Wesse' egegkok ekhem apagkok ekwe
1 Aptáhak Wesse' egegkok ekha apyennaqte s'e: “Chágketwa'ak ekhem, ekmexanma ektémól'a táxa axagkok, yaqwánxa sa' elmétek apyókxoho m'a éleymáxkoho nak apkelwáxok ektémól'a kalmétek ma'a pa'at apák eyáléweykhal'a ekyawe. Elmétek sa' ekwa'a enxoho xa ekhem nak, Cháxa ekhem peya nak kawa', megyeymakpek sa' xama enxoho. 2 Keñe sa' kéxegke kélteme nak séláyo ko'o, kalyenmok sa' kélnepyeseksa m'a ektémakxa nak ekpéwomo sektémakxa, ektémól'a ekhem éltátchesso, segméssamól'a ekyennaqte egyempehek hẽltátchesek. Kólnextegmakha sa' néten kéxegke kólátsaha, ektémól'a weyke étkók kelennay'a élánteyapmal'a m'a axanák. 3 Cháxa ekhem sekpagkanma nak ko'o, máxa yagkamex sa' kólteméssesek kéxegke kólteyammaha m'a élmasagcha'a nak apkeltémakxa'.
4 “Kaxénwakxoho sa' kélwáxok ma'a segánamakxa sekméssama axta ko'o séláneykha Moisés ma'a egkexe nak Horeb. ¡Segánamakxa axta m'a, apkelánémap axta elanagkok ma'a apyókxoho énxet'ák Israel!
5 “Kóllano: Peyk ko'o wáphássesek kéxegke m'a aplegasso sekpeywa Elías, amonye' ekwe m'a Wesse' egegkok ekhem apagkok, cham'a peya sa' katnehek ekhem ekyentaxno, tén han ekmaso. 6 Elásekhassásekxohok sa' apketchek ma'a apyapmeyk. Sa' agkok katnahak xa ektáha nak, awaták sa', keñe sa' allegássesagkok ma'a apchókxa nak, amasséssók sa' ma'a apyókxoho nak.”
© © Enxet Lengua Sur Bible © Paraguayan Bible Society, 2015.