Nágkólteme aqsa kélyekpelchémo aptémakxa kélmók
(Lc 6.37-38Lc 41-42)1 “Nágkólteme aqsa kélyekpelchémo aptémakxa kélmók, yaqwayam enxoho melyekpelkók kéltémakxa kéxegkáxa m'a Dios. 2 Hakte sa' nahan exnéshok Dios apkelyekpelchémo kéxegke m'a kéltáhakxa enxoho kélyekpelchémo kélmók; sa' nahan exnéshok apkelyetsátéyak Dios kéltémakxa kéxegke m'a ektáhakxa enxoho kélyetsátéyak aptémakxa kélmók. 3 ¿Yaqsa ektáha kéllano nak kéxegke kélyáxeg ekyéxaqxo pa'at nekha? ¿Yaqsa ektáha megkaxéna kéxegkáxa kélwáxok ekyetna ekyéxaqxo yámet nekha ekyawe? 4 Yetneyk agkok kéxegke ekyéxaqxo yámet nekha ekyawe, ¿háxko katnehek kólewának kóltéhek kólának kélyáxeg se'e: ‘Heyho hana alekkesek xép pa'at nekha ekyéxaqxo nak?’ 5 ¡Kéxegke kélmeyókásamáxkoho nak kéltémakxa! Kóllek sekxo' kéxegke xa ekyéxaqxo ekyawe nak, keñe sa' kataqmelek kélwete yaqwayam kóllekkesek pa'at nekha ekyéxaqxo m'a kélyáxeg.
6 “Nágkólmés aqsa aqsok élpagkanamaxche semheg, kataqnawékxak katnehek kéxegke, kalyeptek nahan. Nágkólyenyaw nahan aqsok élmomnáwa kélagkok apkelyagqakxa yátapomap; elteyammaha katnehek.
Nélmaxnagko, negketamso tén han néltémo hẽllekkesek átog
(Lc 11.9-13Lc 6.31)7 “Kólmaxna, egkések sa' Dios; kólchetam, kólwetekxak sa'; kólpaqméswom nekha átog, kólmeykessessek sa'. 8 Hakte cham'a apkelmaxnagko nak, exka'; keñe m'a apketamso nak, éteyekxa'; keñe m'a appaqméswayam nak nekha átog, kólmeykessesek.
9 “¿Kólmések enxeykel'a kéxegke kélketchek xama meteymog apkelmaxneya enxoho kelpasmaga? 10 ¿Yéwa enxeykel'a anhan kólmések apkelmaxneya enxoho xama kelasma? 11 Kélya'ásegkók agkok kéxegke kélmésso aqsok éltaqmela kélketchek, kéxegke kélteme nak ekmaso kéltémakxa ¡sa' eyke ekyágwánxa agkok elmésagkok aqsok éltaqmela Kélyáp apha nak néten ma'a ektáha nak chá'a apkelmaxnagko!
12 “Kólhésho chá'a mók ma'a kélámenyéxa enxoho kéxegke etnéssesek ma'a kélnámakkok; hakte cháxa éltémókxa nak antéhek segánamakxa xa, tén han ma'a apnaqtáxéséyak axta énxet'ák apkellegasso axta Dios appeywa.
Ektáhakxa nak ketsék átog
(Lc 13.24)13 “Kólántex kéxegke m'a ektáhakxa nak ketsék átog, hakte awanhek átog ekmahéyak ma'a sẽlmassésseykenxa nak, awanhek nahan ámay, awanhek nahan exma, awanhek nahan ekpayhakxa, apxámok nahan énxet apkelyetleykekxa xa ámay nak; 14 keñe ketsék ma'a átog ekmahéyak nak ekyennaqtamakxa egnények, askehek nahan negyetlo, apqántawók nahan énxet apweteykekxa xa ámay nak.
Ekyexna aqsa keykpelchaxkohok ma'a yámet
(Lc 6.43-44)15 “Kóláwho kéxegke énxet'ák apkelmopwána amya'a nak, apkelxeyenmól'a ektáha eñama Dios ma'a apkeltenneykha nak. Nepkések chá'a exnésakpohok ey'áwak kéxegke xa énxet'ák nak, aqsok nawha'ák éllo eyke. 16 Kélwanchek kéxegke kólyekpelkohok ektémakxa apkeltamheykha, hakte megkanakxamáxchek chá'a anmen yámet ekyexna ektekkesso m'a yámet ekha nak am'ák, keñe higo ekyexna megkanakxamáxko chá'a eñama aptekkesso m'a pegke. 17 Ekyókxoho yámet éltaqmela nak, katekkesek chá'a ekyexna éltaqmela, keñe m'a yámet ekmaso nak, asagkók nahan katnehek ekyexna. 18 Yawanchek kasók ekyexna m'a yámet ektaqmela nak, yawanchek nahan kataqmelek ekyexna m'a yámet ekmaso nak. 19 Kólyaqténhok nahan chá'a m'a ekyókxoho yámet ekmaso nak ekyexna, keñe kólchexák nátex. 20 Kélwanchek sa' kólyekpelkohok kéxegke xa énxet'ák nak eñama m'a aqsok apkeláneyak.
Énxet yaqwayam nak elántexek ma'a aptémakxa nak Wesse' apwányam Dios
(Lc 13.25-27)21 “Háwe sa' apyókxoho elántexek aptémakxa Wesse' apwányam Dios ma'a énxet'ák aptéma nak chá'a apkelpeywa hexének se'e: ‘Wesse', Wesse' ahagkok’, wánxa sa' elántexek ma'a énxet'ák apkelánéyak nak Táta apmopmenyého, cham'a apha nak néten. 22 Apxámok sa' énxet etnehek heyának xa ekhem nak: ‘Wesse', Wesse' ahagkok, néltenneykha axta chá'a negko'o apwesey exchep, nélántekkessegkek axta negko'o kelyekhama' eñama apwesey exchep, nenlánéyak axta nahan aqsok sempelakkasso nak agwetak eñama apwesey exchep.’ 23 Keñe sa' ko'o atnehek wátegmowagkok se'e: ‘Malyekpelchágweykmok ahagko' ko'o kéxegke; ¡Kólmohok ma'a teyp, kéxegke kélteme nak ekmaso kéltémakxa!’
Tegma apowhak ekmaso nak kélpekkenma tén han ma'a ektaqmalma nak kélpekkenma
(Mc 1.22Lc 6.47-49)24 “Kéxegke ektáhakxa enxoho kélháxenmo sekpeywa keñe kóllának ma'a sektáhakxa enxoho sekpeywa, máxa kóltéhek ma'a énxet ekhal'a apya'áseykegkoho apkeláneya axta apxagkok néten meteymog. 25 Wakteyk axta mámeye, tekkek axta yegmen ma'a wátsam, tekkek axta anhan éxchahayam ekyennaqte agko' ekmako kategkesek xa tegma nak, axta eyke etyekmok, hakte yetneyk axta apowhak ekyennaqtésso néten meteymog xa tegma nak. 26 Keñe kéxegke kéltáha nak kélháxenmo aqsa sekpeywa keñe megkóllanyek ma'a sektáhakxa enxoho sekpeywa, máxa kóltéhek ma'a énxet mey'áseyak aqsok la'a, cham'a apkeláneya axta apxagkok néten yagkamex. 27 Wakteyk axta mámeye, tekkek axta yegmen ma'a wátsam, tekkek axta anhan éxchahayam ekyennaqte agko', apteyekmek axta xa tegma nak, apketsagchawók apagko' axta nahan.”
28 Xama axta appenchesa apteme appeywa Jesús xa, pelakkassek axta apwet'a énxet'ák ektáhakxa apkelxekmósso Jesús, 29 hakte apkeltennáha axta yetlo ekyawe agko' kélyaheykekxoho, axta kaxnawok ma'a ektémakxa axta apkelxekmósso m'a apkelxekmósso nak ektémakxa segánamakxa.
© © Enxet Lengua Sur Bible © Paraguayan Bible Society, 2015.