Negmasse ektepelchamaxche egyempehek segánamakxa agkok
1 Aptáhak axta Wesse' egegkok apcháneya Moisés, tén han Aarón se'e:
2 “Yetneyk sa' agkok énxet élyephe nak apyempehek, essenhan ma'a élenmagéyak nak apyempehek, tén han ma'a élmópeykha nak apyempehek, essenhan ekho nak negmasse ektepelchamaxche egyempehek, kólyentegkásekxak sa' ma'a Aarón, apteme nak apkelmaxnéssesso Dios énxet'ák apagkok, essenhan xama apkelmaxnéssesso Dios énxet'ák apagkok, aptáwen neptámen nak ma'a. 3 Apkelmaxnéssesso Dios énxet'ák apagkok sa' elanok ma'a élenmagéyak nak apyempehek, kelmópekxeyk sa' agkok ma'a áwa' apyempehek ekpayhókxa nak élyephe, ekyapwatchesa enxoho apyempehek, katnehek sa' negmasse ektepelchamaxche egyempehek. Keñe sa' natámen apkelányo apkelmaxnéssesso Dios énxet'ák apagkok xa énxet nak, exének sa' ektáha ekmanyása apyempehek.
4 “Ekmope sa' agkok ma'a apyempehek apyense nak, megkayapwáthek eyke m'a apyempehek, megkalmópekxeyk han áwa' apyempehek, keñe sa' apkelmaxnéssesso Dios énxet'ák apagkok exnések kañe' m'a apháxamap nak, ekweykmoho siete ekhem. 5 Wokmek sa' agkok siete ekhem, elanok sa' makham, sa' agkok kaqxegáha m'a apyense nak, megkapayheykxo enxoho m'a apyempehek nak, exneyásekxak sa' makham kañe' ekweykmoho siete ekhem. 6 Wokmek sa' agkok siete ekhem, elanok sa' makham, ketsék sa' agkok tamhákxak ma'a apyense nak, tén han megkapayheykxo enxoho m'a apyempehek nak, keñe sa' apkelmaxnéssesso Dios énxet'ák apagkok exének eyáxñákxo apyempehek ma'a apháxamap nak, hakte ekmóseka egyempehek aqsa temék. Keñe sa' ma'a apháxamap nak, elyenyeksek sa' apkelnaqta, tén sa' káxñekxohok apyempehek.
7 “Xegágkek sa' agkok apyempehek ma'a ekmóseka nak, cham'a natámen kéllányo axta apháxamap, tén han natámen axta apxeyenma apkelmaxnéssesso Dios énxet'ák apagkok eyáxñákxoho apyempehek, ey'ókxak sa' makham ma'a apkelmaxnéssesso Dios énxet'ák apagkok, yaqwayam elanok makham. 8 Apkelanók sa' agkok apkelmaxnéssesso Dios énxet'ák apagkok ma'a apháxamap nak, apwet'a enxoho eksawheykxoho apyempehek ma'a ekmóseka nak, exének sa' ektáha ekmanyása apyempehek, hakte negmasse ektepelchamaxche egyempehek táhak.
9 “Temék sa' agkok negmasse ektepelchamaxche egyempehek xama énxet, kólyo'ókxések sa' chá'a apkelmaxnéssesso Dios énxet'ák apagkok. 10 Elanok sa' ma'a apkelmaxnéssesso Dios énxet'ák apagkok, ekmope sa' agkok ma'a ekyephe nak apyempehek, élmópeyásekxo enxoho m'a áwa' apyempehek, ektepa enxoho ápetek ma'a ekyephe nak, 11 cháxa ekteme negmasse ektepelchamaxche egyempehek megkamasse xa. Exének sa' apkelmaxnéssesso Dios énxet'ák apagkok ekmanyása apyempehek xa énxet nak, mexnések sa' han kañe', hakte ekmanyása apyempehek táhak.
12 “Yahamok sa' agkok ekxegéyak xa negmasse ektepelchamaxche egyempehek nak, eksawheykxoho enxoho ekyókxoho apyempehek, apkelánésókxa enxoho chá'a m'a apkelmaxnéssesso Dios énxet'ák apagkok, 13 elanok sa' ma'a apkelmaxnéssesso Dios énxet'ák apagkok; sawhekxók sa' agkok ekyókxoho apyempehek ma'a negmasse ektepelchamaxche nak egyempehek, exének sa' eyáxña'awo apyempehek énxet ma'a apkelmaxnéssesso Dios énxet'ák apagkok, hakte ekmope tamhákxak ma'a ektepelchamaxche apyempehek nak, keñe aptáha eyáxñeyo apyempehek. 14 Keñe sa' ektepa enxoho ápetek, katnehek sa' ekmanyása apyempehek. 15 Keñe sa' apkelmaxnéssesso Dios énxet'ák apagkok elanok ma'a ekteyapma nak ápetek, tén sa' exének ektáha ekmanyása apyempehek, hakte yetsek ma'a ápetek ekteyapma: negmasse ektepelchamaxche egyempehek xa.
16 “Mopékxeyk sa' agkok ma'a ápetek ekteyapma nak, ey'ókxak sa' apkelmaxnéssesso Dios énxet'ák apagkok ma'a apháxamap nak, 17 yaqwayam enxoho elano'. Apwet'ak sa' agkok ekmópekxo apyense m'a apkelmaxnéssesso Dios énxet'ák apagkok, exének sa' eyáxñákxo apyempehek ma'a apháxamap nak, hakte cháxñákxeyk apyempehek.
18 “Yetneyk sa' agkok apyense xama énxet, keñe ektaqmelwokmo enxoho, 19 ektamhákxo enxoho ekmope m'a ekyephamakxa nak, essenhan ekmope yáma ekyexwase, emyekxak sa' ma'a aphakxa nak apkelmaxnéssesso Dios énxet'ák apagkok. 20 Apwet'ak sa' agkok apkelmaxnéssesso Dios énxet'ák apagkok ekyapwata m'a ekpayhókxa nak ekteyapmakxa, tén han élmópekxo enxoho m'a áwa' apyempehek, exének sa' ektáha ekmanyása apyempehek xa énxet nak, hakte negmasse ektepelchamaxche egyempehek ma'a ektéma nak. 21 Apwet'ak sa' agkok méko xama enxoho élmópeykekxa áwa' apyempehek ma'a ekpayhókxa nak ekteyapmakxa, tén han megkeypwata enxoho m'a apyempehek, peya enxoho kamassegwók, exnések sa' kañe' xa énxet nak, ekweykmoho siete ekhem. 22 Xegágkek sa' agkok ekmaso m'a apyempehek, exének sa' apkelmaxnéssesso Dios énxet'ák apagkok ekmanyása apyempehek xa énxet nak, hakte negmasse ektepelchamaxche egyempehek temék. 23 Agkok kaqxegáha m'a ekteyapmakxa nak, ekteyapmakxa nanók aqsa m'a apyense nak, exének sa' apkelmaxnéssesso Dios énxet'ák apagkok eyáxñeyo apyempehek.
24 “Metchek agkok apyempehek xama énxet, ekmope yáma ekyexwase agkok tamhákxak ma'a aphápetek apmeyesma nak, essenhan ekmope, 25 elanok sa' ma'a apkelmaxnéssesso nak Dios énxet'ák apagkok. Kelmopékxeyk sa' agkok ma'a áwa' apyempehek, tén han ma'a apmeyesma nak, tén han ekyapwata enxoho m'a apyense nak, negmasse ektepelchamaxche egyempehek akke tépak ma'a apmeyesma nak; exének sa' apkelmaxnéssesso Dios énxet'ák apagkok ektáha ekmanyása apyempehek, eñama ekteme negmasse ektepelchamaxche egyempehek. 26 Apwet'ak sa' agkok méko xama élmópeykekxa áwa' apyempehek apmeyesmakxa, apkelano enxoho m'a apkelmaxnéssesso Dios énxet'ák apagkok, tén han megkeypwata enxoho, peya enxoho kamaskok, keñe sa' yaqxegkesek kañe' xa énxet nak, ekweykmoho siete ekhem. 27 Wokmek sa' agkok siete ekhem, elanok sa' makham ma'a apkelmaxnéssesso Dios énxet'ák apagkok, xegágkek sa' agkok ekmétéyak ma'a apyempehek, keñe sa' exének ektáha ekmanyása apyempehek xa énxet nak, hakte negmasse ektepelchamaxche egyempehek ma'a ektéma nak. 28 Agkok kaqxegáha apmeyesma nak, megkapayheykxo enxoho m'a apyempehek, peya enxoho kamaskok, ekyephe aqsa katnehek ma'a apmeyesmakxa nak, keñe sa' apkelmaxnéssesso Dios énxet'ák apagkok exének eyáxñeyo apyempehek ma'a apháxamap nak, hakte nanók apmeyesma xa.
29 “Tekkek agkok élyephe apqátek xama énxet essenhan kelán'a, essenhan ma'a kóneg apátog nak énxet tén han kelán'a, 30 elanok sa' apkelmaxnéssesso Dios énxet'ák apagkok ma'a élyephe nak. Yapwatchek sa' agkok ma'a élyephe nak, tén han ektáha enxoho yáma élyátekto m'a apwa', tén han ántawo', keñe sa' apkelmaxnéssesso Dios énxet'ák apagkok exének ekmanyása apyempehek xa énxet nak, hakte weygké temék, cham'a negmasse ektepelchamaxche empátek, tén han kóneg egátog. 31 Apwet'ak sa' agkok megkayapwata enxoho apyempehek apkelano enxoho apkelmaxnéssesso Dios énxet'ák apagkok ma'a ekteyapmakxa nak weygké, tén han megkalpésakmo enxoho áwa' apqátek, keñe sa' exnések kañe' xa énxet nak, ekweykmoho siete ekhem. 32 Wokmek sa' agkok siete ekhem, elanok sa' ekmasagkexa apyempehek ma'a apkelmaxnéssesso Dios nak énxet'ák apagkok, sa' agkok kaxñágkok ma'a weygké, tén han megkayapwátesa enxoho m'a apyempehek, tén han megkatnahákxo enxoho yáma élyátekto m'a apwa', 33 keñe sa' apkelmaxnéssesso Dios énxet'ák apagkok yának eyesaksek áwa' apátog, essenhan ma'a apqátek, keñe sa' yeymok ma'a ekteyapmakxa nak weygké, exnések sa' makham kañe' ekweykmoho siete ekhem. 34 Wokmek sa' agkok siete ekhem, elanok sa' makham ekmasagkexa apyempehek ma'a apkelmaxnéssesso Dios énxet'ák apagkok, sa' agkok kaqxegáha m'a weygké, tén han megkayapwátesa enxoho apyempehek, keñe sa' apkelmaxnéssesso Dios énxet'ák apagkok exének ektáha eyáxñeyo apyempehek xa énxet apháxamap nak, elyenyeksek sa' apkelnaqta, tén sa' káxñekxak apyempehek. 35 Xegágkek sa' agkok apyempehek ma'a weygké nak, natámen apxénamap eyáxñeyo apyempehek, 36 elanok sa' makham énxet apháxamap ma'a apkelmaxnéssesso Dios énxet'ák apagkok; sawheykxók sa' agkok weygké m'a apyempehek, megkólyahássesha sa' apwa' élyátekto: ekmanyása apyempehek xa énxet nak. 37 Apkeneykek sa' agkok megkaxñágkok weygké m'a apkelmaxnéssesso Dios énxet'ák apagkok, tén han apcháneya enxoho katyapak ekpésyam apwa', cháxa ekmassa weygké xa, cháxñákxók han apyempehek ma'a énxet nak. Tén sa' apkelmaxnéssesso Dios énxet'ák apagkok exének eyáxñákxoho apyempehek xa énxet nak.
38 “Yetneyk sa' agkok élmópéyak apyempehek énxet essenhan kelán'a, 39 elanok sa' apyempehek ma'a apkelmaxnéssesso nak Dios énxet'ák apagkok, apwet'ak sa' agkok yáma ekmope ekmasagkexa, essenhan ekpexpope, ekteyapma naqsa eyke m'a apyempehek nak; eyáxñeyo apyempehek xa énxet nak.
40 “Teyekmek agkok apwa' xama énxet, ektáha enxoho meyke áwa' apqátek, eyáxñeyo apyempehek xa. 41 Teyekmek agkok áwa' m'a ekpayhakxa nápat, keñe ektáha enxoho meyke áwa' m'a ekpayhakxa nápat, eyáxñeyo apyempehek nahan xa. 42 Tekkek sa' agkok élyense ekmope yáma ekyexwase m'a ekpayhókxa nak meykexa áwa' apqátek, cham'a apyetseksek nak, essenhan ekpayhakxa nápat nak, cháxa ektepakxa negmasse ektepelchamaxche egyempehek xa. 43 Keñe sa' apkelmaxnéssesso Dios énxet'ák apagkok elano', ekmope yáma ekyexwase sa' agkok ekyephe m'a ekpayhókxa nak meykexa áwa' apqátek, ektémól'a kataxchek negmasse ektepelchamaxche egyempehek ma'a negyókxa', 44 cháxa énxet nak, negmasse ektepelchamaxche egyempehek táhak, hakte élyense apqátek táhak. Énxet ekmanyása apyempehek xa. Sa' etnehek han exének ma'a apkelmaxnéssesso nak Dios énxet'ák apagkok.
45 “Énxet ekteme enxoho negmasse ektepelchamaxche apyempehek, kéméxcheyk elmaha apkelnaqta apkelyeptamap, meyke apchaqlasso apqátek, nekha nápat sa' han yaqlaksek etnehek énnaqtések appeywa s'e: ‘¡Ekmanyása émpehek ko'o! ¡Ekmanyása émpehek ko'o!’ 46 Énxet ekmanyása apyempehek sa' han eltamhakpok ma'a ekha enxoho makham élyephe apyempehek; apxakko' sa' nahan exek teyp nak apkelpakxeneykegkaxa énxet'ák.
47 “Apyápaqmatchek sa' agkok kéltaxno apkelánamap nak nepkések apwa', essenhan ma'a apáwa apkeláxñe nak, 48 essenhan ma'a kélótma nak apáwa apkeláxñe, essenhan ma'a nepkések apwa' nak, essenhan ma'a aqsok émpehek nak, essenhan ma'a mók aqsok élánamáxche nak chá'a aqsok émpehek, 49 yáma ekyápaqmate sa' agkok xa aqsok nak, essenhan yáma ekyexwase, cháxa ekteme negmasse ektepelchamaxche egyempehek xa, kólxekmóssekxak sa' ma'a apkelmaxnéssesso Dios énxet'ák apagkok. 50 Elanok sa' apkelmaxnéssesso Dios énxet'ák apagkok ma'a ekyápaqmate nak, keñe sa' yaqxegkesek kañe' m'a aqsok ekyápaqmate nak nekha, ekweykmoho siete ekhem. 51 Wokmek sa' agkok siete ekhem, elanok sa' makham ma'a aqsok ekyápaqmate nak nekha. Xegágkek sa' agkok ekyápaqmate m'a kéltaxno nak, essenhan kélótma nak, essenhan ma'a aqsok émpehek, essenhan ma'a aqsok élánamáxche nak aqsok émpehek, cháxa ektáha negmasse ektepelchamaxche egyempehek ekmaso xa, élmanyása han tamhágkok ma'a aqsok nak. 52 Kólwatnekxak sa' chá'a ekyókxoho aqsok ekyápaqmate nak chá'a nekha', hakte negmasse ektepelchamaxche egyempehek ekmaso xa ektéma nak. 53 Apkelanók sa' agkok ma'a apkelmaxnéssesso nak Dios énxet'ák apagkok, apwet'a enxoho megkaxñágko m'a ekyápaqmate nak, 54 yának sa' kólyenyeksek ma'a ekyápaqmate nak nápakha', tén han kólaqxegkesek kañe' m'a aqsok, ekweykmoho siete ekhem.
55 “Kélyenyéssek sa' agkok ma'a ekyápaqmate nak nápakha', elanok sa' ma'a apkelmaxnéssesso Dios énxet'ák apagkok. Apwet'ak sa' agkok megkalcháxko m'a ekyápaqmate nak, aqsok ekyápaqmate ekmanyása m'a, kólwatnekxak sa' han ma'a aqsok nak, megkeyxek sa' megkaxñéyak ma'a ekyápaqmate nak, hakte cháxa ekteme ektepelchamaxche xa, cham'a émpehek nak, tén han ma'a kañe' nak. 56 Apkelanók sa' agkok ekyápaqmate m'a apkelmaxnéssesso nak Dios énxet'ák apagkok, étak sa' éxyaweykxo m'a ekyápaqmate nak natámen kélyenyesso, elyeptek sa' ma'a kéltaxno nak, aqsok émpehek, essenhan ma'a kélótma nak. 57 Tepékxeyk sa' agkok makham, ekxegákxo enxoho makham ekyápaqmate m'a kéltaxno nak, kélótma, essenhan ma'a aqsok élánamáxche nak aqsok émpehek, kólwatnekxak sa' ma'a aqsok élyápaqmate nak nekha'. 58 Keñe m'a kéltaxno, kélótma, essenhan élánamáxche nak aqsok émpehek, cham'a ekmasse nak kélyenyesso m'a ekyápaqmate, kólyenyeyásekxak sa' makham, keñe sa' káxñekxoho'.”
59 Cháxa segánamakxa agkok ma'a ekyápaqmate nak chá'a aqsok, nentaxno apkelánamap nak nepkések apwa', essenhan ma'a apáwa apkeláxñe, essenhan ma'a kélótma, essenhan ma'a aqsok élánamáxche nak aqsok émpehek, yaqwayam enxoho kalxénaxchek éláxñeyo tén han élmanyása.
© © Enxet Lengua Sur Bible © Paraguayan Bible Society, 2015.