Énxet'ák Israel kélwanyeykha
1 Xama axta apleg'a amya'a Sambalat nenxátekhásekxo negko'o m'a tegma kélhaxtegkesso, axta kalchak apwáxok, aplókók apagko' axta, yetlókok axta apkelwanyeykha m'a judíos 2 aptáha appaqmeta nápaqta'awók apkelxegexma'a, tén han sẽlpextétamo nak Samaria: “¿Yaqsa apmako elanagkok makham xa judíos meyk át'ák nak? ¡Apkeneykek kexa kólhok makham elwatnek aqsok apnaqtósso apkelnapma! ¡Apkeneykek kexa yepwának epenchesagkok apkeltamheykha xama ekhem! ¡Apkeneykek kexa elwetekxak makham axnagcha'ák meteymog ektaháneykekxo nak mók nekha'a étkók kélwatno axta nano'!”
3 Apkenmáha axta han nápakha Tobías, apteme axta amonita. Axta aptáhak appaqmeta s'e: “Kóllano exnek meteymog kélhaxta apxátekháseykekxa, kawomhok máleg kayaqnegkesek eyánta enxoho xa.”
Nehemías apkelmaxnagko
4 Keñe axta ko'o sektáha sélmaxneya s'e: “Dios egagkok: ¡yeyxho ektáhakxa nak sẽlwanyeykha negko'o! Yána kaphewakxak ma'a ektémakxa nak sẽlwanyeykha. Yána elmok ma'a apkelenmexma nak, yána elmakpok kólnaqlakxak mók apkelókxa. 5 Eyaqmagkásekxa m'a apkeltémakxa ekmaso nak, ná emassés ma'a ektémakxa nak melya'assáxma nápaqtók xép, hakte apkelwanyeykha m'a énxet'ák apxátekháseykekxa nak tegma kélhaxtegkesso.”
Énxet'ák Israel apkelenmexma apmáheyo yempakha'
6 Nenlenxanakmók axta aqsa negko'o nenxátekháseykekxa m'a tegma kélhaxtegkesso nak, ekweykmo axta náxet kélya'asso néten, apkeltamháha axta énxet'ák yetlo apmáyheykegkoho apagko'. 7 Xama axta apleg'a Sambalat, Tobías, tén han ma'a árabes, tén han ma'a apheykha nak Amón, tén han Asdod, apxegkesa aqsa apkeláneykekxa énxet'ák ma'a kélhaxtegkesso nak nepyáwa Jerusalén, tén han kélápeykxo m'a élyagqáxeykha nak, apkellókók apagko' axta, 8 apyókxoho axta han apheyásawók mók yaqwánxa etnahagkok, yaqwayam ektamagkok ma'a Jerusalén peya yetsagkasek. 9 Keñe axta nélmaxneya Dios egagkok, nennegkena han apkelhaxneykha ekhem, tén han axta'a, yaqwayam hẽlmeyók negko'o. 10 Keñe axta énxet'ák Judá aptáha s'e: “Apkelyelqákpek ma'a apkelpata nak chá'a meteymog nekha'a, hakte xámók agko' ma'a meteymog nekha'a. Mogwanchek han negko'o anlánekxak ma'a meteymog kélhaxtegkesso nak nepyáwa tegma.”
11 Apkeneykek negko'o magwetyehek apkelántaxna enxoho negyeseksa negko'o m'a sẽlenmexma nak yaqwayam hẽlnápok, tén han emágwók ma'a néltamheykha. 12 Hẽlyo'óták axta chá'a negko'o judíos apheykencha'a axta keto' apheykegkaxa xa énxet'ák nak, hẽltennásseták apmáheyo hegketámegmak negko'o m'a apheykha nak negyáwa'. 13 Tén axta séltémo ko'o exmakha chá'a énxet'ák yetlo apnámakkok ma'a teyp nak meteymog kélhaxtegkesso, keñe han élyapwate nak chá'a, tén han ma'a élyagqaxe nak, yetlo apkelmeykha sókwenaqte, sawhéwa, tén han yágke. 14 Xama axta ko'o sekwet'a apkelaka m'a, émpákxeyk axta néten, ektáhak axta séláneya m'a apkelwesse'e nak, tén han ma'a apkelámha apmonye'e nak, tén han ma'a apyókxoho énxet'ák nak: “Nágkóle aqsa. Kaxén kélwáxok Wesse' egegkok apteme apwányam, tén han apcheymap, kólempakha kólmeyók kélókxa xamo', kélketchek apkelennay'a, tén han kelwán'ák, tén han ma'a kélnaqteyegka'a, tén han kélxanák.”
15 Xama axta apkelleg'a sẽlenmexma nempenchesa nenláneykekxa nentáhakxa, tén han metekkessesa Dios ma'a yaqwánxa etnahagkok, negyókxoho axta negya'aweykxak ma'a kélhaxtegkesso nak tegma, nélmeyákxeyk axta chá'a enxama m'a ekpayhókxa chá'a néltamheykegkaxa. 16 Nápakha énxet'ák ahagkok axta ko'o apkeltamháha xa ekhem nak, tén axta han nápakha apkelmeyncha'a apkelmeykha apkenchesso kempakhakma, cham'a sawhéwa, apkeláhakkásamap, yágke, tén han apkeláhakkasso apnénya'ák. Appasmeyk axta apkelámha apmonye'e m'a énxet'ák Judá, 17 apxátekháseykekxa axta m'a tegma kélhaxtegkesso. Apkelpatmeyk axta makham meteymog ma'a apkelpata nak chá'a meteymog nekha'a, xama apmek axta chá'a apkeltamháha, xama apmek axta han chá'a apkelmáha apkelmeykha apkenchesso nak kempakhakma. 18 Apyókxoho axta han chá'a apkelchexanma nepxet sókwenaqte m'a apkeltamheykha apkeláneykekxa nak kélhaxtegkesso m'a tegma, nehekha' axta apkenmáha m'a apchánémap axta chá'a yaqkahaksek kélaqkahasso, 19 hakte axta ektáhak séláneya m'a apkelwesse'e tén han ma'a apkelámha apmonye'e, tén han ma'a apyókxoho énxet'ák nak: “Awanhók agko' nentamheykha, néxpánchesamaxcheyk negko'o, xama xama chá'a m'a kélhaxtegkesso nak nepyáwa tegma, makhawók egmók chá'a. 20 Kélleg'ak sa' agkok ekpáwà kélaqkahasso, hẽlyepetchegwata sa' negko'o, Dios sa' hempasmok nélnápomaxche'.”
21 Nápakha énxet'ák axta chá'a elmaha sawhéwa eleyxmakha, neyseksa néltamheykha negko'o yókxoho ekhem ekweykmoho ekyáqtésa. 22 Axta ektemék han ko'o sélanagkama énxet'ák, apyókxoho ekweykekxoho m'a apkelpasmeykha nak chá'a apkeltamheykha, payhawók enaqtének axta'a m'a kañe' nak Jerusalén, yaqwayam enxoho henleyxchesha axta'a, keñe ekhem chá'a eltemeykha. 23 Axta han ólhaxyawáseykegkok negko'o nélántaxno, ko'o, tén han énámakkok nak, tén han ma'a sempasmeykha nak nentamheykha, tén han ma'a énxet'ák senleyxcháseykha nak, sélxegexma'a nak ko'o, apkelmeykha axta chá'a m'a sawhéwa.
© © Enxet Lengua Sur Bible © Paraguayan Bible Society, 2015.