma nak ma'a apyókxoho israelitas. Ko'o sa' hetnehek apagkok, tén han aqsok apxaweykekxa m'a kañe' Israel. 21 Élméssek eyke ko'o levitas yaqwayam etnehek apagkok ma'a ekwayam nak chá'a diez ekyókxoho xama aqsok, yaqwayam elmések ma'a israelitas, ekyánmaga apkeltamheykha m'a kélpakxanma apchaqneykekxexa nak chá'a énxet'ák. 22 Mopwanchek sa' eyke elyepetchegwomhok nápakha nak israelitas ma'a kélpakxanma apchaqneykekxexa nak chá'a énxet'ák, hakte elsexnáneykpok sa' eletsapok apkelánegko enxoho xa ektéma nak melya'assáxma. 23 Énxet'ák levitas sa' aqsa wánxa eltemeykha m'a kélpakxanma apchaqneykekxexa nak chá'a énxet'ák, apkelsexnánémap apagko' sa' nahan chá'a etnahagkok ma'a megyaqhawo enxoho chá'a aqsok apkelánéyak. Megkamassegwomek sa' chá'a ekteme xa, kawakxohok sa' ma'a apyapmeyk, tén han ma'a kélketchek nak. Megkaxek sa' xapop apagkok apagko' levitas ma'a kañe' Israel. 24 Élméssek eyke ko'o yaqwayam etnehek apagkok ma'a ekwayam nak chá'a diez ekyókxoho aqsok apagkok, eyeyméxko nak chá'a ko'o hélmések ma'a israelitas. Cháxa keñamak séltennasa nak ko'o megkaxek xapop apagkok apagko' ma'a kañe' Israel.”
25 Appaqhetchessek axta Wesse' egegkok ma'a Moisés. Aptáhak axta apcháneya s'e:
26 “Eltennés sa' énxet'ák levitas, apkelméságko sa' israelitas ma'a ekwayam nak chá'a diez ekyókxoho aqsok apagkok, cham'a sélmésso axta ko'o yaqwayam etnehek apagkok, kéméxcheyk héltaqmelchessesek chá'a ekwayam nak chá'a diez ekyókxoho, yaqwayam hélmések ko'o. 27 Sa' katnehek sélmésso ko'o kéxegke xa, ektéma nak chá'a ko'o sélméssama m'a israelitas, sélmésa enxoho chá'a nápakha m'a hótáhap apaktek, tén han ma'a vino apagkok nak. 28 Elyetnakhássesek sa' Wesse' egegkok levitas ma'a aqsok apkelmésso nak chá'a israelitas, cham'a ekwayam nak diez apagkok. Elmeyásekxak sa' ma'a apkelmaxnéssesso Dios énxet'ák apagkok Aarón. 29 Ekyókxoho aqsok apkelxawe nak, kéméxcheyk hétnakhássesek nekha yaqwayam hegkések ko'o; ektaqmalma agko' nahan kéméxcheyk katnehek ma'a sepagkanchesso nak.
30 “Etne sa' nahan elának se'e: Kélpenchessek sa' agkok chá'a sélyetnakhássesso m'a ektaqmelakxa agko' nak chá'a aqsok, keñe sa' ma'a éleymomáxche nak kélwanchek kólxének ektáha hótáhap apaktek kélagkok, tén han vino kélagkok, 31 kélwanchek sa' nahan kóltók kéxegke, yetlo kélhawóxama m'a kélmakókxa enxoho chá'a kóltáswók. Cháxa ekyánmaga kéltamheykha m'a kélpakxanma apchaqneykekxexa nak chá'a énxet'ák. 32 Kélpenchessek sa' agkok chá'a sélyetnakhássesso m'a ektaqmelakxa agko' nak chá'a aqsok, kélwanchek sa' kóltók ma'a éleymomáxche nak meyke kéllane megkólya'assáxma; keñe sa' megkóltawasha chá'a m'a aqsok sélmésso naqsa élpagkanamaxche sélmésso nak chá'a ko'o m'a israelitas, keñe sa' megkóletsepe'.’”
© © Enxet Lengua Sur Bible © Paraguayan Bible Society, 2015.