Jesús ekyepkónma kelyekhama'
(Mc 1.12-13Lc 4.1-13)1 Apyentamomchek axta Espíritu Jesús yókxexma meykexa énxet yaqwayam enxoho keypkónek kelyekhama', natámen xa.
2 Apheykmek axta cuarenta ekhem tén han cuarenta axta'a meyke apto m'a, keñe axta eyaqhama meyk. 3 Ya'áyekmek axta Jesús kelyekhama' yaqwayam keypkónek. Axta entemék eyenagkama s'e:
—Naqsók agkok xép apteme Dios Apketche, yána katnekxak apto s'e meteymog nak.
4 Aptáhak axta apchátegmowágko Jesús se'e:
—Temék eknaqtáxésamaxche weykcha'áhak se'e: ‘Háwe ekwánxa agkok nento ekyennaqtésso apnények énxet, akke anhan ekyennaqtésso apnények ma'a ekyókxoho ektémakxa nak Dios appeywa.’
5 Keñe axta ekyentameykekxo Jesús kelyekhama' m'a tegma apwányam aptaqmela nak Jerusalén, kenátchesseykekxeyk axta ektáhakxa nak netno' agko' tegma appagkanamap. 6 Axta entemék eyenagkama s'e:
—Naqsók agkok xép apteme Dios Apketche, enextegenta' náxop; hakte temék eknaqtáxésamaxche weykcha'áhak se'e:
‘Dios sa' eláphaksek
apkelásenneykha
yaqwayam etaqmelchesek xép.
Emágwaták sa',
yaqwayam enxoho metyegwaték
meteymog xama enxoho.’
7 Axta aptemék apchátegmoweykegko Jesús se'e:
—Temegkek nahan eknaqtáxésamaxche weykcha'áhak se'e: ‘Nágkólyepkén aqsa Dios Wesse' kélagkok.’
8 Tén axta ekyentameykekxo Jesús kelyekhama' m'a xama egkexe ektáhakxa axta netno' agko'. Xekmóssegkek axta ekyókxoho apkelókxa keso náxop, tén han ma'a ektémakxa nak éltaqmalma agko' apkelókxa. 9 Axta entemék eyenagkama s'e:
—Asawhohok sa' almések xép ekyókxoho xa aqsok nak, cham'a apkeltekxeya enxoho aptapnák xóp hélpeykesho'.
10 Keñe axta Jesús aptéma apchátegmoweykegko s'e:
—Kaxeg, kelyekhama', hakte temék eknaqtáxésamaxche weykcha'áhak se'e: ‘Kólpeykesho Dios Wesse' kélagkok, kólteme wánxa kéláyo m'a.’
11 Keñe axta ekyamasma Jesús kelyekhama', yetlómók axta anhan apkelwe Dios apkelásenneykha aphakxa Jesús, appasmomchek axta aptaqmelchessama.
Jesús apcheynamo aptamheykha Galilea
(Mc 1.14-15Lc 4.14-15)12 Xama axta aplegaya amya'a Jesús kélhésseykmo Juan sẽlpextétamakxa, apmaheykegkek axta yókxexma Galilea. 13 Apyeykhayak axta m'a tegma apwányam Nazaret, axta eyke apheykekxak ma'a tegma apwányam Cafarnaúm, apyetnama nak neyáwa wátsam ekpayhegwayam, yókxexma apheykegkaxa axta Zabulón énxet'ák apagkok, tén han ma'a Neftalí. 14 Temegkek axta xa, yaqwayam enxoho katnehek ma'a ektémakxa axta apnaqtáxéseyak weykcha'áhak Isaías, apteme axta Dios appeywa aplegasso, aptéma axta s'e:
15 “Yókxexma apheykegkaxa nak
Zabulón énxet'ák apagkok
tén han ma'a Neftalí,
cham'a ekpayho nak
neyp wátsam Jordán,
ekpayho nak han neyáwa
wátsam ekwányam,
tén han ma'a yókxexma Galilea,
apheykegkaxa nak énxet'ák
melya'áseyak Dios.
16 Apkelwet'ak ekyawe agko'
élseyéxma m'a énxet'ák,
apkelweynchámeykencha'a axta
ekyáqtésakxaxma;
chápogwatchek élseyéxma
nepyeseksa m'a énxet'ák
apheykencha'a axta
nétsapmakxa.”
17 Cháxa apcheynamókxa axta apkeltenneykha Jesús ma'a, axta aptemék se'e: “Kólyaqmagkas kélwáxok, chágketwa'ak kaxwók ma'a aptémakxa nak Wesse' apwányam Dios.”
Jesús apkelwóneykha cuatro énxet aptegyéyak kelasma
(Mc 1.16-20Lc 5.1-11)18 Apweynchámeykha axta Jesús neyáwa wátsam ekpayhegwayam nak Galilea, apkelwetágweykmek axta apqánet énxet, apyáxeg apagko' axta han apxegexma: Simón axta apwesey xama, apkeltamhomakpo axta Pedro, keñe axta pók apwesey Andrés. Kelasma axta chá'a aptegyéyak xa énxet'ák nak, apyenyeykenteyk axta yám'én apagkok neygmen. 19 Axta aptemék apkelanagkama Jesús se'e:
—Hélyetlogma ko'o, atnéssesek sa' kéxegke kéltegye énxet.
20 Yetlómók axta nahan appekkeneykekxa yám'én apagkok apkelyetlama.
21 Apxegeykekxeyk axta makham Jesús, apwetágweykmek axta makham apqánet énxet apyáxeg apagko' axta apxegexma m'a, Zebedeo axta apketchek xa apqánet nak: Santiago axta apwesey xama, keñe axta pók apwesey Juan, yetlo Zebedeo axta anhan apkeláneykegkokxo yám'én apagkok kañe' yántakpayhe awáxok xa énxet'ák nak. Apkelwóneykha axta Jesús, 22 yetlómók axta nahan appekkeneykekxa yántakpayhe apagkok xa énxet'ák nak, apyamasmeyk axta aqsa anhan apyáp, keñe apkelyetlama m'a Jesús.
Jesús apkelxekmósso énxet apxámokma
(Lc 6.17-19)23 Apsawheykekxók axta apweynchámeykencha'a Jesús ma'a yókxexma Galilea, apkelxekmóssama chá'a énxet'ák apchaqneykekxexa judíos ekyókxoho yókxexma. Eltennaha axta chá'a amya'a ektaqmela ekxeyenma m'a aptémakxa nak Wesse' apwányam Dios, eltaqmelchessamhok axta nahan chá'a énxet ekyókxoho ektémakxa nak apkelháxamap, tén han ma'a ektémakxa nak apkellegeykegkoho ekmáske. 24 Apxénamakpek axta chá'a Jesús ekyókxoho yókxexma nak Siria, kélnaqlókáseykmek axta chá'a ekyókxoho ektémakxa nak élmasagcha'a apkelháxamap, tén han ma'a ekyókxoho ektémakxa nak apkellegeykegkoho ekmáske, tén han kelyekhama' eknaqtawáseykha, tén han ma'a énxet'ák apkeletsapeykekxoho axta chá'a, tén han ma'a megkamopwána axta chá'a eltaqheykha. Apkeltaqmelchesseykmek axta chá'a Jesús xa.
25 Apxámok axta énxet apkeleñama Galilea apkelyetleykekxo Jesús, tén han Decápolis, Jerusalén, Judea, tén han apkeleñama m'a yókxexma ekpayho nak teyapmakxa ekhem teyp wátsam Jordán.
© © Enxet Lengua Sur Bible © Paraguayan Bible Society, 2015.