1 Kelmeyeykekxeyk axta makham takhaxpop axto'ók agko', eyeynókxal'a ekxega émha amonye' ekhem semána, kelseykekxeyk axta m'a sokmátsa éláneykegkokxa axta. 2 Xama axta élweykekxo, kelwetágweykekxeyk axta megkeytnama kélpekkenmakxa axta m'a meteymog kélapma axta átog ma'a takhaxpop; 3 tén axta élántaxnama kañe' takhaxpop, axta eyke kalweteyk Jesús aphápak. 4 Axta kalya'áseykegkok yaqweykenxa katnahagkok élchetamso awáxok, pelakkassegkek axta nahan élweteya apchaqneykencha'a apqánet énxet ma'a eyaqneykegkaxa axta, apkelyenma axta apkelnaqta. 5 Kelháxaheykenteyk axta nahan ekwokmo éltekxeyágko naqta'a xapop yetlo éláye agko'; axta eyke aptemék apkelpaqhetchessama xa énxet'ák nak:
—¿Yaqsa ektáha kélchetama nak kéxegke nepyeseksa apkeletsapma m'a apxátekhágwokmo nak? 6 Méko s'e, kélxátekhássekme'. Kaxénwakxoho kélwáxok aptémakxa axta apkelanagkama kéxegke, cham'a aphamakxa axta makham ma'a Galilea, 7 apxeyenma axta ekmáheyo kólmések aptáha nak Apketche énxet ma'a énxet'ák melya'assáxma nak, tén han ekmáheyo kólyepetchesek aqsok ektegyésso, keñe ektáha enxoho ántánxo ekhem exátekhágwók makham.
8 Tén axta ekxénweykekxoho awáxok ma'a aptémakxa axta appeywa Jesús, 9 xama axta élweykekxoho makham éleñama m'a takhaxpop, keltennáseykha axta once Jesús apkelápháseykha ekyókxoho xa aqsok nak tén han ma'a apyókxoho énxet'ák nak. 10 Axta nahan élseykekxésso amya'a Jesús apkelápháseykha m'a María Magdalena, Juana, tén han ma'a mók María Santiago axta egken, tén han ma'a mók kelán'ák nak. 11 Ektamhéyak ancha'awók axta eyke nahan apkenagkók Jesús apkelápháseykha m'a ektémakxa axta élanagkama, axta emáheyók etnéssesek naqso'.
12 Tén axta Pedro apketcheykegkokxo apmeyeykekxo m'a takhaxpop; xama axta apteyányeykegkoho m'a kañe' takhaxpop, apáwa axta aqsa apweteyk. Tén axta aptaqhémo makham apxagkok ekpelakkassama apwete m'a ektémakxa axta.
Emaús ámay
(Mc 16.12-13)13 Chaqhémók axta nahan apkelmeyeykekxexa axta apqánet Jesús apkeltáméséyak xama tegma apwányam apwesey axta Emaús xa ekhem nak. Once kilómetros axta Emaús ma'a Jerusalén. 14 Apkeltenneykegkokxeyk axta aqsa neyseksa apkelxega ámay ekyókxoho m'a ektémakxa axta. 15 Neyseksa apkeltennéyak axta nahan appáxaqweykekxo m'a Jesús, tén axta apkelyetlama. 16 Apweteyak axta eykhe, axta eyke kólhayók ékpelkoho'.
17 Axta aptemék apkelmaxneyeykencha'a Jesús se'e:
—¿Yaqsa kélxéna kéxegke neyseksa kélxega ámay?
Apchaqnágweykmek axta nahan yetlo élyaqhapmo apkelwáxok, 18 keñe axta xama apwesey axta Cleofás, aptéma apchátegmoweykegko s'e:
—¿Xépya aqsa apxakko' mey'ásegko m'a ektáhakxa axta m'a Jerusalén, cham'a ekhem axta?
19 Axta aptemék apchátegmoweykegko Jesús se'e:
—¿Yaqsa axta ektáha?
Tén axta aptéma apkenagkama s'e:
—Neykhe m'a kélteméssesakxa axta m'a Jesús apkeñama nak Nazaret, apteme axta Dios appeywa aplegasso, apxeyenma axta apmopwána apagko' elának aqsok, tén han ekha ekmowána appeywa nápaqtók Dios, tén han ma'a apyókxoho énxet'ák; 20 tén han ma'a ektémakxa axta apméssama yaqwayam emátog tén han kólyepetchesek aqsok ektegyésso m'a apkelámha apmonye'e nak apkelmaxnéssesso Dios énxet'ák apagkok, tén han ma'a énxet'ák apkelámha apmonye'e nak. 21 Nélhaxanmeyk axta aqsa negko'o etnehek apkelwagkasso teyp énxet'ák Israel ma'a. Ántánxo ekhem akke entáhak kaxwók ekteme axta xa. 22 Ẽlyegwakkassegkek axta eykhe negko'o m'a nekha kelán'ák nélxegexma'a axta, hakte axto'ók agko' axta élmeyeykekxo m'a takhaxpop, 23 tén axta élchexyeykmo makham élmeyeykento enxagkok, hakte axta kóteyágweykekxak ma'a Jesús aphápak. Keltenneykha axta anhan apxekmowásamákpoho Dios apkelásenneykha, tén han apkeltennassama apxátekhágweykmo exnek ma'a Jesús. 24 Nápakha nélxegexma'a axta anhan apkelmeyeykekxak takhaxpop natámen xa, apkelwetágweykekxeyk axta nahan ekhawo m'a ektémakxa axta éltenneykha m'a kelán'ák, keñe melweteya m'a Jesús.
25 Tén axta Jesús aptéma apkelanagkama s'e:
—Méko nak la'a kélya'áseyak kéxegke, askehek nahan chá'a yaqwayam megkólya'ássemek ekyókxoho m'a aptémakxa axta chá'a apkelxeyenma m'a Dios appeywa apkellegasso. 26 ¿Meñegkók enxeykel'a Mesías xa aqsok nak, amonye' yaqwayam etaxnegwakxak makham ma'a ekyetnamakxa nak Dios apcheymákpoho?
27 Tén axta apkeltennáseykencha'a ekyókxoho m'a ektémakxa axta eknaqtáxésamaxche' weykcha'áhak ekxeyenma m'a Jesús, axta apchénamók ma'a Moisés axta weykcha'áhak apagkok, ekweykekxoho m'a ekyókxoho apnaqtáxéséyak axta m'a Dios appeywa apkellegasso.
28 Xama axta apkelweykmo m'a apkelmaheykegkaxa axta, máxa axta aptemék apmáheyo enxoho eyeykhágwók ma'a Jesús. 29 Apkeltémók axta eyke exnekxak sekxók ma'a énxet'ák nak. Axta aptemék apkenagkama s'e:
—Exa sekxók xamo' negko'o, taxnakme', yáqtéssek nahan.
Aptaxnegkek axta Jesús kañe', yaqwayam enxoho exek xamo' xa énxet'ák nak. 30 Xama axta apheykencha'a nekha mésa, apmomchek axta pan Jesús, apméssegkek axta ekxeyenma apwáxok Dios, apyeptegkek axta nepyeseksa, tén axta apkelmeyáseykegko. 31 Yetlómók axta anhan apkelyekpelchágwayam, apkelya'ásegweykmek axta aptáha Jesús; apmassegkek axta eyke aqsa m'a Jesús. 32 Tén axta aptéma chá'a apkenagkama pók se'e:
—Neyke eyátso exchek neghaxnawo sẽltennasakmo ámay segyetlókmo exchek, tén han sẽltennáseyncha'a m'a ektémakxa nak eknaqtáxésamaxche.
33 Yetlómók axta nahan apkeltaqhémo ekmanyehe agko' apkelmeyeykekxo m'a Jerusalén, apchaqneykekxexa axta m'a once Jesús apkelápháseykha, tén han ma'a apkelxegexma'a axta. 34 Axta aptemék apkelanagkama s'e:
—Naqso' neyke agkok kélxátekhássekmo Wesse' egegkok, tén han apxekmowáseykpekxo m'a Simón.
35 Keñe axta xa apqánet nak apkeltennáseykencha'a apnámakkok ma'a ektémakxa axta apkelwete neyseksa apkelxega ámay, tén han ektémakxa apyekpelchágweykmo Jesús, apyepta nepyeseksa m'a pan.
Jesús apxekmowásamákpekxoho apkeltáméséyak
(Mt 28.16-20Mc 16.14-18Jn 20.19-23)36 Axta nahan epenchessamók apkeltenneykha xa aqsok nak, cham'a apkenegweykekxo axta nepyeseksa m'a Jesús. Axta aptemék apkelanagkama apkelpeykáseykegko s'e:
—Méko sa' katnehek ektáhakxa kélwáxok kéxegke.
37 Apkelyegwaktamók apagko' axta nahan ma'a, kélhagák axta apkeneyk elwet'ak. 38 Axta eyke aptemék apkelanagkama Jesús se'e:
¿Yaqsa ektáha kélyegwaya nak? ¿Yaqsa ektáha ekya'ássekmo nak kélwáxok? 39 Kóllano emék tén han emagkok. Ko'o s'e. Hélpaknegwoho, héllano nahan, méko eyke ápetek ma'a kélhagák tén han axchakkok, ektáha nak kéxegke kélwet'a ekyetna ko'o xa ekyókxoho nak.
40 Xama axta aptéma appeywa xa, apxekmóssegkek axta apmék tén han apmagkok. 41 Keñe axta Jesús aptéma apkelmaxneyeykencha'a s'e, hakte makhemek axta makham apkelya'ásseyam, eñama m'a élpayheykekxa axta apkelwáxok tén han élpelakkasso apkelwete:
—¿Yetneya yaqwayam antók se'e?
42 Kélméssegkek axta nekha kelasma kélyaqxaqxo, 43 apmomchek axta anhan Jesús ma'a kelasma, aptamchek axta nahan nápaqta'awo'. 44 Tén axta aptéma apkelanagkama s'e:
—Cha'a etneyk ko'o m'a sektémakxa axta séltennáseykha kéxegke sekhamakxa axta makham kélnepyeseksa: séltennassama axta chá'a megkatnehek megkatne ekyókxoho m'a ektémakxa nak eknaqtáxésamaxche Moisés segánamakxa apagkok sexeyenma ko'o, tén han ma'a weykcha'áhak apagkok axta m'a Dios appeywa apkellegasso, tén han ma'a eknaqtáxésamaxche nak Salmos.
45 Tén axta apkelya'assásegweykmo m'a ektémakxa axta eknaqtáxésamaxche'. 46 Axta aptemék apkelanagkama s'e:
—Xeyenmeyk eknaqtáxésamaxche megkatnehek megyetsapma m'a Mesías, tén han exátekhágwók ekwokmo enxoho ántánxo ekhem; 47 kóltennasha sa' nahan apwesey apyókxoho pók aptémakxa énxet'ák yaqwayam sa' elyo'ókxak makham ma'a Dios, yaqwayam sa meyaqmagkásekxeyk ma'a apkeltémakxa melya'assáxma. Sa' keynhok ma'a Jerusalén, 48 kéxegke sa' nahan kóltennasha xa aqsok nak. 49 Keñe sa' ko'o wáphaksek kélnepyeseksa kéxegke m'a apxeyenma axta egkések ma'a Táta. Kólhakha sa' eyke kéxegke s'e tegma apwányam nak Jerusalén, ekwokmoho kélxawágko kélmowancha'a eñama nak néten.
Jesús apmeyeykekxa néten
(Mc 16.19-20)50 Tén axta Jesús apkelya'assama yókxexma teyp tegma apwányam ekweykekxoho m'a Betania. Apkelya'assegkek axta néten apmék apkelmaxnéssessama aqsok éltaqmela. 51 Keñe axta neyseksa apkelmaxnéssesso aqsok éltaqmela, apkexeykekxeyk axta, kélya'áseykekxeyk axta néten. 52 Keñe axta natámen apkelpeykessamo, apkeltaqhémok axta makham ma'a Jerusalén yetlo élpayheykekxa agko' apkelwáxok. 53 Exmakha axta nahan chá'a m'a kañe' tegma appagkanamap nak, elteméssesek apcheymákpoho m'a Dios.
© © Enxet Lengua Sur Bible © Paraguayan Bible Society, 2015.